Asturies recibe menos fondos europeos pa I+D de lo que-y correspuende por volume de negociu

El conseyeru científicu de la Representación Permanente del estáu español énte la UE, Miguel Royo, afirmó ayer en Bruseles qu’Asturies recibe namás un 1% de fondos comunitarios pa Investigación y Desarrollu tecnolóxicos, menos de lo qu’había corresponde-y pol volume de negociu xeneráu pol conxuntu de les empreses de la nuestra comunidá. Royo punxo en comparanza a comunidaes como Madrid que reciben el 40 % de les ayudes o Cataluña, con un 20. Asturies namás s’aprosima a La Rioja y Cantabria.

Los datos remembrólos ayer l’asesor científicu de la representación española énte la UE nel cursu de les xornaes sobre I+D qu’entama’l gobiernu del Principáu en Bruseles col oxetivu de promover el desarrolu tecnolóxicu d’Asturies. Según estos datos les empreses del sector públicu y priváu de la nuestra comunidá recibieron en 2003 y 2004, 4,4 millones d’euros col fin de financiar proyectos d’I+D, frente a los 176 millones que recibió la comunidá de Madrid nesi periodu. Royo calculó nun 2 ó 3 por cientu, como mínimu, el porcentaxe qu’había corresponde-y a Asturies pol so volume de negociu.

L’espertu comunitariu reflexonó tamién que non ye fácil llograr acceder a estes ayudes porque pa ello desíxese l’agrupación y asociación d’empreses y organismos, y animó tanto a los empresarios asturiano como a l’administración a apostar por esi camín pa dir allegándonos al nivel d’otres comunidaes.

A estes xornaes que se celebren nel Edificiu Asturies de Bruseles, asistieron el presidente autonómicu, Vicente Álvarez Areces, asina como los conseyeros de Xusticia y Esteriores, Francisco Javier García Valledor, y d’Industria y Empléu, Graciano Torre. Xunta ellos una representación del IDEPA, de la Universidá d’Uviéu y de les principales empreses d’Asturies, ente elles Asturiana de Zinc, Aceralia, Química del Nalón, Corporación Peñasanta o Du Pont. Güei ta previsto qu’intervengan el presidente asturianu y el comisariu européu d’Economía y Asuntos Monetarios, Joaquín Almunia.