asturnet

El Conceyu de Teberga y l’Asociación ARTE de Teberga (ARTE), cola collaboración del colectivu «Tebrigam Acuciosos» y de Celso Peyroux, cronista oficial oficial al que se-y dedica’l premiu, convoquen l’I Certame nacional de rellatu curtiu «Teberga, ventana d’Asturies -Celso Peyroux-», con motivu del 25 aniversariu de les Xornaes gastronómiques de seronda del conceyu.

La tema lliteraria, etnográficu, costumista, turística o gastronómica de los rellatos tendrá de tratar sobre Teberga y los trabayos van tener que tar escritos en castellán o en na variedá del asturianu propia de Teberga. Cada participante namás va poder presentar una única obra d’ente 3 y 5 fueyes de llargor.

El plazu de presentación de los trabayos ta abiertu y va rematar el 30 d’agostu. El ganador va recibir como premio una fin de selmana pa dos persones en Teberga, qu’inclúi cena, nueche n’hotel, almuerzu y xinta.

Los rellatos tendrán d’unviase per corréu postal al Conceyu de Teberga. Más información nes páxines web www.aytoteverga.org y www.tevergaturismo.com o nel númberu de teléfonu 985 76 42 02.

Bases completes del concursu

El Serviciu de Normalización Llingüística del Conceyu de L.lena presenta esti xueves 19 d’abril a les 19:30 hores el llibru Calidoscopiu de la escritora Paula Pulgar Alves, publicáu pola Editorial Trabe. L’actu va celebrase nel Salón d’Actos de la Casa de Cultura de La Pola, y enmárcase dientro del programa “Abril con bones lletres” que se dedica a escritores locales y con actividaes relacionaes cola animación a la llectura.

Calidoscopiu ye una recopilación de diecisiete cuentos, onde destaca la dureza y crueldá de los personaxes, narrao too ello con una prosa llimpia y directa.

Paula Pulgar, ye llicenciada en Filoloxía hispánica y especialista en Filoloxía Asturiana pola Universidá d’Uvieo. La so trayectoria lliteraria entama cola publicación de Primeres aventures de Pulgu y Yolín nel 2007 y El mundu de Susana nel 2008 dambos dos de lliteratura infantil. Con Cuentos de metru y de centímetru nel 2008 afítase como una de les escritores con voz propia na lliteratura asturiana más moza. Collaboradora de delles publicaciones, tamién tien fecho un estudiu sobre la escanda na zona del Güerna. Actualmente’l so llabor profesional desenvuélvelu nel ámbitu educativu como profesora de Llingua Asturiana y Española, anque tamién participó nel ámbitu de la normalización llingüística como responsable del Serviciu de Normalización Llingüística nel Conceyu Mieres.

Dende’l Serviciu de Normalización Llingüística va facese compra de llibros de l’autora col fin de que toles biblioteques y centros educativos tengan un exemplar del mesmu y pa que’l propiu Conceyu pueda usalu como regalu institucional.

Paula Pulgar inaugura con “Calidoscopiu” la imaxe nueva de la colección Incla

Suburbia Ediciones asoleya’l segundu volume de De les coses del mundu, la colección definitiva d’ensayos d’Ignaciu Llope. Nesti volume, el poeta y ensayista Ignaciu Llope, inclúi dalgunos de los los sos artículos sobre cuestiones polítiques y antropolóxiques. Esti ye un llibru con hestoria, una y bones l’autor yá usó d’esi títulu hai más de dos décades pa recoyer parte de la so obra.

Ignaciu Llope siempre pensó que De les coses del mundu yera un proyectu en marcha, y nesta edición recueye non sólo aquellos artículos inaugurales, sinón tamién tolos que, dende la década de 1980 hasta l’actualidá, foi asoleyando en mui diversos medios. El primer volume, que vio la lluz hai un añu, recoyía tolos escritos sobre celtismu y música folk, amás de los ensayos y artículos publicaos sobre’l paisaxe y la historia del conceyu de Cuideiru. Esti segundu volume ta dedicáu a los ensayos sobre política y lliteratura, con un llugar mui destacáu nél pal análisis de los problemes d’identidá cultural na zona Navia-Eo.

Esti vienres 20 d’abril, a les ocho la tarde, va presentase “Teoría de la pertenencia”, de Ramón Lluís Bande na FNAC de Parque Principáu, en Siero. Un llibru integráu por una colección de proses autónomes que mui probablemente -queda a xuiciu del llector- conformen, con una serie d’enllaces visibles y otros invisibles, una narración unitaria: la d’un personaxe ensin nome en plena tresformación, que sigue buscando les característiques principales que puedan definir la so identidá nel momentu presente.

Un llibru que foi escribiéndose con voluntá de llibru, pero con una renuncia explícita a l’arquitectura habitual de les narraciones. Teoría de la pertenencia ye una colección de textos escritos nel actu y con fecha d’entrega, que se negaron a una reescritura y desarrollu posterior, alcontrando nes sos imperfecciones, nel so abandonu, la entidá d’obra acabada.

El llibru tien un protagonista, un yo -mui cercanu al narrador- que s’escuende tres múltiples nomes en diferentes momentos de la historia y en diferentes llugares del mundu pa poder acercase a entender el so presente. Un xuegu que descubre les múltiples voces necesaries pa poder intentar desarrollar una voz personal, a la vez qu’intenta construir y integrase nuna determinada tradición cultural o creativa na que se citen escritores, cineastes, pintores, músicos… Continuando’l camín narrativu empezáu pol autor en llibros anteriores, Teoría de la pertenencia tien muncho de diariu personal, de crónica d’actualidá (social y íntima), de recuentu de llectures. En fin, una formulación nueva de les preguntes vieyes: ¿quién soi? ¿quién soi en rellación a lo que somos?

Ramón Lluís Bande (Xixón, 1972) ta consideráu como una de les voces más personales de la lliteratura asturiana. Escritor y cineasta, ente los sos títulos destaquen noveles como Les habitaciones vacies (2009), llibros infantiles comoHistoria d’un árbol (2010) o películes como Estratexa, El fulgor o Sangre. Anguaño dirixe na televisión pública asturiana, TPA, la revista audiovisual de cultura,Pieces, y la serie documental, Camín.