Sociedá XEGA y Tribades convoquen una concentración en Bimenes pa protestar pola agresión del 22 d’ochobre by asturnet 6 de payares, 2006 XEGA y Tribades convoquen pal sábadu 11 de payares, a les 13,00 hores, una concentración delantre la Casa Conceyu de Bimenes en protesta poles agresiones homófobes del 22 d’ochobre en Martimporra. Esi día una pareya de llesbianes foi insultada y agredida en Martimporra pol fechu de “nun tapecer la so afectividá”. Dos de les sos amigues, que fueren a da-yos sofitu, tamién fueren agredíes. Pa dir a la concentración XEGA y Tribades van poner autobuses dende Xixón y dende Uviéu. XEGA 6 de payares, 2006 0 FacebookTwitterPinterestEmail
Sociedá L’Abertal reta a l’Academia a demostrar la non filiación llingüística del gallego-asturianu col gallegu by asturnet 6 de payares, 2006 L’asociación cultural Abertal, presidida pol académicu non numerariu de la lengua gallega, Carlos Xesús Varela Aenlle afirmó que l’estudiu de l’Academia de la Llingua Asturiana nun ye otro más qu”un cartafueyu ridículu ensin rigor científicu”. Varela afirmó que “l’usu del gallego n’Asturies ye porcentualmente mui superior al asturianu”, fechu estadísticu reconocíu nos diferentes estudios sociollingüísticos desenvueltos n’Asturies . Pa l’asociación de defensa de la galleguidá llingüística del Navia-Eo “la tutela llingüística que l’Academia de la Llingua Asturiana na zona llende con Galicia y col norte de Lleón” ye tamién oxetu de protesta. L’asociación cultural Abertal retó a l’Academia a “amuesar cientificamente que lo que se fala nel Navia-EO nun ye una variante del gallego, porque ya se convirtieron col tiempu na risa de tola llingüística internacional”, afirmó Carlos Valera. 6 de payares, 2006 0 FacebookTwitterPinterestEmail
Sociedá L’Academia de la Llingua presentó’l “Informe sobre la fala o gallego-asturianu. Una perspeutiva hestórica, social y llingüística” by asturnet 3 de payares, 2006 L’Academia de la Llingua presentó esti xueves, en rueda de prensa, l'”Informe sobre la fala o gallego-asturianu”, un estudiu sobre la realidá llingüística y social de la fastera más occidental del país. L’Academia presentó esta obra como’l material de referencia en política llingüística pa esta zona, a la par de valir como preséu divulgativu, dao que ta avaláu por bien d’historiadores, filólogos, o sociólogos. Como material de referencia pa la política llingüística nel territoriu d’Entrambasguas l’ALLA unvió l’Estudiu a toles cases conceyu de la zona, Gobiernu d’Asturies, presidencia de la Xunta Xeneral, Grupos Parlamentarios, y demás actores implicaos nel procesu normalizador. L’Estudiu afita la posición de l’ALLA sobre la llingua eo-naviega como “llingua propia d’Asturies, que caltién elementos comunes col asturianu y col gallegu, amás de tener elementos independientes”. A esti respectu l’Academia de la llingua esixó los máximos derechos pa los y les falantes d’esta llingua, esixendo que l’asturianu sía la llingua oficial d’Asturies y l’eo-naviegu idioma cooficial nel so ámbitu de referencia. Afitando que “nun ye entendible una reforma -del estatutu- que nun prevea la cooficialidá del idioma”. Ana Cano esplicó que l’actuación inxértase dientro de los mandatos de l’Academia, nos que s’afala a que la institución curie de los derechos de los falantes d’esta llingua. Pa l’Academia de la Llingua “los intentos d’inxerencies de tipu llingüísticu y políticu sobre esta zona son evidentes” y dende’l gobiernu asturianu “nun siempre se respondió cola firmeza que debería, llegando en casos a respuestes tibies”. Pa l’Academia de la Llingua d’esistir un marcu lexislativu similar al del restu de llingües d’España estes inxerencies nun se produciríen. Dende 1996 l’Academia creó la Secretaría del Navia-Eo que vien desenvolviendo un llabor normalizador na fastera más occidental d’Asturies. L’Academia de la Llingua vien capacitando al profesoráu de gallego-asturianu dende l’añu 2001, faciendo cursos d’alfabetización en gallego-asturianu, asina como espublizando bien de trabayos sobre las realidá llingüística d’esta zona. L’Informe afita l’asturianidá llingüística, histórica y social de los habitantes del Navia-Eo, reclamando mídies educatives y de “discriminación positiva” pa los y les falantes de la fala del Navia-Eo 3 de payares, 2006 0 FacebookTwitterPinterestEmail
