Xuan Bello algama’l Premiu Nacional de Lliteratura Asturiana na so primer edición

Xuan Bello qye l’autor qu’algama esti añu0l Premiu Nacional de Lliteratura Asturiana na so primer edición, sigún  dio anuncia l’Academia de la Llingua Asturiana esti vienres 13 de xineru nuna rueda de prensa nel so llar n’Uviéu. 

Nesa rueda de prensa, que se cellebró al meudía del vienres, diose noticia de qu’aconceyáu’l xuráu del Premiu Nacional de Lliteratura Asturiana,  presidíu por Dña. Ana María Cano González, Presidenta de l’ALLA, y formáu polos miembros de númberu de la institución, D. Xosé Antón González Riaño, D. Xosé Ramón Iglesias Cueva y Dña. Carmen Muñiz Cachón; los profesores de la Universidá d’Uviéu D. José Luis García Martín y D. Leopoldo Sánchez Torre, y faciendo de secretariu D. Fernando Padilla Palicio, Direutor Xeneral de Planificación Llingüística y Normalización, en representación del Gobiernu del Principáu d’Asturies, diose llectura a  les candidatures presentaes nesta edición correspondientes a los  escritores  D. Xuan Bello, D. Antón García, D. Roberto González-Quevedo, Dña. Berta Piñán y D. Xuan Xosé Sánchez Vicente.

Dempués d’una esposición de los méritos de los candidatos, na que s’afitó que cualquiera d’ellos yera merecedor del premiu, tuvo llugar un alderique ente los miembros del xuráu, procediéndose darréu a una serie de votaciones. Tres d’elles, los miembros del xuráu apautáronse en conceder el Premiu Nacional de Lliteratura Asturiana na convocatoria de 2017 al escritor Xuan Bello “pola estraordinaria calidá y relevancia de la so trayeutoria lliteraria (qu’amiesta poesía y narrativa), que vien xugando un papel fundamental na dignificación y visualización de la lliteratura asturiana y de la propia llingua, asina como pola mor de la proyeición estatal ya internacional qu’algama la so obra con numberoses traducciones a estremaes llingües”.