Educación Arranca la matrícula la Universidá Popular en Xixón by asturnet 15 de setiembre, 2014 El día 16 de setiembre abrese’l plazu pa matriculase nos cursos y talleres de la Universidá Popular correspondientes a la segunda ufierta del añu 2014 que se presentaben esti día en Xixón cola participación de Carlos Rubiera, Conceyal de Cultura, Educación, Mocedá y Festexos, y Liliana Fernández-Peña Vega. Xefa del Departamentu d’Universidá Popular. A partir del próximu 8 d’ochobre van dar empiezu los cursos incluyíos na nueva programación de la Universidá popular pa esta seronda-iviernu. Son más de 170 cursos y talleres, ente los que s’inclúin 35 nueves propuestes que se suman a les más estables y habituales. Tratar de cursos tan variaos como Programación de página web pa dispositivos móviles, Multiplicación d’especies vexetales, Curiando a quien curien, Técniques de concentración y atención plena: mindfulness, República Checa y la so cultura, El cine que ganó la guerra fría, Síntesis modular con Reaktor, Reciclaje artísticu aplicáu al grabáu o Virtuosismu y fe na música clásica, ente otros. El nuevu programa inclúi tamién novedaes en locales no que cinca a los que se vienen impartiendo los cursos nes últimes ufiertes, al treslladase’l taller d’encuadernación al Centru de Cultura Antiguu Institutu y el de marroquinería al CMI Atenéu de La Calzada. Amás, incluyese por primer vegada programación nel Centru de Cultura Cajastur Muralla Romana, gracies a la firma d’un conveniu de collaboración col Atenéu Xovellanos. Yá ta disponible’l nuevu folletu en formatu dixital xuntu col catálogu de condiciones y conteníos de cada unu de los cursos. A partir del 1 de setiembre va tar tamién disponible en papel en tolos centros municipales. La Universidá Popular de Xixón ye’l Departamentu de la Fundación Municipal de Cultura encargáu de la educación permanente d’adultos (mayores de 16 años). La Universidá Popular de Xixón toma aspeutos claves como la educación pal ociu cultural, la formación profesional específica, la divulgación de nuevos llinguaxes artísticos o la potenciación d’actitúes flexibles antes los tresformamientos tecnolóxicu y social poles que traviesa la sociedá actual. Pa ello entámense diversos cursos y talleres de distintu temática y duración y en diverses zones de la ciudá. Folletu en formatu dixital de los cursos 15 de setiembre, 2014 0 FacebookTwitterPinterestEmail
Educación Filtren el nuevu borrador del Real Decretu d’acreditación del profesoráu universitariu de Wert by asturnet 15 de setiembre, 2014 Esti llunes día 15 de setiembre taba previsto que se volvieran aconceyar los rectores de les universidaes españoles col Ministru d’Educación pa siguir desendolcando la reforma del sistema d’evaluación y acreditación del profesoráu. Y la Universidá de Huelva filtraba nes sos páxines web el borrador del Real Decretu pol que se modifica l’anterior RD 1312/2007 pa l’acreditación del profesoráu titular y de Cátedra. Como ya s’adelantare, el nuevu formatu ye cualitativu en llugar de cuantitativu y abre munches dubies sobre’l procesu. Asturnews ufre’l borrador completu del decretu. 15 de setiembre, 2014 0 FacebookTwitterPinterestEmail
Política IX pide respetu pal modelu cooperativista de les Caxes Rurales by asturnet 12 de setiembre, 2014 Izquierda Xunida vieno acabante pidir al Gobiernu que respete’l modelu cooperativista de les Caxes Rurales que tanta importancia tien nel norte d’España y que tan averáu s’alcuentra a la cultura d’Asturies y Euskadi, por exemplu. El senador d’IX, Jesús Iglesias, esixó güei que se respete’l modelu de les Caxes Rurales, por atalantar qu’estes entidaes tan en peligru pol interés qu’espertaron nel sector bancariu y que’l Gobiernu quier intervenir no que denominó estratexa de saquéu de lo colectivo. El parllamentariu presentó una moción na Cámara Alta coles mires de salvaguardar la continuidá d’estes entidaes que crecieron a pesar de la crisis gracies a una xestión prudente. Les Caxes Rurales, esplicó Iglesias, preséntense como la única anomalía del sector financieru y, a pesar de ser pequenes-el so negociu supon el 6% del total, con depósitos per valor de más de 91.000 millones d’euros- ye apetecedor pa la banca privada. Desenvolvieron una banca pegada a la so