Comunicación Instituciones de Portugal y Galicia piden que la so cultura oral seya declarada Patrimoniu de la Humanidá by asturnet 4 de xunu, 2005 Instituciones de Portugal y Galicia, ente elles los sos gobiernos, sofiten la campaña que desenvuelve dende va unos meses l’asociación cultural y pedagóxica “Ponte nas ondas” pa que la UNESCO declare Patrimoniu de la Humanidá la tradición oral galaico-portuguesa. Los promotores de la candidatura quieren que la institución internacional reconoza la bayura milenaria del troncu común de les llingües de los dos países vecinos na declaración d’Obres Maestres de la Cultura Oral ya Inmaterial que la UNESCO tien previsto facer el prósimu 3 de xunetu. Pa les entidaes que promueven la candidatura da la tradición llingüística galaico-portuguesa embaxo la denomación “La Tradición Oral Galaico-Portuguesa: Simboloxía y apropiación del mediu natural”, ésta refíerese a una marca distintiva de les espresiones culturais de les rexnes del Norte de Portugal y de Galicia, que pa los sos promotores “caracterízase como una unidá de práctiques sociales y simbóliques, de les que la tradición oral ye una manifestación orixinal”. Les instituciones que defenden la candidatura consideren a esta tradición oral como merecedora de ser reconocida pola UNESCO dientro’l so catálogu nomáu Masterpiece of Oral and Intangible Heritage of Humanity. Talo despliquen los promotores:”la escepcionalidá d’esta candidatura reside nel fechu de ser testimoniu d’un pasáu y d’un presente qu’ultrapasa les barreres polítiques, al través del sentimientu de pertenencia a una cultura común puesta en causa por dalgunos dictámenes de la hestoria y poles transformaciones de la sociedá contemporánea, que la esperiencia de nuevos contactos reavivió y esixió la so salvagarda”. Les principales instituciones polítiques y culturales de Galicia y Portugal sofiten esta candidatura que cuenta tamién col apoyu de corporaciones locales, asociaciones y personalidaes públiques d’entrambos países. Dientro la campaña por defender la iniciativa pa que la UNESCO declare al troncu llingüísticu común de les dos tierres riberanes del Miño, esti fin de selmana desarrollóse un festival na villa lusa de Melgaço nel que participaron músicos y artistes de los países promotores de la candidatura. Web oficial de la candidatura Patrimonio Inmaterial Galaico-portugués 4 de xunu, 2005 0 FacebookTwitterPinterestEmail
Comunicación Los premiaos col Príncipe d’Asturies de Comunicación y Humanidaes sorrallen los valores comunes de los institutos europeos by asturnet 1 de xunu, 2005 Los seis institutos europeos reconocíos ayer col Premiu Príncipe d’Asturies de Comunicación y Humanidaes espresaron per voz de los sos másimos responsables el contentu que-yos producía acoyer esta distinción y toos coincidieron en remarcar la semeyanza de los proyectos culturales que representen les sos instituciones, y un mesmu enfotu polos meyores valores de la tradición europea. El xuráu reuníu pola Fundación Príncipe d’Asturies en concediendo el galardón ya resaltara que “la actividá d’estos centros va más alló de la promoción llingüística, constituyéndose n’auténtiques embaxaes culturales d’Europa énte’l mundu y nun instrumentu de fomentu del diálogu y d’ afirmación de la identidá de los pueblos nel actual marcu de la globalización”. Ente les reacciones de les instituciones premiaes hai una coincidencia en remembrar lo que tienen en común toes elles. Pal British Council: “los valores que toos compartimos n’Europa tán nel corazón del nuestru común humanismu” y afirmen sentise “arguyosos” del trabayu que faen nesi campu n’Europa y en tol mundu: “el nuestru compromisu ye firme y continuáu y resulta tremendamente gratificante y alendador ver nuestru llabor premiáu con un galardón d’esta categoría”. N’asemeyaos términos espresábase¡ñ director