asturnet

La organización Iniciativa pol Asturianu llamentó fondamente la non aprobación de la propuesta d’Ordenanza pal Usu del Asturianu nel Conceyu de Noreña presentada pol grupu políticu Conceyu Abiertu. La propuesta recibió’l sofitu de Frente de la Izquierda y la organización que la presentaba, grupos a los qu’Iniciativa felicitó “pol so compromisu na normalización del idioma en Noreña”. Amosaron, sicasí, el so descontentu con IDEAS y PSOE pola so decisión de votar en contra, “que significa votar contra’l futuru del asturianu”, espliquen.

Recuerden que la formación IDEAS “lleva nel so programa la oficialidá del asturianu” y que’l PSOE “aprobó ordenances d’esti tipu n’otros conceyos como Xixón o Cangas, cuando cuntaben con mayoríes nos plenos”, polo que pa Iniciativa pol Asturianu “ye inesplicable esta negativa”.

Secretariu xeneral MSA pola oficialidá, conceyal contra la ordenanza

Destaquen dende Iniciaitva pol Asutrinau que ye “especialmente sangrín” el casu d’Unai Díaz Noval, conceyal socialista y secretariu xeneral de Mocedaes Socialistes d’Asturies, que la pasada fin de selmana aprobaba la defensa de la oficialidá como unu de los sos principios y que nesta ocasión votaba en contra de la ordenanza. Dende Iniciativa entiende “un votu en contra como una verdadera contradicción de la que tien que dar esplicaciones públiques”. La so decisión fai-yos “duldar de la veracidá del mandáu de defender la oficialidá del asturianu aprobáu pola militancia de la so organización va malapenes unos díes”, espliquen.

D’otru llau analicen “como daqué positivo” la disponibilidá de tolos grupos, menos el PSOE, a aprobar unes ordenances pal usu del asturianu, y afalen a toles formaciones “a ponese al llabor pa consensuar un testu y aprobalu lo primero posible, yá que 9 conceyales amosaron la so disponibilidá a aprobar una ordenanza d’esti tipu, frente a los namás 3 del PSOE que se ñeguen a votar a favor”.

La presidenta de l’Academia de la Llingua Asturiana, Ana María Cano González, y el responsable del programa de formación de la mesma, Xosé Antón González Riaño, aconceyaron esti xueves col presidente del Principáu, Javier Fernández, y el viceconseyeru de Cultura, Alejandro Calvo. La xunta sirvió pa facer un repasu de los asuntos xenerales al rodiu de la política llingüística, la visualización del asturianu y la situación de l’Academia.

La presentación del proyectu d’Ordenanza pal Usu del Asturianu nel Conceyu de Noreña, redactada pola formación Conceyu Abiertu nun consiguió aprobase esti xueves nel plenu caberu enantes de les vacaciones de branu. El PSOE, partíu que gobierna’l conceyu con trés conceyales y qu’aprobó n’otros conceyos ordenances asemeyaes, ya IDEAS, que tien una conceyala y lleva la oficialidá nel so programa, votaron en contra, mientres qu’Independientes por Noreña, con trés conceyales y PP, con dos, decidieron abstenese. A favor votaron el propiu conceyal que presentaba la propuesta, de CA, y el de Frente de la Izquierda, mientres que l’únicu conceyal de Foru, Inaciu Iglesias, qu’amosara la so disposición a votar a favor, nun tuvo nel que yera un plenu decisivu pal futuru del asturianu nel conceyu condal.

El plenu entamó cola presentación al traviés de la vía d’urxencia, como ye vezu na oposición por mor de les torgues que l’Alcalde socialista, César Movila, pon a la discusión de toles propuestes del restu los partíos.

Y foi l’alcalde quien entamó con torgues, nesti casu llingüístiques, yá que dixo “nun entender l’asturianu” dempués de la intervención del conceyal de Conceyu Abiertu por Noreña, Pablo Pérez Fonseca.

Tres unes poques pallabres d’esti conceyal, l’Alcalde socialista dixo lo siguiente: “Pablo, solo por inteligencia, polo menos mía, delante del asturianu, por los límites que tengo, hay algunas cosas que a mi se me escapan, o lo dices en castellano o sino voy a ser incapaz de seguir el debate”. Énte estes declaraciones, el conceyal de Conceyu Abiertu siguió cola so intervención en castellán “por deferencia a la falta de conocencia de la llingua llariega” per parte del Alcalde del conceyu condal.

Nel turnu acutáu a los partíos pa dar la so opinión sobre la propuesta, Borja Ortea Llera, del Frentre de la Izquierda dixo que la so formación esperaba que se ficiere con más tiempu esta propuesta, y anque amosó dellos desalcuerdos, anunció’l so votu a favor, anque anunció “nun quedará otra que facer cambeos na norma nel futuru”.