Sociedá Un estudiu Eclesial esixe la solución del conflictu llingüísticu by asturnet 3 de payares, 2006 El documentu “Materiales de reflexón en torno a la reforma del Estatutu” fechu pol departamentu de Sociolóxía, Estadística ya Informática del Arzobispáu d’Uviéu afita la voluntá de la Ilesia asturiana p’algamar “un verdaderu avance nel autogobiernu y l’afirmación d’Asturies”. El documentu desarrolláu por José Ramón Álvarez, director del Departamentu de Socioloxía, Estadística ya Informática del Arzobispáu; y José Manuel Padilla, profesor de Soicioloxía y Doctrina Social de la Ilesia; expresa la posición de la Ilesia sobre la reforma estatutaria asturiana. La cuestión llingüística ye ún de los temes trataos nel documentu, afitando la conveniencia de la resolución de la cuestión llingüística, “continuamente aparcada polos partíos mayoritarios -PSOE y PP- y dexada al socaire de presuntos intelectuales veníos de Dios sabe onde”. Pa los autores la situación legal de la llingua asturiana ha ser resuelta na próxima reforma del Estatutu “tando en xuegu un elementu fundamental de la identidá de nueso” y qu’amás “cuenta con más sofitu social que la televisión autonómica”. Nel documentu crítícase la “covandoguización” del sentimientu d’asturianidá, falando d’esti como una “pose d’escaparate”. Pa los autores el problema asturianu “ye anguaño sentise y afirmase no que se ye, un pueblu con identidá propia, y qu’ha superar actitues superficiales”. Nesti sentimientu’l documentu de la Diocesis nun elude incluyir a Asturies ente les naciones del Estáu, sicasí matizando que n’Asturies l’independentismu nun ye relevante” y que nin los partíos nacionalistes proponen desvincular Asturies del Estáu español. Un de los puntos de los “Materiales de reflexón en torno a la reforma del Estatutu” ye la solidariedá, nello fálase d’una Asturies solidaria, pero que tamién necesita de la solidariedá de los demás, per ensin renunciar a la so identidá o reduciéndola -la identidá- a denominaciones como Principáu, Premios Príncipe. El textu aborda’l debate estatutariu dende’l debate sobre’l tipu d’Estáu que necesita Asturies, l’ampliación de niveles competenciales o la financiación autonómica. Pa ello piden un debate abiertu y nel que se pueda criticar, y proponer alternatives, al modelu d’Estáu actual “¿Nun tenemos por qué dar por supuestu que l’actual modelu ye’l meyor y nun almite cambeos? ¿por qué s’evita la posibilidá d’un Estáu federal o confederal?”. Pa los autores del textu “la unidá del Estáu español nun ye dalgo a sacralizar o confundir col bien moral” -en clara referencia a los documentos de la conferencia episcopal española sobre la cuestión- “nin ye aceptable absolutizar los deseos de cualaquier otra nación”, nesti apartáu faese una referencia a Croacia, país dixebráu de l’antigua Yugoslavia col sofitu esplícitu de la Ciudá del Vaticanu, “escaeciéndose del principiu de solidariedá”. Pa finar José Ramón Álvarez y José Manuel Padilla faen referencia a que “cuando acabe’l procesu nun mos alcontremos con Estáu diferente al d’anguaño, un Estáu plurinacional de corte confederal”. Sicasí los autores aclaren que “los modelos d’Estáu tampoco son inmutables”. 3 de payares, 2006 0 FacebookTwitterPinterestEmail
Sociedá La Pita de la Xunta nel escañu los acusaos by asturnet 3 de payares, 2006 Esti vienres día 3 de payares nel Xulgáu de la Pola (Siero) fízose’l xuiciu a los 6 militantes de la Xunta pola Defensa de la Llingua denunciaos tres la inauguración del Centru de Salú de Llugones. Na vista xudicial los militantes de la Xunta pola Defensa de la Llingua Asturiana contestaron a les preguntes utilizando l’asturianu, ensin qu’hubiere nengún problema por ello. Entamó’l xuiciu cola declaración del denunciante, miembru de les fuerces de seguridá del Estáu y qu’identificara a los activistes llingüísticos, qu’afirmara que “na inauguración del Centru de Salú de Llugones apaecieron 6 mozos, ún d’ellos con un disfraz de gallina, interrumpiendo’l discursu”, amás el denunciante citó que l’apaición de los miembros de la Xunta fuere por “sorpresa” y que s'”interrumpiera’l discursu que se taba pronunciando”. Los denunciaos afirmaron que si bien hebo glayíos de conteníu críticu cola xestión política del gobiernu asturianu nunca “nun hebo voluntá de detener l’actu” asina como que nos menos de cinco minutos que tuvieren presentes la so actividá foi vista polos asistentes al actu como lúdica “los neños veníen coles madres a tocar a la Pita” Como testigu