Valledor afirma qu’IX nun va pactar cola FSA-PSOE si nun hai oficialidá

El Conseyeru de Xusticia, Francisco Javier García Valledor, afirmó ayeri que la negativa de la FSA a la oficialidá del asturianu na prósima reforma del estatutu dificultaría la reedición del alcuerdu de gobiernu, que mantienen les dos fuerces polítiques. Valledor anunciaba qu’ensin oficialidá nun diba ser posible un nuevu pactu de gobiernu pasaes les elecciones de mayu. Pal conseyeru sedría “inconcebible” volver a pactar cola FSA-PSOE si esti partíu nun avanzara hacia posiciones favorables al reconocimientu de los derechos llingüísticos.
Valledor citó, amás, otros asuntos como’l de la Inspección de Trabayu énte aquellos qu’habríen tar xestionaos por Asturies a partir de les próximes elecciones.

El conseyeru de Xusticia, y númeru 2 de la candidatura d’Izquierda Xunida a la Xunta Xeneral, dixo que na prósima llexislatura se desenvolverá la reforma del Estatutu y que nun se podría entender un pactu de gobiernu que nun contemplara los asuntos básicos de la reforma.
Pa Valledor la imposibilidá de reformar l’Estatutu n’esta llexilatura pasada débese a la falta de responsabilidá de PP y FSA-PSOE na d’encarar esti procesu. Causa pola que, según el conseyeru, Asturies se situe nel vagón de cola de les autonomíes.
Sicasí’l conseyeru Valledor consideró que nestos cuatro años se desenvolvió un camín pedagóxicu, qu’anque llentu, ta faciendo posible que dientro de la FSA-PSOE se vaya verbalizando’l la pallabra oficialidá, esti deprendizaxe va reforzándose nes conciencies de los dirixentes del partíu mayoritariu de la Xunta Xeneral.