del Goethe Institut, Jutta Limbach, pa quien, depués de congratulase pol premiu: “nos préstanos que la Fundación destacara el papel de los institutos de cultura nacionales nel procesu d’integración européu”. Pal responsable del institutu alemán: “Europa va seguir siendo munchu tiempu un proyectu preferentemente cultural”, y n’alusión a l’actualidá añade:”esta evidencia ye dalgo que tamos percibiendo mui claro nestos díes. Simonetta Luz Alfonso, directora del Instituto Camoes espresó el “gran honor y alegría” por recibir esti premiu y compartilu con otres entidaes que “como nós divulguen les nuestres llingües pel mundu” con un oxetivu común “que Portugal lleva alantre col espíritu del multiculturalismu européu que cada vez más desixe un esfuerzu conxuntu”. Pela so parte Bruno Bottai, presidente de la Societá Dante Alighieri: “esti premiu honra a España, un país hermanu que promociona xunto a nós dende va más de dos milenios la cultura del nuestru continente, estendiéndola darréu per tierres llonxanes”. Los responsables de les otres instituciones premiaes, l’Institutu Cervantes y l’Alliance Française tamién amosaron la so satisfacción por recibir el galardón compartíu con instituciones asemeyaes d’Europa, asina pa Jean-Claude Jacq, presidente de la entidá gala agradez el premiu y felicita a los otros institutos culturales: “pola escelencia del so llabor en pos d’oxetivos comunes”. Cesar Antonio Molina, director del Instituto Cervantes diz que’l premiu sorraya “la nuestra vocación europea, que ye la esencial xunto a la hispanoaméricana” y del galardón afirma que ye “un gran regalu qu’asumo en nome de los mios antecesores y de los miembros del Institutu Cervantes, porque reconoz años de trabayu y la xera de toos”. 1 de xunu, 2005 0 FacebookTwitterPinterestEmail
Comunicación Los institutos culturales europeos algamaron el Príncipe d’Asturies de Comunicación y Humanidaes by asturnet 31 de mayu, 2005 La candidatura que se barruntaba como favorita p’algamar el Premiu Príncipe d’Asturies de Comunicación y Humanidaes foi la qu’a la fin recibió los parabienes del xuráu. Los grandes institutos europeos, dedicaos a difundir la llingua y el patrimoniu vivu de los sos respectivos ámbitos culturales, representen “un instrumento de fomento del diálogo y de afirmación de la identidad de los pueblos en el actual marco de la globalización”. La candidatura reconocida col Premiu de Comunicación ya Humanidaes tien nome colectivu, el de seis instituciones europees col mesmu fin: difundir les llingües propies más alló de les llendes xeográfiques y polítiques. L’Alliance Française, el British Council, la Societá ‘Dante Alighieri’, el Goethe Institut, l’Institutu Camoes y l’Institutu Cervantes, a xuiciu del xuráu: “tresmiten al mundu la cultura y los valores humanísticos y democráticos d’Europa y apoyen la difusión de la producción artística más vanguardista de los sos países nel restu del mundu”. El xuráu d’esti premiu taba presidíu por Manuel de Olivencia y formábenlu Carmen Alborch, Lluis Xabel Álvarez, Ignacio Bayón, Raúl Bocanegra, Alejandro Echevarría, Javier Gómez Cuesta, Javier González Ferrari, Manuel Lombardero, Jorge Lozano, Catalina Luca de Tena, Beatriz de Moura, Elena Ochoa, Pedro Páramo, Alberto Pico, Ernesto Sáenz de Buruaga, José Antonio Sánchez, Ricardo Senabre, Jesús de la Serna, Enrique Ybarra y Juan Luis Iglesias Prada (secretariu). De les instituciones premiaes la más antigua ye l’Alliance Française, fundada en 1884 y que tuvo ente los sos directores a personalidaes del mundu de la cultura francesa como Louis Pasteur, Ernest Renan, Julio Verne y Armand Colin. Síguele n’antiguedá la Societá ‘Dante Alighieri, fundada en 1899 por un grupu d’intelectuales esmolecíos pola difusión de la llingua y la cultura italianes. El British Council entamó la so andadura en 1934, concebíu