Valledor considera que Juan Vázquez vulnera la llegalidá al refugar una tesis n’asturianu

La negativa de la Universidá d’Uviéu, espresada directamente pol so rector, Juan Vázquez, a admitir la tesis doctoral n’asturianu del hestoriador Faustino Zapico foi criticada duramente pol conseyeru de Xusticia y Esteriores Francisco Javier García Valledor pal que l’actitú del cabezaleru de la institución académica ye “dafechu inxustificable” y puede significar una vulneración de la lexislación vixente nel Principáu alrodiu del usu de la nuestra llingua.

Valledor, qu’asiste en Bruseles a les xornaes sobre I+D entamaes pol gobiernu asturianu na capital comunitaria, manifestó ende’l so refugue al determín del rector Vázquez de nun permitir el rexistru de la tesis doctoral de Faustino Zapico, un fechu que’l conseyeru considera “inaceptable”. Como amuesa del so refugue por esa actitú del rector, anunció que nengún representante del so departamentu va asistir al actu de presentación del Master en Desarrollu qu’entama la Universidá d’Uviéu pa esti miércoles 6.

Juan Vázquez asumió del so puñu y lletra’l refugue a la posibilidá de que l’autor de la tesis n’asturianu pudiera rexistrala na llingua na que se ficiera y se lleera énte’l tribunal académicu que la xulgó, argumentando que’l calter de llingua non oficial del asturianu torgaba cualquier otra opción.

Vázquez recibió otra mocada importante ayer a la so actitú de negar la inscripción de la tesis n’asturianu de Faustino Zapico en voz del director de l’Axencia Asturiana de Cooperación Rafael Palacios que convocó una rueda de prensa pa espresar el so refugue a que la Universidá negare’l derechu del autor d’esa tesis a presentar la so memoria-resumen n’asturianu y anunció que’l so departamentu d’agora pa en delantre va replantease entamar convenios de cooperación en materia de derechos humanos “con una institución que nun los respeta”. Talo ficiera’l so conseyeru en Bruselas, Palacios declaró que como amuesa de protesta pola actitú de Vázquez, nengún miembru de la Conseyería diba asistir al actu de presentación del Master en Cooperación al Desarrollu entamáu pola Universidá d’Uviéu.

El rector recibe destamiente per mano del conseyeru Valledor y del so director de Cooperación un nuevu varapalu a la so xestión, nunos díes na que diversos colectivos de la comunidá universitaria la cuestionaran y darréu destituir a la so colaboradora d’equipu y responsable d’Estensión Universitaria, Paz de Andrés por asistir al homenaxe n’alcordanza del anterior rector y rival de Vázquez, Julio Rodríguez. Alrodiu d’esta destitución sintiéronse abondes voces que dende la comunidá universitaria asturiana critiquen el sesgu autoritariu y personalista col que l’actual rector exerce’l so cargu. El rapapolvu de Valledor vien a sumase a estes voces que ponen a Juan Vázquez nuna situación hasta agora non vivida por nengún otru antecesor nel so cargu.