realidá, dirixida fundamentalmente a autónomos, pequenes empreses y nun se metieron en nenguna aventura siendo solventes al cien per cien: los creitos concedíos fueron llixeramente inferiores a los depósitos colos que cunten, señaló Jesús Iglesias. Prueba del interés de les entidaes privaes n’introducise nel nichu de negociu de les Caxes Rurales ye la creación, per parte de los dos bancos más importantes del país, de filiales empobinaes al mundu rural. Ye precisamente esti enclín el que llevantó les medranes de que se pretenda una bancarización, lo que supondría la desapaición d’un modelu cooperativista qu’apigura a más de 2,7 millones de socios. 12 de setiembre, 2014 0 FacebookTwitterPinterestEmail
Tecnoloxía Arrancaron los actos del X Aniversariu de la Wikipedia astur by asturnet 12 de setiembre, 2014 Esti vienres día 12 arrancó la celebración del décimu aniversariu de la comunidá d’usuarios de Wikipedia n’Asturianu que se desenvuelve, en collaboración con Wikimedia España, a lo llarfo de dos díes nel Auditoriu Príncipe Felipe (Plaza La Gesta, Uviéu) con una programación que cunta con una montonera d’actividaes. La primer xornada d’esti vienres 12 entamó a les 17:30 h y tres un pequeñu repás d’estos diez años acoyía una charra d’introducción al funcionamientu de Wikipedia, a la que siguía un taller pa deprender a editar na so versión n’asturianu. El sábadu 13 a les 11 hores, dientro yá de la segunda xornada, escomenzarase con un homenaxe lliterariu a Caitano Bardón (Carrizu, Llión, 1881) en collaboración colos colectivos Fame Poétika y l’asociación Faceira, asitiada en Llión. Nésti lleeránse dellos testos col acompañamientu musical de Fran Allegre. Mañana sábadu presentaráse tamién un Wikiproyectu sobre deporte n’Asturies y pondráse fin al eventu con una Mesa Redonda sobre “Llingua y Medios” na que ta previsto que participen David Melendi, profesor del Área d’Inxeniería Telemática de la Universidá d’Uviéu, Denis Soria, alministrador en Wikipedia n’Asturianu (como moderador), José Ignacio Suárez, profesor titular de Musicoloxía na Universidá d’Uviéu, Nicanor García, informáticu de l’Autoridá Portuaria del Musel, Pablo Rodríguez Guardado, redactor d’Asturies.com, Pelayu Valduvieco, estudiante de Filoloxía Románica na Universidá d’Uviéu y desenrollador de distintos proyectos de traducción, y Xuacu Saturio, alministrador y embaxador técnicu en Wikipedia n’Asturianu. 12 de setiembre, 2014 0 FacebookTwitterPinterestEmail
Lliteratura Fina’l plazu presentación a Premios Lliterarios del Principáu by asturnet 12 de setiembre, 2014 Esti vienres 12 de setiembre fina’l plazu de presentación de trabayos a los premios lliterarios en llingua asturiana pal añu 2014: la 35.ª edición del Premiu “Xosefa Xovellanos” de novela; la 20.ª edición del Premiu “Xuan M.ª Acebal” de poesía; la 20.ª edición del Premiu “Máximo Fuertes Acevedo” d’ensayu; la 7ª edición del Premiu “María Josefa Canellada” de lliteratura infantil/xuvenil; y la 6ª edición del Premiu “Alfonso Iglesias” de cómic. Cada premiu tien una dotación de 3.000 euros. Esti 12 de setiembre finaliza’l plazu pa presentar orixinales a los cinco premios lliterarios que’l Gobiernu d’Asturies convoca nel presente añu 2014 cola mira d’arriquecer y prestixar la llingua y cultura asturianes. El Premiu «Xosefa Xovellanos» de Novela (trixésima quinta edición) ye pa obres de tema, xéneru y estructura llibres que tengan una estensión mínima de setenta y cinco páxines a espaciu doble. El Premiu «Xuan M.ª Acebal» de Poesía (vixésima edición) empobínase a obres de tema, xéneru y estructura llibres que tengan una estensión mínima de quinientos versos. El Premiu «Máximo Fuertes Acevedo» d’Ensayu (vixésima edición), ye pa obres de tema, xéneru y estructura llibres que sían inédites y tengan una estensión mínima de cincuenta páxines escrites a espaciu doble. El Premiu «María Josefa Canellada» de Lliteratura Infantil y Xuvenil dedícase a obres de lliteratura infantil o xuvenil (con independencia de que sían noveles, compilaciones de cuentos, poemarios o obres de teatru) una y buenes sían inédites y tenga una estensión mínima de doscientos cincuenta versos pa la poesía y de trenta páxines a espaciu doble pa los demás xéneros. Y el Premiu «Alfonso Iglesias» de Cómic (sesta edición) ye pa obres d’estilu, tratamientu y tema llibres, pudiendo abarcar el desarrollu d’una historia única o un conxuntu d’histories, y con una estensión mínima de cincuenta páxines. 12 de setiembre, 2014 0 FacebookTwitterPinterestEmail