como un órganu internacional pa promover los valores de la democracia parlamentaria frente a la amenaza del fascismu emerxente n’Europa per aquellos años. El Goethe Institut, ye una entidá creada n’Alemania en 1951 y como les otres instituciones premiaes combina na so razón de ser el fomentu de la llingua y la cultura del ámbitu xermánicu col de la tresmisión de valores humanísticos y democráticos. Les dos instituciones más nueves son l’Institutu Cervantes d’España y l’Institutu Camoes de Portugal, entidaes creaes en 1991 y 1992, col fin de promocionar l’español y el portugués pel mundu. A esti premiu concurríen un total de 24 candidatures procedentes d’Alemania, Arxentina, Australia, Bulgaria, Colombia, Estados Uníos, Francia, Italia, México, Paraguay, Perú, Polonia, Portugal, Reiu Uníu y España. Ye’l segundu de los ocho Premios Príncipe d’ Asturies que van concedese esti año, nel que cumplen el so venticinco aniversariu. Enantes concedióse’l Premiu de Cooperación Internacional a la ex presidenta del Parlamentu Européu, Simone Veil. Nes prósimas selmanes van fallase los correspondientes a Ciencies Sociales, Lletres, Investigación Científica y Técnica y Artes. Los Premios Príncipe d’Asturies de Concordia y Deportes fallaránse el prósimu mes de setiembre. 31 de mayu, 2005 0 FacebookTwitterPinterestEmail
Comunicación Pérez Ornia da a conocer los nuevos nomes del equipu directivu de l’Autonómica by asturnet 18 de mayu, 2005 El director xeneral del Ente Públicu de Comunicación del Principáu José Antonio Pérez Ornia dio a conocer los nomes que completen l’equipu directivu de la radiotelevisión asturiana nel aconceyamientu que caltuvo nel día d’ayer el Conseyu d’Administración. Juan José Berenabarrena, como director d’Antena y Conteníos; Manuel José Castrillo, como responsable de Xestión y Recursos Humanos;Javier Asenjo, como director de Relaciones Corporatives;Flor Puente, como directora de Comunicación; y Daniel Álvarez, como secretariu xeneral, son los nuevos nomamientos que completen el staff executivu del Ente. Les incorporaciones anunciaes ayer por Pérez Ornia al equipu que va dirixir la radiotelevisión pública asturiana vienen a sumase a les que ya se conocíen, los del director técnicu, José Luis Romero, y los del responsable de gabinete,Javier García Álvarez. Tolos nuevos directivos, de los que desveló el director xeneral al Conseyu d’Administración, son asturianos y cuenten con amplies trayectories profesionales en medios de comunicación, o cola administración pública. El mesmu día que se conocíen estos nomamientos los miembros del Conseyu d’Administración visitaben les futures instalaciones que va ocupar l’ente públicu de comunicación nel recintu de la Universidá Llaboral de Xixón. Na visita, el Conseyu d’Adminsitración recibió información directa de los técnicos responsables de l’acondicionamientu del espaciu onde se va instalar la radiotelevisión autonómica, que dieron cuenta del proyectu arquitectónicu y los equipamientos pensaos p’acoyer el núcleu central de la empresa pública. L’hestorial profesional de los nuevos directivos distribuíu a los medios pol mesmu Ente Públicu de Comunicación resume les sos actividaes enantes de pasar a incorporase a TeleAsturies4. Asina Juan José Guerenabarrena Hormaeche, nuevu director d’Antena y Conteníos (Salinas, 1957), ye periodista, Llicenciáu en Filosofía y Lletres y tituláu n’Arte Dramáticu. Ente los años 2000 y 2005 fue director y diseñador de La Otra, el segundu canal de Telemadrid. Fue director adxuntu ente 1999 y 2000 del proyectu La Vía Navarro, que presentó y dirixó Pepe Navarro pa Vía Dixital. Ente 1991 y 1999 trabayó na radiotelevisión autonómica de Madrid en diferentes puestos de responsabilidá: editor y presentador del informativu diariu “Telenoticias fin de semana”; encargóse del diseñu del proyectu “Madrid