Xuristes pol Asturianu reprocha públicamente al PSOE y PP el so intentu de desaniciar dafechu la llingua

La Xunta Direutiva del Aconceyamientu de Xuristes pol Asturianu, col comunicáu darréu, quier reprochar públicamente a los partíos PSOE y PP el so intentu de desaniciar dafechu la llingua asturiana pente medies de la reforma del artículu 4 del Estatutu d’Autonomía.

Nel mesmu sen, pidi a tolos asociaos y simpatizantes qu’acudan xunto cola familia y amigos al actu públicu que sol llema ¡RESPETU P’ASTURIES! tendrá llugar el XUEVES 17, A LES 19 HORES, NA SALA DE CÁMARA DEL AUDITORIU “PRÍNCIPE FELIPE” D’UVIÉU.

Énte’l proyeutu d’artículu 4 pal Estatutu d’Autonomía apautáu por PSOE y PP, l’Aconceyamientu de Xuristes pol Asturianu considera un deber cívicu alvertir a tola ciudadanía que:

1. El so conteníu y espíritu ta sacáu del Decretu 2929/1975 (art. 1: “Las lenguas regionales son patrimonio cultural de la Nación española… Su conocimiento y uso será amparado y protegido por la acción del Estado”) pel que’l réxime franquista, yá nes boquiaes, intentó desaniciar les xustes reivindicaciones de la España plurillíngüe.

2. Empobínase a la escontra d’ún de los principales oxetivos de la Constitución, recoyíu nel so Preámbulo: “La Nación española proclama la so voluntá de protexer a tolos españoles y pueblos d’España nel exerciciu de les sos llingües”.

3. Desprecia los mandaos de la Carta Europea de les Llingües Rexonales o Minoritaries, tratáu internacional ratificáu por España que forma parte del denomáu bloque de constitucionalidá, onde se proclama, artículu 7.2, que “Les Partes (ratificantes) comprométense a desaniciar, si entá nun lo ficieron, tou distingu, esclusión, restricción o preferencia inxustificaes con repeutu al emplegu d’una llingua rexonal o minoritaria col oxetivu de desalendar o poner en pelligru’l caltenimientu o’l desendolcu de la mesma.

4. Ye una vergoñosa agresión a la llingua asturiana y a los drechos fundamentales de los sos falantes y un intolerable actu de discriminación pa con tolos asturianos que somos trataos por el PSOE y el PP, partíos qu’en toles otres comunidaes autónomes billingües sofiten la cooficialidá, como ciudadanos con menos valir que’l restu de los españoles.