Areces descarta la oficialidá n’Asturies pa otra llingua que nun sea l’español

El presidente del gobiernu asturianu Vicente Álvarez Areces descartó qu’ente les intenciones de la so llinia política tea la de declarar la cooficialidá na nuestra comunidá autónoma. Areces inxertó diverses consideraciones personales sobre la realidá llingüística d’Asturies na respuesta a una de les preguntes que los informadores-y ficieron esti miércoles 15 en Madrid alrodiu de la polémica entamada col BNG pola propuesta de nuevu estatutu pa Galicia d’esti partíu.

Preguntáu sobre la posibilidá recoyida nel testu de los nacionalistes gallegos de que la comunidà vecina pida a otres comunidaes la cooficialidá del gallegu nel so territoriu el presidente del Principáu descartó “la posibilidá de contemplar la cooficialidá en zones asturianes” y afirmó: “Nós tenemos un idioma que ye l’Español, el Castellano, como quieran nomalo, y tenemos tamién nel nuestru Estatutu d’Autonomía el Bable o Asturiano, que pretendemos promover el so uso y la so difusión, porque forma parte del nuestru bagaxe cultural”. Areces añadió que “l’Asturiano, amás, tien modalidaes llingüístiques que formen parte de fales o maneres de falar en dalgunes zones d’Asturies, onde, evidentemente, hai raigones llingüísticos d’otru tipu”, pa a renglón siguíu recalcar que “nun consideramos políticamente acertao el da-y una denominación de cooficialidá y poro esa ye la nuestra opinión”.

Una opinión que calificó de “respetuosa y de la que dixo que “amás, creo coincide cola de la inmensa mayoría de los asturianos que se sienten fondamente asturianos nesos conceyos limítrofes, que falen lo que veníen falando siempre y que nun quieren nenguna guerra d’esi tipo, porque me parez una guerra d’una esterilidad absoluta y d’un planteamientu que nunca enantes se formulara, y que nun van añadir nada si se formula agora”.