premiere”; dirixó el programa de radio “Mano a Mano” en Onda Madrid y fue xefe de la sección de Cultura de los servicios informativos de Telemadrid. Tamién fue redactor y presentador del programa “Cremallera”, de TVE (1983-1984). Tien publicao artículos en Diario 16, Primer Acto, Danza79 y colaborao como redactor en El Cultural, suplemento actual del diariu El Mundo. Juan José Guerenabarrena Hormaeches va dirixir les estayes de programación, producción, documentación d’audiencia de radio, televisión, periódicu y portal d’Internet. Asumirá tamién les funciones propies de la Dirección de Informativos. Manuel José Castrillo Álvarez (Xixón, 1969), ye llicenciáu en Ciencies Económiques y Empresariales y Diplomáu n’Empresariales pola Universidá d’Uviéu. Escomenzó a trabayar nel sector audiovisual en Televisión Local Gijón en 1996, cadena de la que foi xefe d’ Administración dende 1997 hasta la fecha. Manuel José Castrillo va desempeñar funciones de dirección administrativa, económico- financiera y de recursos humanos. Francisco Javier Asenjo ye periodista. Dende’l año 2002 hasta anguañu foi director de Localia Televisión Asturies. Nel añu 2001 foi director y Presentador del Programa “La Mar de Bien” en Tele Asturias. Ente 1997 y el 2000 foi director de Televisión Local Gijón, la Ola Producciones y Asturiana de Exclusivas de Publicidad. Ente 1996 y 1997 dirixó Radio Valladolid (SER), la Cadena 40 Principales, Cadena Dial, M-80 y Cadena Rexonal de Castiella y Lleón. De 1991 a 1996 desempeñó la dirección de Radio SER Xixón y M-80. Tamién foi nos años setenta xefe de Publicidá y Relaciones Esternes del Banco de Asturias. Asenjo va dirixir les relaciones corporatives con grandes clientes y asociaciones del sector audiovisual y comercial, asina como coles instituciones de l’Administración y tamién las relaciones comerciales y de marketing. Asinamesmo responsabilizaráse de la puesta en marcha del serviciu de radio y colaborará nel diseñu, execución y control de la programación y producción de programes tanto de radio como de televisión. Flor Puente Rodríguez nació en Tinéu, ye llicenciada en Ciencies de la Información pola Universidá Complutense de Madrid. Ingresó en Telefónica Media nel añu 2001 y hasta el momentu ocupó el cargu de xerente de comunicación de Telefónica Servicios de Música. Fue editora de los informativos en Antena 3 (1989-1997). Inició la so carrera profesional en TVE como redactora del programa “Consumo” nel añu 1982.Puente Rodríguez va dirixir la comunicación esterna ya interna del Ente Públicu y los sos medios y toles sos publicaciones, impreses o electróniques. Va asumir tamién les funciones de responsable de la estaya d’información de televisión, radio y periódicu o portal electrónicu. L’últimu directivu incorporáu, Daniel Álvarez Rodríguez (Mieres, 1967) ye llicenciáu en Derecho pola Universidá d’Uviéu. Ente 2003 y 2005 fue xefe del Serviciu d’ Administración de Personal de la Dirección Xeneral de l’Administración Pública. FUe tamién xefe de la Sección de Personal Laboral de la Dirección Rexonal de la Función Pública en 1998; xefe de la Unidá d’Asuntos Xenerales na Conseyería de Servicios Sociales en 1996 y Técnicu d’Administración na Secretaría Xeneral Técnica de la Conseyería de Sanidá en 1995. Daniel Álvarez desarrollará nel Ente Públicu les funciones propies d’una secretaria xeneral técnica de l’Administración, amás de coordinar les actividaes de los órganos directivos del Ente. 18 de mayu, 2005 0 FacebookTwitterPinterestEmail