Educación L’ANECA y la CNEAI fusionense by asturnet 12 de setiembre, 2014 Esti día, nel Congresu de los Diputaos, el plenu aprobó la Llei de racionalización del sector públicu y otres midíes de reforma alministrativa, pola que se produz el cambéu de la ANECA de Fundación Privada a Organismu Públicu. Polo que se concentren nun únicu organismu toles funciones d’evaluación y acreditación del profesoráu universitariu, qu’hasta agora veníen desenvueltu la ANECA y la Comisión Nacional Evaluadora de l’Actividá Investigadora (CNEAI). 12 de setiembre, 2014 0 FacebookTwitterPinterestEmail
Educación La Mesa sectorial d’Universidaes aplaza pa ochobre’l nuevu sistema d’acreditación pal profesoráu universitariu by asturnet 12 de setiembre, 2014 Na tercer xunta de la Mesa Sectorial d’Universidaes, celebrada esti xueves 11 de setiembre de 2014, na see del Ministeriu d’Educación apautose aplazar hasta ochobre’l discutiniu sobre los nuevos criterios d’acreditación del profesoráu a la vista de les enmiendes propuestes polos sindicatos y la CRUE. La revisión del Proyectu de Real Decretu de acreditación, coles pequeñes ya insignificantes enmiendes propuestes polos sindicatos y aceptaos pol Ministeriu foi la principal tema de la xunta, magar se trataren tamién cuestiones como’l concursu de tresllaos del PDI Funcionariu. Xuntu coles enmiendes presentaes polos sindicatos, pola CRUE y otros organismos, la Mesaa Secotiral va axuntase de nuevu, con cuenta de tratar éstes y les que se propongan nuevamente per parte de los sindicatos na próxima Mesa, prevista pa esti próximu ochobre. Los sindicatos siguen calteniendo que lo verdaderamente importante d’esti Proyectu son los criterios d’evaluación que tienen de ser oxetivos, tresparentes y que dexen la autoevaluación de los interesaos como se facía hasta agora. Tratóse tamién la propuesta del concursu de tresllaos del PDI Funcionariu, cuestión na que la representación siondical caltuvo les enmiendes presentaes na Mesa del pasáu 15 de xunetu de 2014, na qu’indicaba qu’esti concursu tendría de sirvir tantu pal treslláu horizontal como pa la promoción de los profesores titulares, ensin qu’esto nun contabilice na tasa de reposición. N’esti mesmu apartáu, la representación sindical continua calteniendo que se prevea la promoción interna nes Universidaes. Otros temes que los sindicatos consideren importantes son la Tasa de Reposición, de la que nun se falón un res, la promoción Interna, la cuestión de les places impugnaes de titulares que salieren a concursu enantes de que se amenorgara dafechu la tasa de reposición y l’Estatutu del PDI. Los sindicatos denuncarion na xunta que ye necesariu un reglamentu de funcionamientu de la Mesa Sectorial d’Universidaes y un calendariu de trabayu qu’asegure la continuidá nel tiempu. Y el Ministeriu amosose d’alcuerdu na continuidá de les xuntes pa tratar toles temes anteriores. Respectu a la tema de la Tasa de Reposición, el Ministeriu pidió una medría a un 50% del PDI, El Ministeriu de Facienda continua fixu nel 10%, pero puede ser que se supere esti porcentaxe. FETE-UXT cree absolutamente necesariu xubir esti porcentaxe del 10% del PDI y amás el del 0% de la PAS. 12 de setiembre, 2014 0 FacebookTwitterPinterestEmail
Política Podemos Avilés entama organizase by asturnet 11 de setiembre, 2014 Podemos Avilés, el círculu que Monedero amosó como exemplu de cómo se puen llograr un 20% de votos con 300 euros d’inversión, entama mañana l’alderique sobre los sos principios organizativos. L’Alderique que xeneró dellos documentos a nivel estatal, y autonómicu al traviés de la plataforma Reddit, onde se presentaron numberoses propuestes que van ser aldericaes pola asamblea. A la propuesta del grupu técnicu xúnense les propuestes de Pablo Echenique (Eurodiputáu) y la propuesta de Daniel Ripa (Candidatu per Asturies nes pasaes elecciones),. Tamién se van aldericar delles propuestes xeneraes dende’l circulo d’Avilés. Otra de les temes va ser la futura manifestación que se ta entamando a favor de los vecinos del Nodo xuntu con otres organizaciones. 11 de setiembre, 2014 0 FacebookTwitterPinterestEmail