El PSOE diz sí en Xixón o Cangas, pero non en Noreña a unes ordenances

La vocera del PSOE amosó la so negativa a aprobar esta norma “el uso de la lengua, en este caso el asturiano, viene recogido en la Constitución, pero el uso oficial, (no oficioso, que en la calle lo usamos todos, yo la primera), esta es una competencia exclusiva del Principado de Asturias”. Pa los socialistes “la gestión documental de este ayuntamiento tendría que salir en asturiano, yo vengo con datos de lo que nos costaría esta ordenanza, solamente el coste económico de una persona dedicada a esta función sería de 49.170 euros, porque no hay ningún funcionario que pueda encargarse de esto”, esplicó. Pa los conceyales socialites “con la que está cayendo no me parece bien sacar este tipo de cuestiones” yá qu’entienden que “necesitamos recursos para otras cuestiones más prioritarias”.

PP ya IPÑ: ordenanza sí, pero non esta

Pa Independientes por Noreña esta norma “va demasiado allá”, camienten que “para apoyarlo debe empezarse por algo más sencillo”, anque reconocen que “el asturiano es algo que utilizamos todos en mayor o menor medida, es indiscutible que en Noreña se usa el asturiano”. “Estamos de acuerdo en lo básico, en una ordenanza, pero no es ésta la que nos gusta”, remataron.

María Ángeles Velasco del PP, recordó “aprobamos la Ley de Uso del asturiano, estamos de acuerdo en su promoción” pero pa esplicó que “esto implica un coste y ahora mismo no hay recursos”. “Sí estamos de acuerdo en el espíritu, pero no lo vemos como el documento idoneo”, añadiendo que “debemos mirar muchos más detalles de la ordenanza”. La conclusión de los populares ye que “no lo desestimamos, proponemos que se deje para un tratamiento más hondo y en los foros adecuados”. Asina mesmo, añadieron que “ahora mismo debemos esforzarnos en otros temas, no voy a decir de mayor calado, porque este es de calado, pero hay temas más prioritarios”.

En cuantes al otru votu en contra, el d’IDEAS, la so conceyala esplicó que “la coalición IDEAS lleva la oficialidad del asturiano en su programa pero yo también veo que esta ordenanza no me convence, sobre todo en estos momentos tan difíciles”, insistiendo na idea del PP “hay temas más prioritarios en un momento económico como este”.

Unai Díaz de la oficialidá al votu en contra

Munchos s’entrugaron ónde taba Inaciu Iglesias, conceyal de Foru y hestóricu asturianista nun día tan importante pal asturianu como’l d’esti xueves en Noreña, asina cómo poles razones que llevaron a votar en contra del asturianu al llíder de Mocedaes Socialistes d’Asturies y conceyal en Noreña, Unai Díaz Noval, que la fin de selmana pasada yera escoyíu secretariu xeneral de la so formación, qu’aprobaba llevar la oficialidá del asturianu nos sos principios, lo que facía pensar un votu a favor pela so parte a estes ordenances.

Na so intervención final, el conceyal de Conceyu Abiertu recordó munchos de los gastos que fai l’Ayuntamientu de Noreña y que podíen evitase y recordó que “nun se necesiten 50.000 euros pa desenrrollar la norma” yá que la disposición transitoria de la mesma permite esperar a la llegada de recursos, y cuntando amás cola posiiblidá de firmar alcuerdos con otres alministraciones pa evitar inversiones que’l conceyu nun pueda asumir.

Audiu del plenu

Nel plenu d’esti xueves 26 d’avientu nel Conceyu de Noreña, l’alcalde socialista Cesar Movilla dixo nun entender l’asturianu dempués de la intervención del conceyal de Conceyu Abiertu por Noreña, Pablo Pérez Fonseca.

Dempués d’unes poques pallabres d’esti conceyal l’Alcalde de la FSA-PSOE de Noreña dixo lo siguiente: “Pablo, solo por inteligencia, polo menos mía, delante del asturianu, por los límites que tengo, hay algunas cosas que a mi se me escapan, o lo dices en castellano o sino voy a ser incapaz de seguir el debate”. Énte estes declaraciones, el conceyal de Conceyu Abiertu siguió cola so intervención en castellán “por deferencia a la falta de conocencia de la llingua llariega” per parte del Alcalde del conceyu condal.

Nun ye la primer vegada que l’Alcalde de Noreña fai por impedir l’usu del asturianu nel plenu, poniendo como xida la so falta de conocencia. Tanto ye asina que’l conceyal de Foru Asturies, Inaciu Iglesias, llegó a regala-y un diccionariu d’asturianu-castellán.