Sociedá Valdés prepárase pa conmemorar el centenariu de Severo Ochoa by asturnet 18 de setiembre, 2005 El conceyu de Valdés prepárase pa entamar los actos de remembranza del centenariu del nacimientu de Severo Ochoa. La contribución al homenaxe del conceyu natal del científicu y Premiu Nóbel empieza esti sábadu 24, fecha del centenariu, cola inauguración d’un mural nel puertu de L.luarca, la presentación d’un sellu comemorativu y un conciertu del cantante Chus Pedro na Plaza l’Ayuntamientu. A lo llargo de los prósimos meses van siguir les actividaes programaes pol conceyu valdesanu pa remembrar al so fíu más ilustre. Conferencies de la investigadora Margarita Salas, l’ex director de la UNESCO Francisco Mayor Zaragoza y d’Emiliano Aguirre, Premiu Príncipe d’Asturies d’Investigación Científica, ente otros, van constituir los actos principales del centenariu. Ente les diverses actividaes entames n’homenaxe al Nóbel asturianu el prósimu viernes 23 va presentase na capital del conceyu valdesanu el fotollibru “Luarca, descubriendo emociones: un homenaje a Severo Ochoa», con fotografías d’Ernesto García (ganador del Certamen de Arte de L.luarca del añu paáu) y testos de Román Suárez Blanco. 18 de setiembre, 2005 0 FacebookTwitterPinterestEmail
Comunicación Porrúa algama’l premiu de Pueblu Exemplar de los Príncipe d’Asturies by asturnet 15 de setiembre, 2005 Porrúa fue’l llugar escoyíu a la fin pol xuráu encargáu de conceder el premiu Pueblu Exemplar de la Fundación Príncipe d’Asturies. Otres venti candidatures optaben a esta distinción empobinada a reconocer el sentimientu de solidaridá nes comunidaes pequeñes y el valor de lo local. El premiu distingue’l llabor desenvueltu pola asociación Llacín, un colectivu cultural y vecinal autor de diverses iniciatives de promociòn de Porrúa y en favor de la xente del llugar. L’ Asociación Llacín, creada en 1994 col oxetivu de desarrollar edificaciones y terrenos d’una finca donada por una familia emigrante de México, distintos espacios recreativos y culturales pa disfrute de tol pueblu. Otres acciones que lleva a cabu son la edición anual del Mercáu Astur, la Escuela de Música Tradicional y la Banda de Gaites Llacín. Nel añu 2000, na finca de Llacín, inauguróse el Muséu Etnográficu del Oriente d’Asturies. En 2001 el Museo executó los llabores de recuperación del antigu llavaderu y de la canal d’agua xunto al ríu Vallina, con cerca de un sieglu d’antigüedá. L’asociación Llacín de Porrúa participa nel programa Pueblu Cultural d’Europa, una iniciativa de la que formen parte once pequeños pueblos d’otros tantos países europeos y que tien por filosofía el destacar la importancia de les pequeñes comunidaes y reflexonar sobre la so economía y la so cultura. Porrúa va organizar nel año 2008 los alcuentros que habrán xuntar a les once delegaciones d’estos Pueblos Culturales de Europa. 15 de setiembre, 2005 0 FacebookTwitterPinterestEmail
Sociedá L’Audiencia Nacional ordena la prixón incondicional pal militante nacionalista deteníu en Xixón by asturnet 15 de setiembre, 2005 Fernando G.R., el vecín de Xixón deteníu pola Brigada d’Información de la Comisaría de Xixón esti martes, pasó ayer a disposición de l’Audiencia Nacional de Madrid, trescurríu’l plazu llegal de 48 hores llantáu na Llei Antiterrorista. El xuez Felix Degallón, del xulgáu númberu 6 de l’Audiencia, ordenó el so ingresu na cárcel de Soto del Real en situación de prixón incondicional tres toma-y declaración. Mientres Fernando G.R. yera treslladáu a Madrid pa declarar n’Audiencia Nacional, varios centenares de persones, convocaos polos familiares y amigos del deteníu concentráronse na Plaza’l Parchís de Xixón pa pidir la so puesta en llibertá y clamiar la so inocencia.Los manifestantes cortaron tamién la entrada a l’autopista, a l’altura de l’antigua Casa Sindical, na so protesta. Nun comunicáu distribuíu na protesta, los familiares y amigos del deteníu afirmen que la nota de prensa difundía por Delegación del Gobiernu n’Asturies “namás trata de condenalu a priori énte la sociedá ensin respetar el so