Comunicación El politólogu y escritor italianu Giovanni Sartori recibe’l Príncipe d’Asturies de les Ciencies Sociales by asturnet 7 de mayu, 2005 El xuráu del Premiu Príncipe d’Asturies de les Ciencies Sociales decidió apurrir el galardón al politólogu y escritor italianu Giovanni Sartori, ún de los pensadores más influyentes nes últimes décades de la izquierda lliberal europea. Pal xuráu na obra de pensador italianu “especialmente dedicada a la elaboración de una teoría de la democracia, ta siempre presente el so compromisu coles garantíes y les llibertaes de la sociedá abierta”. Sartori tien destacao pola so oposición a Silvio Berlusconi y poles sos controvertíes postures respective a los retos de la inmigración y el multiculturalismu. Según l’acta del xuráu presidíu por Manuel Fraga Iribarne, Giovanni Sartori “reflexona y alerta con particular agudeza sobre los problemes sociales ya institucionales del nuestru tiempu y sobre el l’equilibriu necesariu de los diversos poderes nes sociedaes democrátiques”. Sartori ye anguaño profesor eméritu na universidá neoyorquina de Columbia y de la de Florencia, la ciudá onde nació. La so última obra publicada: “Pluralismu, multiculturalismu y estranxeros” armó una gran controversia dende la so aparición al abordar el tema de la inmigración nes sociedaes desarrollaes como un asuntu enllenu de riesgos pa la fragmentación de la convivencia y del propiu sistema si nun se-y pon ciertos límites, asina como del peligru de crear nuevos guetos dientro de les sociedaes plurales. 7 de mayu, 2005 0 FacebookTwitterPinterestEmail
Comunicación El conceyu de Xixón acueye el primer Foru de les Cultures de les Ciudaes Atlántiques by asturnet 4 de mayu, 2005 La Fundación Municipal de Cultura del Conceyu de Xixón agospia los prósimós díes 8 y 9 de mayu el Primer Foru de les Cultures de les Ciudaes Atlántiques, un alcuentru enmarcáu dientro’l proyectu européu Interreg III B. Cultur*A y que quier afitar les bases d’estratexes de promoción de les distintes identidaes que comparten l’espaciu territorial del Arcu Atlánticu col fin de consiguir visibilizar y facer más atractivu esti ámbitu cultural. El foru de Xixón quier dar a conocer les actuaciones, conclusiones y el balance del proyectu que se vien desenvolviendo dende l’añu 2003 embaxo l’agospiu de la Unión Europea y nel que tán integraes diferentes ciudaes del Arcu Atlánticu. L’alcuentru va valir tamién pa presentar un observatoriu de les polítiques culturales atlántiques y la base de datos anguaño en construcción pa compartir información y recursos ente les ciudaes integres nel proyectuInterreg III B. Cultur*A. A lo llargo de la celebración de Foru entamaránse sesiones de debates sobre la diversidá y la identidá cultural de les ciudaes del Arcu Atlánticu, asina como una reunión de la Comisión pa proponer estratexes y programes culturales comunes ente los distintos organismos institucionales presentes nel alcuentru. El proyectu auspiciáu pola Unión Europea pa les ciudaes del Arcu Atlánticu tenta poner en común un trabayu de xestión cultural destináu a meyorar la difusión y la producción del patrimoniu cultural y artísticu de las ciudades d’esti espaciu xeográficu. La intención ye iguar una rede de trabayu cooperativu de les ciudaes atlántiques nel ámbitu cultural. Xixón ye cabezalera del proyectu al que tan asociaes tamién la ciudá Glasgow (Reinu Uníu), Cork (Irlanda), Rennes, Nantes y Burdeos (Francia), Faro (Portugal), Santiago de Compostela, Avilés y Xerez de la Frontera (España). L’oxetivu fundamental del proyectu ye crear un observatoriu web que reflexe les dinámiques de les ciudaes nel campu cultural y debatir les polítiques emprimaes por estes mesmes ciudaes al través d’una serie de seminarios que se faen dende 2004 y que van servir de base a les futures cooperaciones. En 2004 desenvolviéronse otres actividaes, como el taller de artistes de Xixón dedicáu a la política del arte. 4 de mayu, 2005 0 FacebookTwitterPinterestEmail
