asturnet

El grupu de la Izquierda Plural va presentar una iniciativa nel Congresu en defensa del Institutu Nacional d’Investigaciones Oncolóxiques, ante l’espediente que se ta embaraxando pa esta entidá.

“Si realmente, lo que se rumorea, que paez abondo creíble, dir a un espediente de regulación, realmente tamos nun solo cuestionando, por aciu los retayos, el presente, sinón cuestionando’l futuru de la investigación d’esti país. Esto desmiente les declaraciones del Ministeriu de Sanidá y del Gobiernu de qu’estos presupuestos son sociales, desmiente qu’estos presupuestos sían de la recuperación de la investigación n’España. Sigue’l retayu y sigue el retayu non solamente del presente, sinón del futuru, en materia d’investigación y sanidá”.

Izquierda Xunida va proponer que se caltenga’l presupuestu pal Institutu Nacional d’Investigaciones Oncolóxiques y que s’evite l’espediente que podría suponer un amenorgamientu de la plantiya de más d’un 10% , al desaniciase 60 emplegos d’alta calidá.

Esti dia ufríase l’avance del programa definitivu del CONGRESU DE CULTURA ASTURIANA MOZO que va cellebrase’l viniente 19 d’ochobre nel Auditoriu Príncipe felipe d’Uviéu, col enfotu d’axuntar “a persones que, nel ámbitu la cultura asturiana, dedíquense a la creación cultural y trabayen nella”.

Ente los so oxetivos tán proyectar a la nuesa sociedá la idea de qu’hai bien de xente creando y trabayando nel mundu la cultura asturiana y face-y visible esa realidá que, n’últimu términu, xenera empléu y riqueza; treslladar a la ciudadanía la evidencia de que la cultura asturiana ta arreyada a la modernidá y a les nueves tecnoloxíes (páxines web, facebook, twitter, radio, cine, televisión, productores, periódicos dixitales, mundu la escena…); motrar los cambeos enormes que se dieren nel mundu de la cultura más tradicional; evaluar l’estáu d’ánimu y les perspectives de los creadores y trabayadores mozos y la so visión de futuru; facer un repasu a la situación del empléu y la economía, de la situación de los trabayadores y de les empreses de la cultura; evaluar les relaciones económiques cola Alministración y el resultáu d’esa relación nos últimos años, asina como les perspectives de futuru.

Según l’avance del programa que se diera a conocer esti día na web y nel Facebook de la organizacióin del Congresu, con ponencies entá provisionales porque s’espera la incorporación de nuevos conferenciantes, el Congresu entamará a les 10.30 hores, dao que la inauguración ta prevista pa les 11 hores, con actu que va contar cola presencia de Xuan Xosé Sánches Vicente, en nome de la organizadora Fundación Nueva Asturies y de representantes políticos ente los que tan invitaos l’alcalde d’Uviéu, Agustín Iglesias Caunedo, y a la conseyera d’Educación, Cultura y Deporte, Ana González.

Los medios de comunicación van ser los primeros protagonistes del Congresu con ponencies sobre radio con Nacio Varillas (Radio Langreo-RPA), Xurde Morán (Cadena SER) y Kike Carballeira (Onda Cero), los nuevos realizadores y la ufierta audiovisual con Illán Gonzali, y IInternet con Fernando de la Fuente. El direutor d’Asturies.com va tar acompañáu por David Melendi, profesor del departamentu d’Informática de la Universidá d’Uviéu que va falar d’Eslema, y Xesús González, de Softastur.

La siguiente ponencia va dedicasea la música y la llingua, con ponencies de Bras Rodrigo (Banda Gaites Corvera), Aitor García (La Flor del Pumar) y Javier Pellico (Agrupación Folclórica Los Picos d’Europa). Pablo A. Quiroga falará sobre’l modelu de la productora que dirixe, Algamar, ya Inaciu Galán, va dar una conferencia sobre organizaciones de defensa de la llingua y dinamización cultural. Tres un descansu, a les 13.30 hores va principiar la serie última de conferencies con Lluis Antón González (teatru), Rafa R. Valdés (investigación y revistes) y Sofía Castañón (lliteratura). A les 14.15 hores ta previsto un alderique xeneral col que se va zarrar esti I Congresu de Cultura Asturiana Mozo.

Programa completu del COngresu de Cultura Asturiana Mozo