derechu a la presunción d’inocencia” y que “amás d’una manera completamente infundada con tou tipu d’elucubraciones intenten imputar a Fernando nun ensin fin de fechos ocurríos n’ Asturies dende va cuatro años”. Pa los allegaos de Fernando G.R “ta sobredimensionándose’l tema ensin prebes, acusándolu d’un delitu de terrorismu pa llevalu asina a l’Audiencia Nacional en Madrid lloñe de la so familia y amigos/es prolongando d’esta manera la incomunicación”. El comunicáu de la familia y los amigos del deteníu acaba diciendo que se “tenta criminalizar una vez más a idees polítiques y organizaciones nes que Fernando militó a lo llargo de la so vida. Esti colectivu tamién denuncia la situaciòn d’indefensión del deteníu, ensin posibilidá de ver al so abogáu. La policía acusa a Fernando G.R. de ser l’autor de dieciocho atentaos cometíos n’Asturies nos últimos cuatro años y de ser el principal aglutinador nel país de grupos radicales afines al independentismu vascu. Unes acusaciones que familiares y conocíos d’esti xixonés nieguen. 15 de setiembre, 2005 0 FacebookTwitterPinterestEmail
Comunicación Radio Sele emite una entrevista grabada al sindicalista asesináu en Colombia by asturnet 14 de setiembre, 2005 Radio Sele va emitir esta nueche a les 23.00 la entrevista que-y fizo n’abril d’esti añu al sindicalista colombianu Luciano Romero Molina, asesináu va unos díes nel so país por paramilitares. La conversa cola emisora asturiana foi una de les últimes que caltuvo Romero con medios del estáu enantes de volver a Colombia. El sindicalista asesináu yera ún de los refuxaos políticos acoyíos al programa de l’Axencia Asturiana de Cooperación pa militantes de movimientos sociales amenazaos nos sos países d’orixen por motivos políticos. Na so estancia n’Asturies, Luciano Romero participó en numberoses actividaes públiques y sofitó a diversos colectivos. El so asesinatu, va unos díes, causó una fonda conmoción nos movimientos sociales asturianos. 14 de setiembre, 2005 0 FacebookTwitterPinterestEmail
Sociedá Esquerra va retirar la referencia al gallegu n’Asturies tres falar con Andecha by asturnet 14 de setiembre, 2005 Esquerra Republicana de Catalunya (ERC) va eliminar cualaquier referencia a los conceyos asturianos del Navia-Eo na so propuesta pa oficializar en toles administraciones del estáu l’usu del gallegu, catalán y euskera. Representantes d’Andecha Astur treslladaron a los sos socios d’Europa de los Pueblos la so esmolición y ERC comprometióse a iguar la confusión provocada nos términos referíos al idioma gallegu na so iniciativa parlamentaria. Andecha informa na so páxina web que como resultáu de los contactos calteníos colos republicanos catalanes la referencia al gallegu en conceyos del occidente astur sustitúise nel testu de la propuesta presentada nel Congresu pol diputáu Joan Tarda por “territorios onde se fale esa llingua”. La organización nacionalista asturiana desplica que los representantes d’Esquerra reconocieron el so erru, frutu de la so desconocencia de la realidá llingüística d’Asturies y de falta de coordinación colos sos socios d’Andecha. Nel comunicáu colgáu na web d’A.A. asegúrase qu’ERC va presentar la so iniciativa col nuevu testu nel que s’elimina la demanda de que la llingua gallega s’oficialice en fasteres de la nuestra comunidá. Web d’Andecha Astur 14 de setiembre, 2005 0 FacebookTwitterPinterestEmail
Sociedá La policía detién a un militante nacionalista supuestamente relacionáu con fechos investigaos poles fuerces de seguridá by asturnet 14 de setiembre, 2005 Axentes de la Brigada d’Información de Xixón detuvieron na madrugada del martes a Fernando G. R. pola so posible relación colos incidentes del pasáu 10 de setiembre en Cangues, según informen dellos medios informativos, citando fontes oficiales. Tres la so detención, la policía investiga la posible relación del deteníu con otros fechos, ente ellos los ataques a sés de partíos políticos, según los mesmos medios. Fernando G.R. ta deteníu ya incomunicáu nos calabozos de la Comisaría de Xixón n’aplicación de la Llei