Sociedá La Xunta pola Defensa de la llingua del Suroccidente entama’l II Alcuentru d’Escritores n’asturianu occidental by asturnet 29 de payares, 2006 La Xunta pola Defensa de la Llingua Asturiana nel Suroccidente entama pa los díes 2 y 3 d’avientu’l so II Alcuentru d’Escritores n’Asturianu Occidental. Les sesiones del Alcuentru desenvolveránse nel Teatru Conde Toreno de Cangas. El filólogu, y miembru de la Xunta pola Defensa de la Llingua, Fernando Álvarez Balbuena va entamar los Alcuentros cola conferencia titulada “¿Yía normal escribir na variedá occidental de la l.lingua? Propuesta dunas pautas ortográficas integradoras ya suplementarias a la normativa oficial”, la ponencia esplora les posibilidaes que permite la normativa de l’Academia de la Llingua pa escribir na variante occidental del idioma. Vicente García Oliva falará sobre la historia de la lliteratura nel asturianu occidental nuna conferencia titulada “Nel principiu fue’l cuentu”. Hector García Xil, filólogu, espondrá la so conferencia sobre “La deturpación de la llingua en Cuentos del Sil”, nesta conferencia Hector Xil comentará los diferentes estilos ortográficos nesta monografía sobre los cuentos de la comarca del Sil. Darréu estes ponencies entamaran una riestra comunicaciones nes que participarán Francisco González y Naciu i Riguilón sobre “L’aventura del Cudoxu” y Tradición Oral y lliteratura”. Esti día fadráse un homenaxe La xornada del domingu entamará cola coles comunicaciones de Berto Álvarez Peña, del Conceyu d’Estudios Belenos, Vitorino García, xerente de “El rincón Cunqueiru” y la filóloga Iris Díaz Trancho qu’asoleyarán les sos comunicaciones pa dar darréu pasu a un alderique sobre “tradición oral, cultura popular y territorios na lliteratura n’asturianu occidental” que va moderar Fernando Álvarez Balbuena y que pondrán el peslle de les xornaes. 29 de payares, 2006 0 FacebookTwitterPinterestEmail
Sociedá Presentóse l’Anuariu de la Xunta de Toponimia 2004-2006 by asturnet 28 de payares, 2006 La Xunta Asesora de Toponimia presentó ayer l’Anuariu de los trabayos fechos ente 2004 y 2006. Nel recopilatoriu aparecen los datos toponímicos de los 10 conceyos qu’aprebaren los sos espedientes toponímicos nesti periodu, y que fueron ratificaos nel Boletín Oficial del Principáu d’Asturies. L’Anuariu de la Xunta Asesora de Toponimia ta firmáu por Fernando Álvarez-Balbuena, Xulio Viejo y Ramón d’Andrés. Nel actu participaron Carlos Madera, Director Xeneral de Promoción Cultural y Llingüística; Ramón d’Andrés, Xefe de la Oficina de Política Llingüística; Fernando Álvarez-Balbuena y Xulio Viejo, vocales de la Xunta Asesora de Toponomia. Énte’l públicu alcontrábense dalgunos de los alcaldes de los conceyos que yá vieron les formes toponímiques tradicionales oficializaes. L’Anuariu de la Xunta Asesora de Toponimia presenta los espedientes toponímicos de los conceyos de Carreño, El Franco, Llanes, Gozón, Llangréu, L.lena, Sariegu, Cabranes, Bimenes y Villaviciosa. Carlos Madera entamó la presentación d’esti actu señalando que “l’actuación toponímica ye una aición del Gobiernu asturianu inxertada dientro del marcu llegal”. Pal Director Xeneral l’aición de la recuperación toponímica ye l’aspeutu más desarrolláu de los diferentes compromisos del Gobiernu pa cola llingua. Madera remarcó’l sofitu que s’alcuentra ente la sociedá la oficialización de les formes tradicionales de nomar a los llugares nel país. Carlos Madera recordó qu’actualmente hai 50 conceyos que solicitaron revisar los sos espedientes, la Xunta Asesora de Toponimia tuvo 36 reuniones, que desbordaron les propies espectatives de la Xunta Asesora de Toponimia. El llabor de la Xunta de Toponimia foi calificáu como exemplar pol responsable autonómicu de promoción y política llingüística al ser capaz d’imponer los criterios técnicos respectu de los políticos. Sobre la implantación de los topónimos oficializaos Madera faló de la “progresividá” nesa tema, mesmo que sobre la so aparición nel Boletín Oficial del Principáu d’Asturies, alegando la lentitú alministrativa y les diferentes “inercies alministratives y burocrátiques”. Sicasí reconoció que se tán faciendo recomendación pa favorecer la rápida implantación na Alministración del usu de los topónimos oficiales. Pa Ramón d’Andrés el llibru presentáu ye’l