Los Premios Impulso TIC d’educación viaxen a Uviéu, Siero y Sotrondio

Los Colexos San Ignacio d’Uviéu, El Carbayu de Siero y el IES Juan José Calvo de Sotrondio ganen el Premiu Impulso TIC d’educación.

Esti llunes  diéronse a conocer los ganadores de la categoría d’educación de los Premios Impulso TIC que conceden añalmente los Colexos Profesionales d’Inxenieros Informáticos ya Inxenieros Técnicos Informáticos d’Asturies. En total reconocen cinco categoríes: ámbitu social, empresa, social, mención especial y educación. Nesta quinta edición premióse a los Colexos San Ignacio d’Uviéu, CEIP El Carbayu de Siero y el IES Juan José Calvo Miguel de Sotrondio.

El primer premiu recayó nel Colexu San Ignacio pol proyectu “Incorporación de los sistemes GPS n’Educación Física”. Alumnos de 3º y 4º de secundaria utilicen l’aplicación gratuita “Endomondo” descargada nos sos móviles pa desenvolver les sos clases d’educación física y percanciar datos como distancies, desniveles, tiempos o ritmu de carrera. Per otru llau los alumnos asumen un retu na asignatura que consiste n’atropar 5.000 Km en tres meses cola ayuda de compañeros y familiares que van sumando los sos kilómetros a la iniciativa. El cursu pasáu’l colexu consiguió arreyar nesta actividá a 450 persones y sumar la distancia de 5.800 Km. percorríos. Ensin dulda correr nun foi lo mesmo pa los alumnos desque utilicen esta ferramientes según los sos profesores.

El segundu premiu reconoz el proyectu Cooperativa periodística” del CEIP El Carbayu. Los alumnos de 5º y 6º de primaria formen una empresa” en forma de cooperativa y editen el so propiu periódicu dixital “Les Bellotines”. Al traviés de les TIC y del proyectu Cooperativa periodística, los alumnos toquen de forma trasversal otres asignatures como matemátiques, ciencies sociales o la mesma llingua. Editen y caltienen el so propiu periódicu dixital utilizando la plataforma finlandesa Magazinefactory. Pa los promotores de la idea nel colexu, ye una fórmula más pa caltener motivaos ya implicar al alumnáu y qu’entienda l’usu de les TIC dende la educación.

El tercer premiu reconoz el llabor del IES Juan José Calvo Miguel. L’equipu de profesores del centru diseñó una aplicación que se denomina “Empleáte” col oxetivu principal de poner en contactu a los alumnos del centru coles empreses de la redolada, el Infojobs local pero solu p’alumnos del institutu. Les empreses rexístrense y xuben ufiertes d’emplegu y de la mesma pueden consultar los curriculum de los alumnos o inclusive videos grabaos y xubíos por ellos mesmos. Otra de les funcionalidades d’esta ferramienta ye ufiertar información sobre convocatories d’empléu públicu o beques. Collaboraron nel diseñu de l’aplicación dos alumnos del ciclu formativu de Grau Superior de Desenvolvimientu d’Aplicaciones Multiplataforma que presentaron el trabayu como un proyectu de fin de ciclu formativu. Nesti momentu tán trabayando nel agospiamientu d’esti portal de trabayu, pasu definitivu pa ponelu en marcha.

Con esti fallu complétase la nómina de galardonaos colos Premios Impulso TIC 2015 que se van apurrir nel intre d’una cena esti vienres 13 de noviembre nel Restorán Somió Park de Xixón.