Uviéu suscribe’l “Manifiestu del Camín Primitivu” y entra na Ruta Xacobea primixenia

El plenu de xunetu del Conceyu d’Uviéu dio lluz verde, por unanimidá, a la adscripción del Consistoriu uvieín al Manifiestu del Camín primitivu de Santiago y la inclusión, d’esta Alministración Local, nel Grupu de Trabayu compuestu pola Conseyería d’Educación, Cultura y Deportes, representada pola Dirección xeneral de Patrimoniu y, amás, los conceyos de Les Regueres, Grau, Salas, Tinéu, Ayande, Grandas de Salime, A Fonsagrada y Baleira, amás de les asociaciones y colectivos d’Amigos del Camín de Santiago.

“Tamos ante una gran oportunidá cultural y turística de potenciar el Camín primixeniu”, defendió’l conceyal de Cultura, Roberto Sánchez Ramos. Y faló de “una iniciativa social, una política estructural que, al marxe de quien gobierne, tien de siguir vixente porque esti trazáu, de los 39 que lleguen a Santiago, ye unu de los más curiosos y acaba de ser nomáu Patrimoniu de la Humanidá”. Tolos conceyales dieron el so votu a favor, magar la conceyala popular, María Ablanedo recordó l’esfuerzu lleváu a cabu pol anterior equipu de gobiernu: “Vienen celebrándose dende 2011 congresos, hai un albergue que ye’l tercer allugamientu que tien, en función del aumentu progresivu de pelegrinos… y que foi’l PP quien lu hai fechu.

Nesti mesmu plenu en 2013 aprobóse un manifiestu nel qu’encamentaba al Principáu a promocionar el Camín Primitivu. Nun se parte, pos, de la nada (…) l’arranque d’esta ruta ye la Catedral, a quien l’actual equipu de gobiernu negó la subvención que’l Consistoriu dába-y”.
Cambéu d’hora nes sesiones

Al entamu de la sesión plenaria aprobóse tamién adelantrar los plenos a los cinco de la tarde en llugar d’a los seis, como se veníen celebrando hasta agora.