Arranca’l #FormientuEnCasaFest, con actividaes diaries de cultura asturiana

Arranca’l #FormientuEnCasaFest, con actividaes diaries alredor de la cultura asturiana dende casa, con más d’una decena d’actividaes que van llevase alantre p’animar el pasu del asillamientu de la sociedá asturiana y poner en valir la cultura asturiana.

La plataforma lliteraria Formientu.com pon en marcha estos díes y coincidiendo cola aisllamientu de la población pola mor del andanciu de coronavirus, un ciclu cultural embaxo’l títulu #FormientuEnCasaFest. La idea d’esti festival virtual ye ufrir a la xente actividaes lliteraries y culturales que valgan pa face-yos pasar el tiempu d’esti enzarru nes cases y poner en valir la importancia de la cultura asturiana y la llingua asturiana nun momentu como esti.

El festival tien previstes actividaes dende esti miércoles 18 y hasta’l llunes 30 de marzu, anque la idea ye siguir ampliando programación mientres dure la cuarentena nes cases y en función del ésitu de la convocatoria. Les actividaes van facese al traviés de cámara web y en directo dende les cases de los protagonistes de cada actividá,

Nun videu emitíu esti martes, los coordinadores d’esti #FormientuEnCasaFest, Inaciu Galán, de Cuatro Gotes Producciones, que xestiona Formientu.com, y Diego Solís, codirector de la revista Formientu, anunciaron los conteníos d’esti festival lliterariu y cultural que se pon en marcha gracies a la collaboración de les persones moces de la cultura que de forma desinterasa se sumaron a esta convocatoria.

Ente la programación qu’arranca esti miércoles 18 con un recital del propiu Diego Solís, van celebrase charres sobre teatru, wikipedia o lliteratura con autores como Alba Carballo, Víctor Suárez o Sergio Buelga, conciertos de pequeñu formatu con Silvia Quesada, María Llatrores, Antón Martínez o’l llionés Fran Alegre y cuentacuentos con Maggy, presentaciones de llibros, como la del nuevu llibru d’Inaciu Galán, y otres actividaes que yá se concretaron nun calendariu fechu públicu güei, y que podrá ampliase según avance’l procesu d’asillamientu.

L’enllaz nel que van poder vese les actividaes ye’l siguiente: https://www.facebook.com/formientu/