Comunicación ASMA organiza un alcuentru d’emprendedores en Madrid by asturnet 26 d'abril, 2005 L’asociacion Asturianos en Madrid (ASMA) va entamar el prósimu 21 de mayu el I Foru Empresarial Asturies-Madrid col que pretende xuntar nun alcuentru de debate y propuestes a emprendedores mozos con un orixen común nel nuestru país y una posible coincidencia d’intereses por compartir idees y proyectos dientro les sos actividaes profesionales. L’alcuentru ta organizaú en colaboración col IDEPA y cola Asociación de Jóvenes Empresarios (AJE)d’Asturies y quier aprovechar el potencial emprendedor que xunten munchos profesionales mozos asturianos fuera de la so tierra. L’alcuentru ta concebíu pola asociación ASMA como una actividá complementaria del Foru Empresarial desenvueltu a lo llargo del añu 2004 en colaboración con VALNALOn y quier valir pa facilitar la identificación y definición de perfiles identificativos de los emprendedores mozos radicaos en Madrid y otros llugares fuera d’Asturies. Otros oxetivos cimeros del Foru son los de facilitar un conocimientu y contactu fluíu ente’l sector empresarial d’orixen asturianu afincáu na capital del estáu y el sector empresarial allugáu na nuestra comunidá. Con esti alcuentru y atopaes asemeyaes tenta crease un grupu d’interés asturianu que potencie les sinerxes d’entrambos colectivos empresariales estimulando la idea d’un potencial círculu d’ ufierta y demanda nel que se priorice la xeneración d’oportunidaes de negociu en beneficiu mutuu.Tamién ye un oxetivu el de tomar conciencia del potencial de la base social de ASMA neses oportunidaes de negociu y na dimensión llaboral pa la captación de recursos altamente cualificaos. El Foru Empresarial quier fomentar el debate sobre temes horizontales y sectoriales d’interés conxuntu nel desarrollu d’actividaes económique que puedan demandar el respaldu de l’ Administración del Principáu y elaborar un compendiu de recomendaciones al respective. El Foru Empresarial va celebrase el 21 de mayu nel Club de Negocios NEGOCENTER de La Castellana, 91 y va empobináu a profesionales, emprendedores y empresarios asturianos afincaos en Madrid. Más información 26 d'abril, 2005 0 FacebookTwitterPinterestEmail
Comunicación La reflexón alrodiu de los conflictos centra los alcuentros de Les Otres Cares del Planeta by asturnet 17 d'abril, 2005 Les séptimes xornaes de Les Otres Cares del Planeta que se tán celebrando en Xixón a lo llargo d’esta selmana tenten atopar puntos de reflexón común alrodiu del tema xeneral del conflictu. Diversos conflictos de la realidá actual centren los debates y los discutinos d’estos alcuentros onde tamién hai un espaciu pa les propuestes creatives y pa la diversión. Les xornaes tán organizaes por un garrapiellu de colectivos sociales atropaos embaxo’l proyectu común d’ufiertar rellumos de pensamientu críticu énte les nubes solombriegues del mundu globalizáu. Les Otres Cares del Planeta celébrense en Xixón dende’l pasáu xueves 14 y van durar hasta’l prósimu sábadu 23. El programa inclúi debates y meses redondes sobre diversos conflictos de la realidá contemporánea, proyección de cortometraxes y documentales, actuaciones músicales y intervenciones teatrales na cai. La xornada pa esti llunes 18 va tar centrada alrodiu’l conflictu de ser muyer. Embaxo’l títulu: “Muyeres del Norte y del Sur”, un debate xuntará a Maria Elena Alvarado Ayala, militante del MSM (Movimientu Salvadoreñu de Muyeres; Maria Jesús Pico Mendez, Colaboradora de Xurtir, asociación de muyeres pola reinserción llaboral; y a la psicóloga Pilar Sampedro. Nesta xornada proyectaráse’ cortu “Mujeres en conflicto” y habrá incursiones teatrales a cargu del colectivu Higiénico Papel. La xornada de mañana martes va tar dedicada a la situación llaboral de la xente mozo n’Asturies. Nel debate van participar Holm Detev Köhler, profesor del Departamento de Economía Aplicada de la Universidá d’Uviéu;Alejandro Viciosa Miño, trabayador de pequeña empresa y afiliáu a CCOO; y un representante de l’asociación Asturianos en Madrid (ASMA). Xunta’l debate proyectaráse’l documental “A la cola”, premiáu nel Festival de Cine de Xixón como meyor proyectu cinematográficu de relizadores mozos. Les xornaes van siguir hasta’l sábadu 23 y rematarán con una cena popular na cai en Cimavilla, entamada en colaboración cola asociación de vecinos “Gigia” del barriu playu. Más información 17 d'abril, 2005 0 FacebookTwitterPinterestEmail
