Vega diz que cola prollongación presupuestaria, la firma del conveniu de los servicios de normalización ye técnicamente imposible

Consuelo Vega achacó la situación na que tan los servicios de normalización llingüística del Principáu a la situación de prollongación presupuestaria. “Cola prollongación presupuestaria, la firma del conveniu ye tecnicamente imposible”, declaró la directora xeneral de Promoción Cultural y Política Llingüística saliendo al pasu de les critiques de la Xunta Pola Defensa de la Llingua Asutriana nes que se responsabilizaba a la Conseyería de Cultura de zarrar los servicios de Normalización Llingüística de Mieres y Samartín del Rei Aureliu y de mantener el restu en situación precaria.

Vega garantizó per otra parte qu’estos dos servicios, el de Mieres ya’l de Samartín, van tener garantizáu’l funcionamientu calteniendo les sovenciones del añu pasáu pero ensín ampliar la dotación económica pa caún de los centros, como según la directora tenía previsto facer el Principáu nel nuevu presupuesto. Consuelo Vega recordó que fai ocho díes que la Conseyería unvio la convocatoria de sovenciones, nes mesmes condiciones que en 2007, a tolos conceyos onde operen estos servicios.