asturnet

La mengua horaria del profesoráu impidirá a alumnos y alumnes de bachilleratu cursar asturianu nesti centru sotrondianu, sigún cieno acabante de denunciar l’Asociación de Pás y Más del IES J.J. Calvo Miguel de Sotrondiu. Esta AMPA del conceyu Samartín del Rei Aurelio vien de dirixise a la Conseyera d’Educación denunciando qu’esa mengua d’horariu del profesoráu d’asturianu va a impedir al alumnáu de bachilleratu d’esti centru cursar l’asignatura de Llingua Asturiana.

Esti retayu ye de más de la mitá del horariu, y dende l’AMPA nun entienden que se prive d’estudiar asturianu a un alumnáu que lleva cursándolu dende Primaria, polo que consideren necesario caltener la ufierta de l’asginatura en toles etapes educatives. Pa l’AMPA, el tratu al asturianu nun puede ser marxinal, y menos cuando cunta con una demanda perimportante.

L’Área Federal d’Educación d’IX vieno acabante esta fin de selmana de poner en marcha un procesu constituyente pa impulsar la construcción ciudadana d’un modelu educativu alternativu y llargamente compartíu. El Plenu Federal de l’Área d’Educación d’IX, integráu por responsables d’Educación de toles Federaciones d’Izquierda Xunida, axuntóse’l sábadu 13 de setiembre en Madrid, p’aldericar y aprobar el documentu qu’IX va presentar a la comunidá educativa como base pa la construcción participativa d’una nueva Llei d’Educación.

Nel marcu del llamamientu escontra “un Procesu Constituyente pa construyir una alternativa de país, un nuevu modelu d’Estáu, de Gobiernu y de sociedᔠqu’IX fai a les fuerces, organizaciones y movimientos sociales d’izquierda, “propónse impulsar un procesu d’alderique y decisión colectiva, abiertu a la participación de tola Comunidá Educativa, asociaciones, instituciones civiles y ciudadanía polo xeneral, de cara a establecer les exes básiques y aspeutos prioritarios pa una nueva Llei d’Educación que sería ratificada finalmente por referéndum”.

IX considera que ye hora de pasar del refugu contundente al modelu educativu vixente, que’l so máximu esponente ye la LOMCE, a la propuesta d’un modelu alternativu d’Educación Pública “llargamente compartíu”.

Nun comunicáu asoleyáu esti día del empiezu de les clases de Secundaria n’Asturies, el sindicatu SUATEA llama a la movilización , sigún empieza’l cursu “y vemos cómo los problemes caltiénense por causa de los retayos. Empecipien les actividaes llectives esti miércoles y la reducción del profesoráu ye’l datu que más incide nes condiciones nes que s’atopen los centros”. Sigún SUATEA “de resultes de la xuba del horariu llectivu y la reducción de la plantiya, sobrecárgase a aquellos que tienen xornada completa y aumenten les medies xornaes que constitúin yá lexón nos institutos asturianos”.

Como denuncia’l sindicatu “dellos centros tienen hasta 10 docentes nesta situación lo qu’estorba hasta la desesperación la ellaboración de los horarios. La estratexa de cuntar con estos contratos sirve pa que l’alministración escuenda la perda de 2 o 3 puestos de trabayu de media per centru, pero ye indiscutible qu’estes cifres repercuten irremediablemente na atención educativa. N’especialidaes como Filosofía llega al 90% de medies xornaes, en Cultura Clásica’l 53%, en Física y Química’l 37%, y asina podríamos siguir numberando munches más.

El sindicatu tamién amuesa la so esmolición porque “nun podemos escaecer qu’esto produzse nun contestu nel que la plantiya definitiva va menguando añu a añu coles mesmes qu’aumenta la inestabilidá llegando a porcentaxes d’interinidá del 24% que provoquen la rotación añal de la inmensa mayoría del profesoráu en dellos centros asturianos. Los númberos nun son solo númberos, tienen detrás alumnáu y responsabilidaes sociales nun ámbitu tan trascendente como ye l’educativu y por ello nun podemos compartir nin entender el preste de la Conseyera d’Educación vendiendo la supuesta normalidá al entamu d’esti cursu. Amás, los docentes interinos con vacante vieron modificada la duración del so contratu y esto ta xenerando molición p’aquellos que nun tienen garantizada la continuidá’l próximu cursu”.

El sindicatu docente tamién diz que “queden nel aire dellos aspeutos como la prestación por desempléu, la realización de los exames de setiembre o la puntuación por puestos de mal desempeñu. Ello sumao a que por causa de la tardía axudicación que se dio esti cursu, llegaron a los centros col repartu horariu zarráu perxudicando los derechos de munchos”.

Les estorbises d’esti cursu por causa de la entrada a valir de la LOMCE en Primaria, anuncien yá –si nun lo remediamos primero- les que vamos vivir el siguiente cola implantación de los nuevos currículos de Secundaria y Bachilleratu. Entá asina, elementos más negativos d’esta llei como la falta de democracia interna nos centros, el papel reserváu a les nueves direcciones, la especialización curricular o les reválides con efectos nos xornales y nes condiciones llaborales de los docentes pueden convertise nuna amenaza a sumar pal llabor del profesoráu.