Antiterrorista. Según informen diversos medios asturianos na so edición de güei, citando fontes de la Delegación del Gobiernu, el deteníu podía pasa a disposición de l’Audiencia Nacional trescurríu’l plazu de 48 hores establecíu na lexilación pa delitos relacionaos col terrorismu. Dende la so detención familiares y amigos de Fernando G. R. concentráronse énte la Comisaría xixonesa pa pidir la llibertá del deteníu. Esti xueves 15 hai convocada una concentración a les 19.00 hores na Plaza’l Parchís de Xixón pa reclamar la so puesta en llibertá. Los familiares del deteníu declararon en dellos medios desconocer les razones del apresamientu de Fernando G. R. y denunciaron la falta d’información de les autoridaes policiales tocante a la situación del deteníu. Nun comunicáu difundíu en medios alternativos los familiares llamen l’atención sobre’l fechu de que nun-y permitieran al deteníu ver al so abogáu y informen que solicitaron pa él l’aplicación del habeas corpus. Fernando G.R. ye miembru activu de diversos colectivos asturianistes y cumplió dos años de prixón nel Centru Penitenciariu de Villabona condenáu por insumisu al serviciu militar obligatoriu. Nel momentu de redactar esta información desonocíase si el deteníu fuera puestu en llibertá o pasara a disposición xudicial. 14 de setiembre, 2005 0 FacebookTwitterPinterestEmail
Comunicación Les Hermanes de la Caridá de San Vicente Paúl algamen el Príncipe d’Asturies de la Concordia by asturnet 13 de setiembre, 2005 La congregación de les Hermanes de la Caridá de San Vicente Paúl algamaron el Premiu Príncipe d’Asturies de la Concordia concedíu esta mañana n’Uviéu. Les monxes d’esta orde faen una importante llabor humanitaria en tol mundu a favor de los más desfavorecíos. La candidatura ganadora del Premiu a la Concordia impúnxose nes votaciones finales del xuráu a les otres finalistes: la Organización Nacional de Tresplantes y la Organización Internacional del Trabayu. El xuráu del premiu taba compuestu por Vicente Álvarez Areces, José Ramón Álvarez Rendueles, José María Arias Mosquera, Adolfo Barthe Aza, Antonio Basagoiti, Javier Benjunea, Miguel Blesa, Claudio Boada, José Celma Prieto,Ramón Colao, José Cosmen Adelaida, Fernando de Almansa, Juan Manuel Desvalls, José Esteve, Felipe Fernández, José Ramón Fernández Cueva, Paz Fernández Felgueroso, Francisco de la Fuente, Martín González del Valle, Juan Luis Iglesias Prada, José Luis Mëndez, Fernando Menéndez Rexach, José María Ramírez, Helena Revoredo y Matías Rodríguez Inciart. Nos prósimos díes la Fundación Príncipe d’Asturies va dar a conocer l’últimu de los premios concedíos, el de Pueblu Exemplar d’Asturies 2005. 13 de setiembre, 2005 0 FacebookTwitterPinterestEmail
Sociedá El Bloque pide desplicaciones a Delegación del Gobiernu polos fechos de Cangues by asturnet 13 de setiembre, 2005 Rafael Palacios y Roberto Colunga, portavoz nacional y secretariu xeneral del Bloque por Asturies, respectivamente, ufiertaron esti martes 13 una rueda de prensa pa condenar l’actuación de la Guardia Civil nos incidentes del pasáu 10 de setiembre en Cangues d’Onís y pidir desplicaciones a Delegación del Gobiernu por estos fechos. Los cabezaleros de la organización nacionalista remembraron que díes enantes de celebrase en Cangues un actu del grupu ultraderechista Democracia Nacional, el Bloque advirtió al Delegáu del Gobiernu, Antonio Trevín, de la eventualidá d’incidentes violentos entamaos polos neofacistes y encamentáronlu a nun permitir esti actu convocáu pa una xornada que coincidía cola llegada a la zona d’una etapa de la Vuelta Ciclista a España. Los dirixentes de BA consideren que los sos advertíos nun yeren de baldre en vista de lo sucedío en Cangues el sábadu 10. El Bloque, que sofitaba una convocatoria de refugue a la concentración ultra nel mesmu llugar de la celebración d’aquella, criticó por voz de los sos cabezaleros la intervención de la Guardia Civil: “en Cangues dOnís asistimos a lo que podíemos denominar el mundiu del revés -afirmaron Palacios y Colunga- la Guardia Civil protexendo a los neofacistes