frutu d’un trabayu esamináu dende’l puntu de vista técnicu. D’Andrés presentó los conteníos del Anuariu toponímicu, dende les primeres introducciones sobre lo que ye la Xunta Asesora de Toponimia a los capítulos específicos de cada conceyu. Ramón d’Andrés afitó la vocación de futuru d’esti anuariu anunciando que se fadrá lo mesmo colos topónimos oficializaos durante 2006. Xulio Viejo espresó la sos satisfacción por asoleyar esti trabayu depués del trabayu de recoyida toponímica. Pa Viejo esti Anuariu ye la coronación d’un trabayu de munchu tiempu, de muncha xente ue tuvo coordináu pola Xunta de Toponimia. Pa Xulio Viejo un de los llabores más importantes del trabayu de los diferentes encuestadores toponímicos foi’l d’alcontrar bien de topónimos que nun figuraben. Xulio Viejo afitaba la necesidá de qu’el trabayu de recuperación, y oficialización, toponímica algame una una Oficialización social, más allá de l’alministrativa, de los topónimos oficializaos. Fernando Álvarez-Balbuena señaló que l’Anuariu ye’l resultáu de lo que se “pudo facer” nos años 2004-2005. Pal filólogu y asesor de la Xunta de Toponimia cola oficialización de la toponimia se ta cumpliendo “parcialmente” una revindicación histórica del asturianismu, ye un “cachín d’oficialidá que fuimos arrancar per primera vegada” dixo Fernando Álvarez-Balbuena. El filólogu fizo referencia a la historia de la recuperación toponímica dende qu’en 1973 José Luis Montoto na Primera Asamblea Regional del Bable presentará “Defensa Topónimos d’Asturies”, pasando pol “Conceyos y parroquies d’Asturies” de la Comisión toponímica d’Asturies en 1985, el Nomenclator d’Asturies publicáu pol SADEI en 1987, l’entamu de la Colección Toponimia de l’Academia de la Llingua Asturiana en 1990 cola fin de preservar el patrimoniu toponímicu del país, l’Atlas d’Asturies de la editorial Nobel nel que se fai l’intentu de cubri la toponimia menor en 1995-1997, Nomes de Conceyos, Parroquies, Pueblos y Llugares del Principáu d’Asturies de l’Academia en 2000 y como en 2006 l’Anuariu de la Xunta Asesora de Toponimia. 28 de payares, 2006 0 FacebookTwitterPinterestEmail
Sociedá L’Atenéu Obreru de Xixón va inaugurar un monolitu na so antigua sé by asturnet 24 de payares, 2006 Esti sábadu a les 11,30 hores l’Ayuntamientu de Xixón, nel Paséu del Muru escalera 7, va inaugurar un monolitu col que se fadrá alcordanza del espaciu qu’ocupó la última de les sés del Atenéu Obreru de Xixón enantes de la so clausura ya incautación de los sos bienes durante la Guerrea Civil. L’actu enmárcase nel programa d’actividaes previstu pa conmemorar el 125 aniversariu de la fundación del Atenéu Obreru de Xixón. 24 de payares, 2006 0 FacebookTwitterPinterestEmail
Sociedá Llames de Pría cellebra esta fin de selmana les V Xornaes de Deporte Tradicional by asturnet 24 de payares, 2006 El pueblu llaniscu de Llames de Pría cellebra esta fin de selmana la quinta edición de les Xornaes de Deporte Tradicional, incluyides nel programa de les fiestes de San Saturnín. Los actos tán organizaos pol Club de Deporte Tradicional San Zornín col sofitu del Ayuntamientu de Llanes y la Federación Asturiana de Deporte Tradicional. Güei vienres 24 de payares, los asistentes podrán disfrutar d’un amagüestu, que se fadrá en tolos chigres del pueblu. El sábadu 25 de payares habrá una misa solemne interpretada a la gaita pol gaiteru de San Roque Ignacio Noriega. Darréu la misa entamará’l concursu Exhibición d’arrastre de Pesu con caballos, nel que participarán Luis Villa, Guillermo Gómez, Amador Molleda, Pablo Galdeano, Manuel Jardón, Sergio Gutiérrez, Ángel Conde y Ramón Gutiérrez. A les 20,00 hores fadrase una carrera de panoyes. Darréu ello entamará un espicha con verbena. Toles prebes y actos fadránse nel Prau Corrales. 24 de payares, 2006 0 FacebookTwitterPinterestEmail