Patrimoniu La esposición sobre la toponimia de Samartín del Rei Aurelio tará abierta tol mes na Casona del Bravial by asturnet 11 de setiembre, 2014 Siguiendo coles actividaes previstes dientro del mes de la toponimia quentama la Oficina de Normalización Llingüística de Samartín del Rei Aurelio col enfotu de potenciar lemplegu de los nomes oficiales de los sos pueblos, a partir d’esti vienres 12 de setiembre pue visitase na Casona del Bravial una esposición quinclúi toos estos nomes, asina como información rellacionada col procesu de recuperación toponímica y materiales didáuticos. La principal novedá que presenta esta muestra ye quen pocu espaciu pue accedese a una información virtual quenancha la información física yá presente nos cartelos y la complementa con enllaces web que sactiven al ser escaniaos cola aplicación Layar, que se pue instalar en tabletes o móviles dúltima xeneración. Los paneles que incluyen más de 150 puntos de realidá enanchada pudieron vese ta a lo llargo del pasáu fin de selmana na FEMEX, onde tuvo mui bona acoyida, polo que sufierta agora la posibilidá de facelo durante tol mes na Casona del Bravial de llunes a vienres nhorariu de 9 a 13 hores. 11 de setiembre, 2014 0 FacebookTwitterPinterestEmail
Comunicación Gonzali Producciones y el doblaxe by asturnet 11 de setiembre, 2014 Gonzali Producciones asoleyaba ayeri un comunicáu nel que diz vese na necesidá d’asoleyar delles cuestiones “énte la repetición del tracamundiu sobre l’autoría del versionáu” de “Greystoke: The Legend of Tarzan, Lord of the Apes”, emitíu na nueche del 8 setiembre pola TPA. Sigún se diz nel comunicáu, que reproducimos lliteralmente, “per estremaes víes de contautu llegáronnos, hasta’l día de güei, crítiques mui dures a la emisión mentada onde los remitentes suponíen que yera responsabilidá de la nuesa empresa, al ser nós el referente nel doblaxe profesional n’asturianu dende 2010. Ello motiva qu’una vuelta más Gonzali Producciones reitere que nun tien rellación nenguna con esi trabayu.Tamién queremos destacar el bon resultáu de share (6,2) llográu pola reposición segunda del nuesu doblaxe El rostru impenetrable, emitíu el Día d’Asturies a les 15:40 hores, que continúa asina col respaldu d’audiencia que se suma a la so condición de programa más vistu de TPA a la carta, espaciu de la web de la televisión autonómica onde ya pasó de les 70.000 visites. Gonzali Producciones quier felicitar a la Xunta pola Defensa de la Llingua Asturiana pol so apoyu permanente a la presencia digna del nuesu idioma na TPA, al tiempu qu’espeya bien a les clares que comparte l’enfotu d’esta entidá reivindicativa pol cuidáu de la calidá llingüista de los doblaxes. Nesi sen, queremos recordar que Gonzali Producciones siempres entendió que los sos productos n’asturianu y gallego-asturianu esixíen un tratamientu profesional nos ámbitos llingüísticu, actoral y téunicu. Un comportamientu de lóxica cuando la nuesa productora lleva inviertiendo nestos productos decenes de miles d’euros y bona parte d’ellos, na Estaya de Doblaxe, a fondu perdíu. Compartimos cola XDLA la necesidá de persones con conocimientos contrastaos y d’un modelu llingüísticu afayaízu. Poro, Gonzali Producciones trabaya con traductores bien conocedores de la realidá idiomática asturiana. Asina, pal doblaxe El rostru impenetrable, la productora contó con un escritor de llarga trayeutoria que sumaba a la so condición de falante patrimonial la esperiencia como axustador de doblaxe y qu’actuó como llingüísta de sala. Igualmente, la empresa tuvo nel desarrolu de varios trabayos, casu d’El rostru impenetrable, a un director de doblaxe formáu académicamente en realización de productos audiuvisuales. Tamién, síguese una política de casting acordies colos proyeutos, p’asegurar bona interpretación y variedá de voces. Gonzali Producciones ta enfotada nos vinientes proyeutos de la Estaya de Doblaxe, empobinaos a la TPA y otres televisiones y a la so edición en DVD, campu nel que somos pioneros. Y arriendes d’ello, cola seriedá y rigor que demanda la ellaboración profesional de los versionaos n’asturianu de películes y series”. 11 de setiembre, 2014 0 FacebookTwitterPinterestEmail