y golpeando de forma brutal a los demócrates”. El Bloque calificó de “desmidida” ya “inxustificable” l’actuación de les fuerces de seguridá que se saldó cola detención de doce manifestantes antifascistes. Respective a les agresiones que la Guardia Civil afirmó recibir per parte de los militantes d’izquierda, los dirixentes de BA manifestaron que fueron los propios ultres los qu’entamaron estos incidentes: “tenemos conocimientu de la esistencia dultres y neofacistes que, mezclaos ente la población, llanzaron piedres y botelles contra la Guardia Civil col oxetivu estudiáu de provocar la so actuación”, aseguraron Rafael Palacios y Roberto Colunga. El Bloque por Asturies pidió al Delegáu del Gobiernu, Antonio Trevín, l’apertura d’una investigación polos sucedíos de Cangues, la depuración de les posibles responsabilidaes internes y l’archivu de los tramites sancionadores puestos en marcha contra los militantes antifascistes deteníos tres los incidentes. Pa la organización nacionalista “nun s’entiende cómo ye posible quel Delegáu en el Gobiernu nAsturies nun autorice manifestaciones por tar redactada la solicitú en Llingua Asturiana y ensin embargu autorice una concentración en Cangues dOnís dun conocíu grupu neofacista y pronazi, racista, xenófobu, y violentu por definición”. 13 de setiembre, 2005 0 FacebookTwitterPinterestEmail
Sociedá Andecha va aconceyar con ERC pa tratar de la so propuesta sobre llingües del Estáu by asturnet 13 de setiembre, 2005 Andecha Astur va aconceyar colos sos socios na coalición Europa de los Pueblos d’Esquerra Republicana de Catalunya (ERC) pa pidi-y a la formación de Josep Lluis Carod Rovira qu’elimine la referencia al Navia-Eo na so propuesta nel Congresu pa que gallego, catalán y eusquera seyan oficiales nes administraciones del estáu. La organización nacionalista asturiana informa na so web oficial que prósimamente van reunise con representantes d’Esquerra col fin d’advertilos del “erru grave” de considerar na so iniciativa parlamentaria ala estaya más occidental d’Asturies como territoriu de fala gallega. Andecha asegura tener el comencimientu de qu’esti erru namás puede debese “a la desconocencia de la realidá llingüística asturiana”. Los socios asturianos de la coalición Europa de los Pueblos consideren “d’una gravedá inusitada el “que se pretenda dar esti avance irreversible nel procesu de colonización al que ta sometíu l’occidente asturianu” y advierte a los sos coaligaos d’ERC que de llevase a fechu la so iniciativa nos términos actuales “condicionaría perdafechu les rellaciones con esa formación”. Web d’Andecha Astur 13 de setiembre, 2005 0 FacebookTwitterPinterestEmail
Comunicación La filósofa Victoria Camps defende l’asturianu como una de les razones de ser de la Televisión Autonómica by asturnet 12 de setiembre, 2005 La caderalga de Filosofía Moral y Política de la Universidá Autónoma de Barcelona y presidenta miembra del Consell del Audiovisual de Cataluña Victoria Camps defendió ayer n’Avilés la presencia de la llingua asturiana nel Ente Públicu de Comunicación como una de les razones de ser de la nueva Televisión Autonómica. La filósofa faló del papel “formativu y de serviciu” de les televisiones públiques na Escuela Internacional de Veranu d’UXT y caltuvo que nel casu de l’asturiana la presencia de la nuestra llingua “nun puede ser la única llingua na qu’emita la autonómica pero ye bono que tenga presencia na programación por cuestión de prosimidá. Camps afondó nel papel del asturianu nel Ente del Principáu remembrando a les otres televisiones autonómiques: “la televisión autonómica catalana o la gallega nun tendríen mayor xustificación si nun fuera por contar con una programación íntegramente en catalán o gallego”, afirmó. Pa la representante del comité d’espertos qu’asesoren en Cataluña sobre los conteníos éticos de les televisiones públiques les característiques del nuevu Ente de Comunicación d’Asturies han ser “la cercanía, la prosimidá de les sos informaciones y la so especificidá». 12 de setiembre, 2005 0 FacebookTwitterPinterestEmail