Asturnews ye la primer web asturiana n’incluyir el +1 de Google

Dende la selmana pasada, Asturnews ye la primer web informativa asturiana qu’inclúi’l nuevu botón +1 de Google, col que cualquier usuariu pue encamentar aquellos sites que considere interesantes, ayudando a los sos contactos a atopar interesantes conteníos web. La importancia de que los llectores de llingües minoritaries empleguen esti tipu de servicios ye evidente, pa facer visibles eses llingües na rede.

De mano, pa usar +1 nes resultancies del buscador, ye necesariu disponer d’un perfil de Google. Al traviés d’esti perfil podrá vese tolo encamentao, amás de poder esaniciar lo que yá non se quiera siguir suxiriendo. Esti nuevu botón, disponible nun primer momentu pa usuarios d’Estaos Xuníos al traviés de Google.com, va estendese non solo a nuevos países sinón que tamién va poder ser enfiñíu en cualquier páxina web, como ya ficiere Asturnews xusto a la manzorga, embaxu del llogotipu de la web.

El botón de +1 ye l’apueste de Google pa competir escontra’l “Gústame” de Facebook y siguir dando pasos na so nueva estratexa nel campu de lo social. Al escoyer Google +1 tará mandándose un mensaxe onde llamar l’atención sobre un conteníu que merez la pena, volviendo más sociales les resultancies de busca.