Sociedá Los partíos mayoritarios entamen a enxertar asturianistes nes llistes d’ayuntamientos by asturnet 24 de payares, 2006 L’anuncia de que Xosé Suárez Arias-Cachero, hestóricu militante nacionalista asturianu, dirá na llista del PP al Ayuntamientu d’Uviéu, nun ye sinon la primer apaición d’un fenómenu que será’l más significativu de les prósimes eleiciones. Les llistes de PP y PSOE en Xixón sedrán les prósimes que tendrán la pallabra nesti sen. L’anuncia esti día de la inclusión na llista del PP al Ayuntamientu d’Uviéu, qu’encabeza Gabino de Lorenzo, de Xosé Suárez Arias-Cachero, “Felechosa”, ta acabante d’abrir la veda del enxertamientu d’asturianistes nes llistes a les prósimes eleiciones. La popular Fernández Pardo ya dexara bien nidiu’l so compromiso col asturianismu al aceutar el nomamientu como patrona de la Fundación Caveda y Navas, lo que fai albidrar que tamién habrá na so llista al Ayuntamientu Xixón nomes asturianistes y el PSOE tien de decidise en Xixón por una realidá incontestable: el pergran sofitu que tien el so coordinador de la zona Oeste, Serxu Solares. A too ello vien a xuníse la recién candidatura de Faustino Álvarez, otru veteranu asturianista nes files del PSOE, a l’alcaldía de Siero. Nesti sen, la derecha asturiana ta persabiendo adelantase al PSOE en dexar bien nidio que nun hai torgues a la presencia del asturianismu nes files de tolos partíos, no que nun pue interpretase sinon como un avisu de qu’entama a vese la llingua asturiana y la oficialidá como una reclamación ensin tintes partidistes. Los prósimos díes tendrán de ser granibles nesti sen y nesta fastera de la vida política. 24 de payares, 2006 0 FacebookTwitterPinterestEmail
Sociedá El Serviciu de Normalización de Samartín entama una campaña ente la hostelería by asturnet 23 de payares, 2006 El Serviciu de Normalización de Samartín del Rei Aurelio entamará una campaña pa normalizar l’usu del asturianu na hostelería. Con esta campaña’l sector hosteleru del conceyu podrá tener la so cartelería n’asturianu. Los locales que s’axunten a la iniciativa podrán tener la so carta n’asturianu. Asina mesmo’l Serviciu de Normalización va distribuyir manteles con xuegos n’asturianu. Los diseños de los carteles tarán fechos personalizadamente 23 de payares, 2006 0 FacebookTwitterPinterestEmail
Sociedá L’asociación de Trabayadores de la Normalización Llingüística denuncia al Conceyu de Mieres y a la Conseyería de Cultura por pesllar el serviciu by asturnet 22 de payares, 2006 L´Asociación de Trabayadores de la Normalización Llingüística vien denunciando dende va tiempu les “irregularidaes y la falta de compromisu”0 de dalgunos conceyos y de la Conseyería de Cultura pa cola normalización llingüística. El colectivu de trabayadores de la normalización denuncien la situación del Serviciu de Normalización Llingüística de Mieres que ta acabante de zarrar nesti mes de payares. Esti serviciu, quaniciól so llabor a finales del añu pasáu, vien funcionado nuna situación precaria abriendo unos pocos meses al añu y zarrando otros. El SNL de Mieres, nel añu 2006, empezó a funcionar nel mes de mayu, situación mui grave yá quel plazu pa solicitar les subenciones pa la normalización nos Conceyos acababa en xineru. La precariedá cola que funcionen los Servicios de Normalización Llingüística, nos que prácticamente la única fonte de financiación son les subvenciones de la Conseyería de Cultura, y lo que nun se pue permitir ye que nesti periodu la técnica responsable nun tea trabayando y planificando lo que va ser el trabayu de tol añu. Pa l’Asociación de Trabayadores de los SNL “en casu de que la Conseyería de Cultura y los Conceyos piensen que la Normalización nos conceyos ye un trabayu importante y non, un cuentu col que xustificase delantre la sociedá pa que paeza que se fai dalgo, tienen que tener los Servicios nunes condiciones mínimamente dignes y que pasen porque la persona responsable tea tol añu nel so puestu de trabayu”. L’asociación denuncia que la Conseyería de Cultura concedió una subvención pal 2006 al Conceyu de Mieres pa tener el Serviciu abiertu tol añu, ayuda que se dio cola condición de que dendel Conceyu s´aportare una parte del capital. El Conceyu de Mieres “incumpliól so compromisu dafechu”, yá que nin puso nada de capital nin mantuvo´l Serviciu abiertu más de mediu añu. Dende LAsociación de Trabayadores de la Normalización Llingüística condenen estos fechos que suponen una “falta de seriedá” de los reponsables políticos desi Conceyu y queremos recordar a la Conseyería la so parte de responsabilidá énte esta deficiente situación. L’asociación píde-y a la Cosneyera de Cultura soluciones cola fin de garantizar la estabilidá y continuidá de los Servicios de Normalización, “soluciones que nun acaben de llegar pola falta de