Areces ta dispuestu a “retocar” los fondos previstos pal Salariu Social

El presidente del Principáu, Vicente Alvarez Areces, amosó güei na segunda xornada del debate del estáu la rexón, la so disposición a ‘retocar’ los fondos previstos pa la puesta en marcha del salariu social, tal y como-y pide IX, en casu de que nun se cubrieren toles necesidaes de les families en situación de probeza que demandasen esta prestación. Esti tema fue quiciás el puntu más importante y más esperáu por toles partes nel debate, yá qu’amenaza dende va tiempu la relación del gobiernu en coalición.

Na so replica nel debate del estáu de la rexón a la intervención de la portavoz d’IX, Noemí Martín, Areces pidió ‘rigor’ y ‘prudencia’ pa evitar qu’esta cuestión se vuelva ‘un elementu de fricción fundamental’ y se reste valor a ‘un gran esfuerzu’ na llucha contra la esclusión social. El xefe del Executivu reiteró la so intención de da-y cumplimientu al alcuerdu de concertación firmáu con sindicatos y empresarios que ponía’l llímite presupuestariu pal salariu social en 60 millones d’euros nos sos primeros cuatro años de vixencia. Asinamesmo, emplazó a Martín a nun facer ‘esi exerciciu’ de dicir, tal y como ficiere la portavoz d’IX, que se quiten fondos d’otros proyectos ‘porque eses iniciatives xeneran riqueza’ y, sorrayó, ‘ensin crear riqueza nun se pue repartir solidaridá’.

No tocante a la llingua, Areces llimitóse a felicitase pol Plan de Normalización Social del Asturiano, por ser ‘un avance, al travies del consensu de la sociedá, partiendo dende la base de la voluntariedá’. Y esi avance vese, sigún el presidente, nos ‘ciento sesenta profesores d’asturiano qu’hai nel nuestru sistema educativu’. Areces pidió qu’esti tema se despolitice y se ‘soporte con normalidá ensin provocar crispaciones ente la sociedá’.

Na so intervención na segunda xornada del debate de la rexón, Ovidio Sánchez (PP) ofreció una batería de datos que contradicen ‘sustancialmente’ la perspectiva ofrecida ayeri por Areces, basada, al so xuiciu, en ‘mentires’ que’l presidente rexonal ‘aporfia machaconamente en tratar colar’ nos sos discursos. Sigún el dirixente popular, qu’acusó a Areces d’actuar ‘como un vendedor de feries’, Asturies nun supo aprovechar ‘el contestu económicu nacional boyante’ deriváu de los ocho años de xestión del PP pa ‘xubise al carru’ de les comunidaes más prósperes. A lo qu’Areces respondió ensiñando los datos de les últimes actuaciones del gobiernu en comparanza col gobiernu del PP, polo que acusó d’’hipócrita’ l’actitú de la oposición nes sos valoraciones.