Valdés prepárase pa celebrar el centenariu del científicu y Premiu Nóbel Severo Ochoa

El conceyu de Valdés quier implicase nos actos de celebración del Añu Ochoa, dedicáu al centenariu del científicu y Premiu Nóbel asturianu. A lo llargo d’esti añu diverses instituciones, entidaes privaes y la Fundación Severo y Carmen Ochoa van desenvolver diverses actividaes pa recordar la figura y el legáu del sabiu. La coordinación de toles iniciatives va correr a cargu d’una Comisión estatal, empobinada pola ministra d’Educación y Ciencia, María Jesús Sansegundo y presidida pola Casa Real. El conceyu valdesanu, la Universidá d’Uviéu y el gobiernu del Principáu quieren contribuir cola so participación y el sofitu institucional a remembrar l’orixe asturianu del científicu nacíu en L.luarca en 1905.

L’alcalde de Valdés Juan Fernández Pelleiro manifestó en declaraciones a distintos medios d’Asturies la intención del ayuntamientu que preside n’implicase na celebración del Añu Ochoa “col fin d’averar la figura del ilustre investigador a la sociedá y sobremanera a los más mozos”. Nesi sen, el conceyu natal del científicu, sumaráse a los actos programaos pola Comisión estatal xunto al restu de les instituciones estatales. Una de les iniciatives que Valdés quier agospiar ye la presencia en L.luarca de la esposición “El legado científico de los Ochoa” que circulará por varios llugares del estáu.

A lo llargo de la prósima seronda múltiples actos van encargase de remembrar la figura del Premiu Nóbel asturianu, con diversos alcuentros y congresos científicos nos que van tener un papel destacáu nomes como los de l’asturiana Margarita Salas, Santiago Grisolía o Carlos López Otín. La participación asturiana nel centenariu preténdese que sea lo más amplia posible y amás de la implicación del gobiernu autonómicu y el conceyu natal d’Ochoa, otres entidaes públiques y privaes como Caxastur o la Universidá d’Uviéu van contribuir a la celebración.