de la defensa compareció’l Conceyal de Deportes del Conceyu de Siero corroborando la versión de los denunciaos y negando que nesi intre se tuviere desenvolviendo nenguna actividá dende l’escenariu previstu. Depués de les declaraciones la fiscalía pidió una pena de 20 díes de multa a razón de 6 por día basándose nel Art. 663 del Códigu Penal, l’abogáu del Principáu, presente como acusación particular, sumóse a la propuesta de la fiscalía. Esteban Intialgo, abogáu de los militantes de la Xunta pola Defensa de la Llingua, esixó l’absolución basándose en delles sentencies del Tribunal Supremu qu’afiten que nun se pue considerar qu’hubiere alteración del actu dao qu’esti en nengún momentu fuere deteníu. La sentencia definitiva conoceráse nun plazu de quince díes 3 de payares, 2006 0 FacebookTwitterPinterestEmail
Sociedá El Conseyu Políticu d’Izquierda Xunida decidió los 6 primeros puestos de la Candidatura a la Xunta Xeneral by asturnet 2 de payares, 2006 El coordinador xeneral d’Izquierda Xunida, Jesús Iglesias, encabezará la candidatura a la Xunta Xeneral pola circunscripción central del país.El Conseyu Políticu d’Izquierda Xunida decidió esti llunes la composición de los primeros puestos de la candidatura de la coalición a la circunscripción central. La llista presentada pol sector “oficial” de la coalición inclui a Jesús Iglesias, coordinador xeneral de la coalición; Francisco Javier García Valledor, Conseyeru de xusticia, seguridá pública y relaciones esteriores; Noemí Martín, diputada na Xunta Xeneral y secretaria Xeneal del PCA; Aurelio Martín, diputáu na Xunta Xeneral y vicepresidente de la mesma; Diana Camafeita, diputada na Xunta Xeneral y a Emilia Vázquez, profesora de la Universidá d’Uviéu y militante de Lliberación, que sustituye a Paloma Uría como representante de Lliberación nes candidatures d’Izquierda Xunida. A la votación de les candidatures el denomináu “sector críticu” d’Izquierda Xunida presentó una llista alternativa compuesta por miembros de la coalición de la antigua dirección de la organización en L.lena -y qu’acababa de ser sustituida por una xestora-. Esta llista algamó 25 votos favorables mientres que la mayoritaria algamaría 67, amás d’ocho votos en blancu y un votu nulu. En base a esti resultáu representantes del sector críticu reclamaron dos puestos ente los 6 primeros puestos de salida de la candidatura; la dirección d’IU consideró que la llista nun se diba “votar a cachos y que poro quedaría como taba”. Pela so parte’l Bloque por Asturies, partíu políticu que concurriere a les elecciones de 2004 en coalición con Izquierda Xunida, anunció’l restablecimientu de les negociaciones con Izquierda Xunida de cara a la reedición del pactu electoral de 2004. 2 de payares, 2006 0 FacebookTwitterPinterestEmail
Sociedá IAS anuncia les conversaciones con Andecha y Los Verdes by asturnet 31 d'ochobre, 2006 La Dirección Nacional d’Izquierda Asturiana fizo públicu un comunicáu nel que se comunica la esistencia de conversaciones, pa presentar una candidatura a les elecciones de 2007, ente Andecha Astur, Los Verdes y Izquierda Asturiana. Según la Dirección Nacional d’IAS “les fuerces coinciden en que ye interesante y necesario iguar un alcuerdu políticu que supere los escenarios de cites electorales anteriores”. L’oxetivu d’estes negociaciones sedríen “ufiertar a la sociedá un proyectu d’izquierda, verde y asturianista”. Pa esti oxetivu los tres partíos tienen un entamu d’alcuerdu nel que los sos principales puntos, per un llau pautar un programa electoral basáu nes aportaciones de los tres partíos “con un claru calter d’izquierdes, verde y d’identidá nacional”; per otru, presentase a les elecciones del 2007 baxo un nome común y con un candidatu consensuáu poles trés fuerces politiques. Sicasí la Dirección Nacional d’Izquierda Asturiana fizo un llamáu a la “responsabilidá y a la madurez política” de les otres partes de la negociación. Esti llamáu de la Dirección Nacional d’IAS vendría a dar un puntu d’atención a los comentarios sobre les posibles negociaciones ente Los Verdes y Izquierda Xunida. Estes conversaciones supondríen, pa IAS, “allargar la llaceriosa situación d’anguaño”. Poro IAs afala “a facer posible una alternativa realmente seria, ambiciosa, verde y asturiana” Noticies venceyaes: La Xunta Executiva d’Andecha Astur confirma negociaciones con Izquierda Asturiana Andecha mantién contactos electorales cola Mesa por la Unidad de Los Verdes Más información 31 d'ochobre, 2006 0 FacebookTwitterPinterestEmail
