El gastu añal mediu en cultura xorrez hasta los 260 euros per persona

El gastu añal mediu de los españoles en cultura creció en 2015 hasta los 260,4 euros per persona (frente a los 260,1 euros del añu anterior), lo que supon la primer xubida nesti apartáu tres seis año de cayíes, según datos recoyíos del Anuariu d’Estadístiques Culturales del Ministeriu d’Educación, Cultura y Deporte.

Esti anuariu inclúi datos hasta 2008, cuando’l gastu mediu por persona yera de 372,1 euros. De magar, l’informe rexistra una cayida de más de cien euro nel gastu mediu mientres los siguientes seis años, hasta l’añu 2015, que se frenó’l descensu. El gastu total en cultura n’anguaño ye de 11.968 millones d’euros, cinco millones más que l’añu anterior.

L’informe enceta otros apartaos, como por casu el volume d’empléu cultural, qu’algamó en 2015 a 515.000 persones, un 2,9% del empléu total n’España na media del periodu añal, lo que supon una medría al respective de les 511.800 persones emplegaes nel sector cultural en 2014.

En 2015 el númberu d’empreses con actividá económica principal venceyada a la cultura foi de 112.037, el 3,5% del total d’empreses recoyíes nel Directoriu Central d’Empreses ellaboráu pol Institutu Nacional d’Estadística (INE). Del total, el 78,6% son empreses con actividaes de la industria o los servicios y el 21,4% restante tán venceyaes al comerciu o arriendu de bienes culturales.

Tocantes a propiedá intelectual, la cantidá recaldada poles entidaes de xestión en 2015 xubió a 356,5 millones d’euros, un 2,2% más al respective de 2014. Según el tipu d’entidá, el 73,5% de la recaldación ye d’entidaes de xestión de derechos d’autor, el 14,7% d’entidaes de xestión de derechos d’artistes, intérpretes o ejecutantes y el 11,8% d’entidaes de derechos de productores.