Comunicación Stephen Hawking abre los actos de conmembranza de la Fundación Príncipe con una conferencia sobro la realidá de la naturaleza by asturnet 11 d'abril, 2005 L’astrofísicu Stephen Hawking ufierta esta tarde nel Auditoriu d’Uviéu una conferencia sobro los sos trabayos alrodiu de los oríxenes del universu nun actu que va servir pa inaugurar el programa de celebraciones col que la Fundación Príncipe d’Asturies quier conmembrar el venticincu aniversariu de la creación de los premios que lleven el so nome. Los Príncipes d’Asturies presidirán un actu que va cuntar tamien cola presencia de dalgunos de los galardonaos polos Premios de la Fundación n’anteriores ocasiones. L’actu nel que Hawking va ofrecer la so conferencia titulada “La realidá de la naturalez” tendrá una solemnidà asemeyada a la de les ceremonies d’entrega de los Premios Príncipe d’Asturies, cola presidencia del propiu heriede de la corona y la so muyer Letizia Ortiz, y na que Felipe de Borbón pronunciará un discursu alrodiu del aniversariu de la Fundación y de la presencia del formulador de la teoría del Big Bang. Diverses figures del mundu de la política, la cultura y l’ámbitu científicu galardonaes n’anteriores ocasiones van tar nel actu, ente elles, tienen confirmao la so asistencia l’astronauta Pedro Duque, el cineasta Luis García Berlanga, la tenista Arancha Sánchez Vicario y el científicu Luis Patarroyo. La conferencia de Stephen Hawking va ser illustrada con dos documentales alrodiu de la so vida y investigaciones que podrán vese’l prósimu llunes proyectaos nel salón d’actos del centru cultural de Cajastur n’Uviéu. 11 d'abril, 2005 0 FacebookTwitterPinterestEmail
Comunicación Gustavo Fernández ganal Primer Certame Periodísticu Moscones en Xixón by asturnet 31 de marzu, 2005 Gustavo Adolfo Fernández ta acabante de ganar col trabayu El mercado de Grado en peligro espublizáu nel diariu La Nueva Españal Primer Certame Periodísticu Moscones en Xixón, entamáu pola asociación del mesmu nome y que va entregasel domingu día 3 dabril na Capiella Los Dolores de Grao. Previamente pa esti sábadu día 2 ta prevista una conferencia sobre periodismo y llingua asturiana a les 20 hores na Casa de la Cultura, que va pronuncia el director dAsturnews, Próspero Morán. La conferencia de Próspero Morán sobro les rellaciones entel periodismu y la llingua asturiana va abrir esti sábado día 2, a les 8 la tarde, les actividaes programaes con motivo desti Primer Certame Periodísticu del que lactu cimeru desendolcarásel domingu a les 12 y media na Capiella Los Dolores. Nesi actu amás dentregasel Premiu desti Primer Certame Periodísticu Moscones en Xixón actuará la Coral de Grao y darré serviráse nel patiu de la Casa de la Cultura un aperitivu. LAsociación Moscones en Xixón va poner a disposición de los sos socios y acompañantes, de baldre, un autocar con salida de Xixón a les 10 de la mañana del domingu y regresu a les 7 de la tarde. El ganador desti Primer Certame Periodísticu sobre Grau, Gustavo Adolfo Ferández, ye llicenciáu nHistoria, especialidá Archivística y Biblioteconomía, pola Universidá de Santiago de Compostela y dende 1998 trabaya como Bibliotecariu nel Ayuntamiento de Grao. En cuantes a la so experiencia nos medios de comunicación , foi corresponsal del diariu La Nueva España na Comarca de Grao dende 1995 a 1998 y tamién foi corresponsal desa zona pal Semanariu Les Noticies. 31 de marzu, 2005 0 FacebookTwitterPinterestEmail