El proyectu ‘Monte y Valle’ gana’l concursu d’idees para’l Bulevar de Santuyano d’Uviéu

El proyectu ‘Monte y Valle’ vieno acabante ganar el concursu d’idees para’l Bulevar de Santuyano d’Uviéu. El diseñu de David Gistau y Miguel Ángel Tejada propón  una gran llaguna y un nuevu parque na redolada de Santuyano que protexe la xoya prerrománica.

L’equipu ganador va recibir un premiu metálicu de 10.000 euros y va poder redactar el desenvolvimientu y ordenación de la so propuesta.

La Mesa Xuráu de Proyectos para la reordenación del Bulevar de Santuyano escoyó esta selmana les propuestes ganadores. El proyectu tituláu ‘Monte y Valle’, redactáu polos madrilanos David Gistau (Xestión Integral del Suelu) y Miguel Ángel Tejada (Eslava y Tejada Arquitectos), llogró la puntuación más alta con 74,49 puntos. El diseñu escoyíu incluyi una gran llaguna que crea un nuevu parque na redolada de la ilesia prerrománica de Santuyano para protexela. El xuráu destacó amás la separación de los tráficos que realiza, xenerando un espaciu más ricu y un discursu únicu de continuidá.

El procedimientu alministrativu pasa agora pola comprobación de que les empreses ganadores tán al corriente de les sos obligaciones de pagu cola alministración y darréu la Xunta de Gobiernu va tener qu’aprobar la decisión de la Mesa. La empresa va presentar entós tola documentación para acreditar que tien la solvencia técnico y económico esixíes y a partir d’ende va disponer d’un plazu de trés meses para la redacción del proyectu d’ordenación de la so propuesta con un preciu máximu del contratu de 400.000 euros.

La Mesa xuráu escoyó seis de los dolce propuestes presentaes. El segundu llugar ocupolu ‘El Bulevar y los praos’ del estudiu Burgos y Garrido Arquitectos de la que’l xuráu resaltó la guapura de l’alamea proxectada porque convida al percorrer la ciudá  de la qu’alloña el tráficu de Santuyano. La idea “B3850455” diseñada por Francisco Mangáu ocupa la tercer posición pola so cencellez y la so viabilidá económica.

Los trés primeros clasificaos van recibir un premiu metálicu de 10.000 euros. Los accésit, dotaos con 4.000 euros, recayeron en ‘Metamorphosis’, ‘Confluencias’ y ‘Texendo Barrios’ qu’ocuparon de la cuarta a la sesta posición, respectivamente.