asturnet

“Como yá ye vezu nos principios de cursu n’Asturies, l’incumplimientu de les lleis, los recortes y la privación del derechu a estudiar asturianu al alumnáu que lo solicita vuelven a marcar l’axenda nun sistema educativu que mantién en situación de marxinación y marxinalidá a la llingua asturiana” sigún denunciaba esta mañana la Xunta Pola Defensa de la Llingua.

Nun comunicáu asoleyáu esti día, la XPDLA afita que “si esta situación ye estensible a toles etapes educatives, hai que reconocer qu’una de les etapes onde la situación ye más llaceriosa ye nos dos años de Bachilleratu, onde’l porcentaxe del alumnáu que ye quién a facer valir los sos derechos y poder dar l’asignatura ye casi inesistente (poco más de 200 d’ente 10.000)”.

Esta situación dexa bien claro “la nula intención de la Conseyería d’aplicar l’espíritu de la Llei d’Usu. Resulta demoledor viniendo d’un equipu saliente que, nin siquiera nel principiu del so últimu cursu, tien el más mínimu xestu conciliador y positivu pa colos derechos de les persones que soliciten estudiar asturianu”.

Un bon númberu de persones, centros y asociaciones de padres y madres, dende Samartín del Rei Aurelio a Xixón y Mieres, tán faciendo llegar a la Xunta pola Defensa de la Llingua Asturiana denuncies d’estos impedimentos, ensin qu’hasta la fecha la Conseyería demostrara tar faciendo dalgo pa iguar esta situación.

Por eso dende la XDLA “reclamamos a la Conseyería d’Educación que tome les midíes necesaries pal cumplimientu de la llei y p’asegurar el derechu del alumnáu a recibir formación n’asturianu en tolos centros educativos y en tolos niveles”.

El Día la Reciella, aventu qu’organiza l’asociación “Reciella: Families pol asturianu” y que va tener llugar esti domingu 5 d’ochobre nel Muséu del Pueblu d’Asturies, yá tien programa zarráu. Lo mesmo que na primer edición, celebrada nel mes de setiembre del añu pasáu, la programación, qu’entama a les 11 la mañana y rematará a les 7 la tarde cola danza prima, ta enllena d’actividaes de toa triba, siempre col asturianu como idioma vehicular.

Asina a partir de les 11.00 la mañana les asociaciones Trebeyos y Esbilla, van empobinar dos espacios con xuegos medievales y tradicionales asturianos respectivamente. Un poco más alantre, a les 12.30 la mañana, ta prevista la exhibición infantil de Bolos organizada en collaboración cola Federación Asturiana, y que tendrá la bolera del Muséu del Pueblu d’Asturies como escenariu. Na mesma van participar neños y neñes federaes de la Peña Morcín, actuales subcampeones infantiles d’Asturies na modalidá de cuatriada.

Dempués de la xinta, que podrá realizase nel mesmu recintu al instalase un puestu de comida y bébora, el programa de tarde va entamar cola participación de los promotores de“El cantar del vasu“, iniciativa que tien por oxetu, pente medies del xuegu del vasu, visibilizar la importancia de la tresmisión xeneracional del idioma.

Una vuelta ximielgaos los vasos col cantar melgueru que los acompaña, ye tiempu de siguir cola música pente medies del taller d’instrumentos tradicionales dirixíu pol músicu David Varela, qu’entamará a les 17.00 hores de la tarde.

Una hora dempués, y como ramu a la xornada, tendrá llugar nel escenariu situáu nel Tendayu del Muséu’l conciertu acústicu de Pop Piquiñín, pal que tienen preparaes dos sorpreses: la participación de convidaos mui especiales y l’adelantu de dellos temes de “Nun mos gusten los llunes“, el so segundu discu n’asturianu.