voluntá, el desinterés y el desdexamientu que dende esti gobiernu se tien pa cola llingua asturiana”. Dende l’Asociación de Trabayadores de los Servicios de Normalización consideren que “el Conceyu de Mieres incumple y la Conseyería de Cultura consiente”. A lo qu’aseguren qu'”esta ye la política llingüística cola que, dicen, se pretende normalizar la llingua asturiana ente la sociedá”. L’Asociación de Trabayadores de la Normalización Llingüística, “continuará denunciando les irregularidaes y precariedaes que se vienen dando nos Servicios de Normalización nos Conceyos porque creemos que la política llingüística dAsturies necesita un compromisu seriu y claru muncho mayor del que los políticos tan dando”. Mieres vuelve abrir la Oficina de Normalización énte les quexes d’IX 22 de payares, 2006 0 FacebookTwitterPinterestEmail
Sociedá Sofitu internacional a la oficialidá by asturnet 21 de payares, 2006 El Conseyu de l’Asociación Internacional pa la Defensa de les Llingües y Cultures Amenazaes emitió esta fin de selmana una resolución refiriéndose a la falta de derechos llingüísticos n’Asturies. Na resolcuión afálase al Presidente asturianu a “respetar los derechos llingüísticos mediante la proclamación na prósima reforma del estatutu de la oficialidá de la llingua asturiana”. L’Asociación Internacional considera que “una gran mayoría de la población asturiana, depués de bien d’años, reclama respetu pa los sos derechos llingüísticos”; y qu’esto derechos han plasmase na prósima reforma estatutaria. Pa la AIDLCM l’estatus legal del asturianu ye perimportante, avisando de la so posible desapaición en casu de que nun s’oficialice. Asina mesmo la organización de derechos llingüísticos reclama garantizar en tolos niveles educativos l’enseñu de la llingua asturiana, dende la educación infantil a la Universidá. El tarrén de la normalización social del asturianu ye otru de los que toca l’asociación demandando la puesta en funcionamientu de les medíes afayadices pa garantizar eficaz y apropiadamente la llingua asturiana ente la sociedá asturiana como llingua asturiana. 21 de payares, 2006 0 FacebookTwitterPinterestEmail
Sociedá La Xunta Asesora de Toponimia va presentar un anuariau col trabayu desendolcáu ente 2004 y 2005 by asturnet 21 de payares, 2006 El llunes 27 de payares, na Bibilioteca Pública “Ramón Péz d’Ayala” d’Uviéu, la Xunta de Toponimia va presentar l'”Anuariu de la Xunta Asesora de Toponimia 2004-2005″, l’actu tará presidíu pol Director Xeneral de Promoción Cultural y Política Llingüística, Carlos Madera, el Xefe de la Oficina de Política Llingüística, Ramón d’Andrés, y l’espertu de la Xunta de Toponimia y coautor de la obra, el filólogu Fernando Álvarez Balbuena. Nel actu esplicaráse’l conteníu del anuariu, amás de facer una análisis y evaluación del actual procesu de recuperación y oficialización de la toponimia asturiana. Pa la presentación d’esti anuariu la Conseyería de Cultura convidó a los Alcaldes de los 50 conceyos involucraos nel procesu de recuperación toponímica, Servicios de Normalización Llingüística, entidaes culturales, asina como a los collaboradores de los trabayos de campu entamaos pola Xunta Asesora de Toponimia. 21 de payares, 2006 0 FacebookTwitterPinterestEmail
Sociedá La Oficina d’Información Xuvenil de Samartín del Rei Aurelio organiza un viaxe cultural a Madrid by asturnet 20 de payares, 2006 La Oficina d’Información Xuvenil de Samartín del Rei Aurelio organiza un viaxe cultural a madrid pa los díes 16 y 17 d’avientu. El viaxe cultural a madrid ye la actividá programada dende la Oficina d’Información Xuvenil con más antigüedá, ya que vien organizándose dende fai 11 años, lo que permitió a munchos/es mozos/es del conceyu y del restu d’Asturies conocer la importancia del padremoñu cultural de la capital del estáu. La actividá cuesta 39 euros por persona ya inclúi viaxe, abellugu y almuerzu nunhotel de cuatro estrelles. Toes aquelles persones interesaes en tener más información o inscribise puen facelo na Oficina d’Información Xuvenil de Samartín del Rei Aurelio Casa de la Xuventú de sotrondio, teléfonu 985 67 01 22, de llunes a vienres n’horariu de 10 a 13 y de 17 a 21 hores. Les places son llimitaes, pero entá queden places llibres pa esta edición. 20 de payares, 2006 0 FacebookTwitterPinterestEmail