asturnet

Dende’l pasáu 26 de febreru, nes aules de la Universidá Popular de Xixón, Pablo Victorero ta poniendo un nuevu cursu d’averamientu al baille tradicional asturianu. El cursu completa la ufierta formativa venceyada cola cultura tradicional asturiana, dando a conocer les variaciones, orixe y evolución de dances y bailles xunto colos distintos sentíos que s’atribúin a dambos n’Asturies.

Dende l’empiezu del cursu, trabáyase coles dos variedaes de danza tradicional asturiana (danza abierta y zarrada), deprendiendo los pasos y sintiendo distintes dances, anque centrándose en dos pa cantar y danciar: una zarrada, la danza de Les Tabiernas de Tinéu; y otra abierta, la danza de Santana de Llanes.

Al empar, practiquen los pasos fundamentales del baille tradicional: Picaos, Pasu de xota y Pasu corríu. El deprendizaxe d’estos pasos aplícase a bailles cenciellos como Los Pollos, compuestu namás por picaos y la Xota Les Tabiernas, formada namás por pasos de xota y picaos. Esta primer parte del aprendizaxe de los pasos de baille complétase cola Xerandiya de Malveo, onde se combina una parte inicial de danza con una parte a lo suelto compuesta por picaos y pasos de xotes.

Yá más avanzáu’l programa, introdúcense xotes más revesoses y otra mena de bailles cenciellos qu’ayuden a siguir el ritmu, como los bailles de xuegu’l boleru y los cachetius. Introdúcense tamién los bailles agarraos, como la gran evolución del baille na tradición a principios del sieglu XX, siempres percorriendo la xeografía asturiana d’occidente a oriente y amosando distintos instrumentos tradicionales (gaita, tambor, panderetes, panderos, castañueles…) y la indumentaria tradicional como complementu de la formación. En delles ocasiones, la sesión de clas va poder facese con instrumentos reales.

Güei, xueves 4 d’abril, a les 20.00 hores, va celebrase una charra nel chigre avilesín d’El Cafetón (Cai El Sol) p’analizar la situación actual de la llingua asturiana y pa buscar respuestes colectives dende la nuestra comarca. L’actu ta convocáu pol Atenéu N’Alfoz y va contar cola participación de Carlos Pulgar, portavoz de la Xunta pola Defensa de la Llingua Asturiana; Vítor Suárez, vicepresidente d’Iniciativa pol Asturianu; Félix Fernández, de Reciella-Families pol Asturianu; y Adolfo Camilo Díaz, escritor, xestor cultural y miembru de l’Academia de la Llingua Asturiana.

Amás, na charla tamién va participar un representante del colectivu de maestros d’asturianu.

L’Atenéu N’Alfoz ye una entidá cívica centrada nes cuestiones culturales y llingüístiques, que desendolca’l so llabor na Comarca d’Avilés. Como oxetivos iniciales tien el promover puntos d’alcuentru ente los asturianistes d’estos conceyos, esparder la llingua y cultura asturiana, reivindicando la normalización y oficialidá del asturianu y acercar l’ideariu del asturianismu a la sociedá.

L’Atenéu N’Alfoz d’Avilés, asociación de recién creación, organiza esti xueves 4 d’abril, de magar les ocho la tarde un tertulia baxo’l títulu “La llingua asturiana güei”. Na mesatarán represenantes d’Iniciativa pol Asturianu, la Xunta pola Defensa de la Llingua Asturiana, Reciella ‘Families pol Asturianu”, l’Asamblea de Docentes d’Asturianu y el xestor cultural Adolfo Camilo Díaz.

L’actividá va tener llugar n’El Cafetón (Avilés) col envís d’analizar la situación actual de la llingua asturiana y de buscar respuestes coleutives dende la comarca avilesina, según espliquen los organizadores.