Castrillón inaugura so Serviciu de Normalización Llingüística

El Conceyu de Castrillón vieno acabante de poner en funcionamientu un Serviciu de Normalización Llingüística del asturianu, una oficina abierta a la ciudadanía que tien por oxetu’l fomentu del idioma na institución municipal y ente la vecindá castrillonense. Trátase, polo tanto, d’un serviciu pa tolos ciudadanos y toles ciudadanes, creáu pa contribuir al desenvolvimientu del idioma, esto ye, fomentar l’usu del asturianu en tolos ámbitos de la vida municipal en condiciones de normalidá, ameyorar el conocimientu y les actitúes sobre la llingua asturiana, y enanchar la so presencia na vida social y cultural del Conceyu de Castrillón.

Esti Serviciu, estrenáu’l pasáu 4 de payares, ponse en marcha col envís d’executar el Proyectu de Normalización Llingüística del Ayuntamientu de Castrillón 2013, aprobáu por Resolución d’Alcadía’l 10 de setiembre del 2013, y que consiste, grosso modo, na traducción al asturianu de les publicaciones, folletos, guíes, documentos, impresos, etc. que xenere’l Conceyu hasta’l 31 d’avientu del 2013, arriendes de la traducción de la páxina web del Centru Cultural Valey.

Amás de les funciones enconmendaes por Alcadía, esti Serviciu tien tamién ente les sos funciones la d’asesoramientu, información y ayuda a particulares, empreses, asociaciones y entidaes de toa triba del Conceyu de Castrillón, en cuantes a la llingua asturiana se refier. Tamién ye función d’esti Serviciu’l fomentu del usu de la toponimia oficial del Conceyu, aprobada por Decretu en xunu del 2008.

La persona responsable d’esti Serviciu accedió a la plaza pente medies d’un concursu-oposición al que concurrieron un total d’once persones. La Técnica Sociollingüística ye llicenciada en Filoloxía y Especialista en Llingua Asturiana. La sede del Serviciu de Normalización Llingüística de Castrillón, dependiente de la Conceyalía d’Educación y Cultura, ta instalada na segunda planta del Centru Cultural Valey de Piedrasblancas y tien un horariu de 8 a 15:30h, de llunes a vienres. Les persones interesaes puen ponese en contactu presencialmente ente les 10 y les 15:30h, al traviés del corréu electrónicu: llucia.menendez@ayto-castrillon.es, o per teléfonu: 985530329.