Amás de toes estes actividaes, nel espaciu del Tendayu y el prau central van asitiase dellos puestos: los de lliteratura infantil y xuvenil de les editoriales Trabe y Pintar-Pintar, el de laRede de Normalización Llingüística nos conceyos y el propiu de l’asociación Reciella, con información sobre l’asociación y dellos materiales nuevos y pintacares poniendo color a la Reciella a les 12 y 16.00 hores.

PROGRAMA: DÍA DE LA RECIELLA 2014 11.00 Xuegos Medievales (Trebeyos) y Xuegos Tradicionales Asturianos (Esbilla) 12.30 Exhibición Infantil de Cuatriada Bolera del Muséu del Pueblu d’Asturies POSA y XINTA 16.00 “El cantar del vasu” Prau central 17.00 Taller d’Instrumentos Tradicionales Tendayu 18.00 Pop Piquiñín n’Acústico Tendayu 19.00 Danza Prima Prau central Amás: llibros, música, pintacares…

Per quintu añu consecutivu, la Fundación Nuberu y l’Ayuntamientu de Llangréu organicen les xornaes culturales De Castilletes y carbón. Trátase de la edición quinta d’una actividá de dinamización cultural qu’estes dos entidaes ponen en marcha como consecuencia del conveniu de collaboración firmáu ente elles. Estes xornaes culturales xiren alredor de les interrellaciones ente cine, mina, música, lliteratura, economía, gastronomía… y s’articulen nun ciclu de películes, Baxando a la Galería, una serie de ponencies sobre estos temes, Los Xueves de Castilletes y Carbón, y un conciertu del grupu Nuberu’l día de Santa Bárbara. Esti miércoles arranca la primer proyección.

D’esta forma, Baxando pa la galería ponse en marcha esti miércoles 1 d’ochobre cola proyección de la película Bernabé, primer llargometraxe n’asturianu, dirixíu por Pablo Casanueva y protagonizáu por Fernando Martínez. Bernabé va echase’l miércoles nel cine Felgueroso de Sama a les 20:00 hores, la entrada ye de baldre.

Esta película ye’l primer llargometraxe rodáu dafechu n’asturianu, xira al rodiu de la historia de la figura del míticu bandoleru llaniscu Bernabé Ruenes. Bernabé yera un llaniscu, natural del llugar de Turanzas, que nunca nun s’identificó con corrientes polítiques, yera un paisanu normal. Nel añu 1946 foi a la mili y dende esi momentu tolos acontecimientos pasaron mui apriesa. Saltó una guardia, tuvo una pelea con un soldáu y acabó viendo como un conseyu guerra lu condenaba a cadena perpetua. Pa evitar esta condena tuvo qu’echase al monte, esti fechu marcó l’empiezu de munches peripecies pela zona oriental asturiana que tovía tán na memoria de los más mayores y nes que se xunta, davezu, la lleenda cola propia realidá de los fechos.

La Organización de Muyer de SUATEA felicítase de la retirada de la reforma de la Llei del albuertu y la decisión del ministru Ruíz Gallardón de dimitir. Trátase, na so opinión, “d’una victoria algamada por toes eses muyeres que salieron a la cai en defensa de los sos derechos. El clamor popular materializóse en multitú de manifestaciones, protestes y acciones a lo llargo de toos estos meses. Les muestres d’apoyu hacia les muyeres españoles llovieron dende tolos continentes y les muestres de sororidá manifestáronse proponiendo idees p’ayudar a aquelles muyeres que quixeren interrumpir el so embarazu y la reforma de la llei-yos lo torgara”. Nonostante, en SUATEa dicen ser “conscientes que la decisión de la retirada nun se tomó por respetu al derechu a decidir de les muyeres, sinón porque pesó más l’interés polos votos. Una vez más los dirixentes d’esta sociedá patriarcal amosaron el pocu respetu que-y tienen a les muyeres, los sos derechos y les sos opiniones”. La situación resúmela SUATEA nesta fras: “Llogremos una gran victoria pero la guerra sigue. Tovía ta pendiente’l Recursupresentáu pol PP énte’l Tribunal Constitucional pola Llei del albuertu del 2010. El fallud’esti Tribunal puede suponer una modificación importante de l’actual llei en vigor. D’otru llau, ta por ver cómo se desendolca’l Proyectu de Protección a la familia anunciáu por Rajoy”.