Sociedá L’Academia de la Llingua Asturiana va presentar un estudiu sobre la fala o gallego-asturianu by asturnet 31 d'ochobre, 2006 L’Academia de la Llingua Asturiana va presentar, esti xueves 2 de payares a les 12 nel Hotel Principado d’Uviéu, l’Informe sobre la fala o gallego-asturianu. Una perspectiva hestórica, social y llingüística. L’Academia presenta esti informe “darréu de los intentos de dello sectores del galleguismu políticu y cultural pa interferir na política llingüística del Principáu d’Asturies”. L’Academia afita nesti informe la so posición llingüística, social y cultural sobre la fastera más occidental, “aclarando dellos tópicos y falsedaes”. Piésllase’l documentu con unes conclusiones y propuestes que quieren ser de “referencia pa la política cultural n’Asturies”. La presentación va tar a cargu de la Presidenta de l’Academia de la Llingua Asturiana, Ana Mª Cano, y del responsable de la Secretaría Llingüística del Navia-Eo, el tamién académicu Xosé Antón González Riaño. 31 d'ochobre, 2006 0 FacebookTwitterPinterestEmail
Sociedá Presentáronse 30 alegaciones a la propuesta toponímica de Siero by asturnet 30 d'ochobre, 2006 Les alegaciones a la propuesta de la Xunta de Toponimia sobre’l nomenclator del conceyu de Siero afecten principalemte a les propuestes de Carbaín, Mucó y La Peña’l Gatu, asina como la de “Valbona” pa la parroquia de Bobes. Depués d’acabar el periodu d’alegaciones, en payares entamaráse cola revisión del espediente p’analizar les alegaciones individualmente. L’ayuntamientu de Siero cuenta con poder aprobar la propuesta enantes d’acabar l’añu. El topónimu más cuestionáu foi’l de Carbaín. La Xunta de Toponimia suxería que la parroquia de Santa Marta de Carbayín pasare a denominase Santa Marta sólo. Asina como la propuesta pa que la forma Carbaín s’emplegara nel nomenclator pal llugar de Carbayín Altu, que s’alcuentra na parroquia de Santiago d’Areñes. La denominación del pueblu de Muncó, que na propuesta de la Xunta de Toponimia ye Mucó, ye tamién otra de les más discutíes. La denominación de la parroquia de Bobes, pa la que la Xunta de Toponimia propuso la denominación de Valbona faese tamién revesosa dao que lo mesmo Bobes que Valbona son dos nucleos de la mesma parroquia. Sobre la propuesta de la denominación de la urbanización de La Fresneda, según la propuesta La Peña’l Gatu, les alegaciones céntrense en pedir la doble denominación pal aria. L’ayuntamientu de Siero difundirá la restitución de la toponimia asturiana mediante la publicación d’un cartafueyu, nel que s’incluirá’l nomenclator oficial del conceyu asturianu con un mayor númberu de topónimos. En payares, la Conceyalía de cultura volverá aconceyar cola Xunta Asesora de Toponimia cola fin de revisar les alegaciones asina como convocar a les persones alegantes pa que puedan aportar les sos argumentaciones. La conceyalía de cultura tien previsto que les futures urbanizaciones y nuevos llugares y pueblos del conceyu, que ye un de los que más medra poblacionalmente del país, adopten la toponimia asturiana pa la so denominación. Noticies relacionaes 30 d'ochobre, 2006 0 FacebookTwitterPinterestEmail
Sociedá L’Arribada 2006 continúa nel Xovellanos by asturnet 26 d'ochobre, 2006 Depués de cuatro díes d’intensa actividá, la coleición de Cuentos del Concursu de la Tertulia de El Garrapiellu abrió’l xueves los actos de l’Arribada 2006 nuna xornada na que’l cine foi tamién protagonista de la man de Ramón Lluis Bande. La Sala de Conferencies del Antiguu Institutu de xixón acueye güei la quinta xornada de l’Arribada 2006, cola presentación de les últimes obres de la coleición de narrativa asturiana de la editorial Ámbitu, que contará cola presencia de Ramón Lluis Bande, Henrique Facuriella, Vanessa Gutiérrez, Miguel Rojo y Pablo Texón. A les 18 hores, preséntase Historia breve d’Asturies, de Pilar Sánchez Vicente, cola presencia de l’autora y de Xosé María Vega Blanco. A les 19 hores, dientru del marcu Nuevos rumbos de la lliteratura asturiana: la mar lleerá Xuan Xosé Sánchez Vicente la so ponencia Mar, costes y homes na lliteratura asturiana; y a les 20 hores, desenrollaráse la Mesa redonda sobre esti tema formada por Ignaciu Llope, Xandru Martino, Xurde Morán y Xuan Xosé Sánchez Vicente. 26 d'ochobre, 2006 0 FacebookTwitterPinterestEmail