‘Treslallende’ presentóse n’Uviéu de la mano de Chema Vega y Pablo Rodríguez Alonso

Redacción.

Esti vienres pasáu presentóse nel Club de Prensa de La Nueva España’l poemariu a dos manos escritu por Carlos Suari y Berto García. Nel actu Chema Vega fizo un percorríu más personal del so contactu colos autores falando del papel de los autores en rellación con que ye y cómo quieren que seya Asturies.

L’otru presentador, Pablo Rodríguez Alonso, fizo una crítica lliteraria más estricta, sorrayando coses como’l calter cinemáticu del poemariu, faló de Berto “en terminos de cenciellez, simbolismu y llucha” y de Suari resaltando“la radicalidá formal y argumental y un gran dominiu del idioma”.

Darreu, los autores falaron d’aspeutos más íntimos y anecdóticos de la creación del poemariu, pa facer dempues, tanto los presentadores como los autores, una ronda de llectures, na que Bras Rodrigo tocó a la flauta y la gaita, con una serie de pieces compuestes pal poemariu sobre les que García y Suari siguieron lleendo eses pieces, que los autores comenten “podríen formar un discu nel futuru”.