Amás, el Ministeriu de Facienda unvió un documentu a les CCAA onde se propón el copagu por interrupciones del embarazu, polo que SUATEA entiende que “les amenazaes sobre’l derechu a decidir de les muyeres siguen abiertes”.

N’Asturies, asinamesmo, “tamos pendientes de la resolución de la ILP presentada por UPyD pela que se regula una rede d’apoyu a la muyer embarazada. Nesti casu, plantéguense falacies como que l’albuertu ye la mayor causa de mortalidá n’España, o que les mujeres que deciden interrumpir el so embarazu fáenlo por una situación de desamparu”.

El Grupu de Baille San Félix de Candás entama un nuevu cursu na so Escuela de Baille Tradicional.Les clases pa rapacinos/es (a partir de 5 años), d’una hora de llargor, van facese los vienres a les 19:15 hores nel llar de l’asociación, en La Baragaña (Candás). La sesion inaugural y la matrícula sedrán el vienres 3 d’ochobre a les 19:15 hores. El cursu dura un añu enteru y tien un preciu de 10 euros al mes.

Les clases p’adultos, d’hora y media de llargor, van facese los xueves a les 19:30 hores nel llar de l’asociación, en La Baragaña (Candás). La sesion inaugural y la matrícula sedrán el xueves 2 d’ochobre a les 19:30 hores. El cursu dura hasta’l mes de mayu y tien un preciu de 20 euros al cuatrimestre.

El Conceyu de Castrillón vieno acabante de poner en funcionamientu nesti añu 2014 el Serviciu de Normalización Llingüística, un serviciu públicu a disposición de tola ciudadanía que tien por oxetu promover y facilitar l’usu del asturianu na institución municipal y ente la vecindá castrillonense. Trátase, polo tanto, d’un serviciu pa tolos ciudadanos y toles ciudadanes, creáu pa sofitar el fomentu y la difusión de la llingua asturiana en tolos ámbitos de la vida municipal, col enfotu d’enanchar la so presencia na vida social y cultural del conceyu.

Esti Serviciu, estrenáu’l pasáu 4 de payares de 2013 y que llevaba peslláu dende xineru d’esti añu, ponse de nuevo en marcha’l pasáu 22 de setiembre de 2014 col envís d’executar el Proyectu de Normalización Llingüística del Ayuntamientu de Castrillón 2014, aprobáu por Resolución d’Alcadía’l 23 de julio del 2014, y que consiste, grosso modo, na traducción al asturianu de les publicaciones, folletos, guíes, documentos, impresos, etc. que xenere’l Conceyu hasta’l 31 d’avientu del 2014, arriendes de la traducción de la páxina web del Centru Cultural Valey.

Amás de les funciones enconmendaes por Alcadía, esti Serviciu tien tamién ente les sos funciones la d’asesoramientu, información y ayuda a particulares, empreses, asociaciones y entidaes de toa triba del Conceyu de Castrillón, en cuantes a la llingua asturiana se refier. Tamién ye función d’esti Serviciu’l fomentu del usu de la toponimia oficial del Conceyu, aprobada por Decretu en xunu del 2008.

La sede del Serviciu de Normalización Llingüística de Castrillón, dependiente de la Conceyalía d’Educación y Cultura, ta instalada na segunda planta del Centru Cultural Valey de Piedrasblancas y tien un horariu de 8 a 15:30h, de llunes a vienres. Les persones interesaes puen ponese en contactu presencialmente ente les 10 y les 15:30h, al traviés del corréu electrónicu: llingua@ayto-castrillon.es, o per teléfonu: 985530329.