Uviéu lleva a la Xunta Xeneral del Principáu les sos polítiques sociales

La conceyala delegada de Polítiques Sociales compareció esta selmana pasada  na Comisión de Derechos Sociales y Bienestar de la institución rexonal onde desplicó les sos polítiques sociales.

Nella, Leticia González remanó “una serie de reflexones en redol al Proyectu de Llei de Garantía de Derechos y Prestaciones Vitales”. La conceyala del conceyu uvieín amosóse “en sintonía colos oxetivos plantegaos na Llei tocantes a la necesidá de combatir la esclusión social y la probeza”, aspeutos que se recueyen na Esposición de Motivos del testu lexislativu.

González espresó dos observaciones de calter xeneral, una que tien que ver cola definición que se da del Salariu Social Básicu. Al respeutu, manifestó que “si’l salariu social básicu tien de cubrir necesidaes vitales básiques, los recursos municipales habríen de destinase a casos d’emerxencies de les families que la perciben”.

La otra observación foi relativa a les consecuencies económiques del conteníu de la Llei pa los conceyos. Al respeutu, la conceyala de Polítiques Sociales calificó de “bien escasa” la regulación, añediendo que “nun garantiza la suficiencia financiera de l’Alministración Local para l’exerciciu de les competencies que l’artículu 83 del testu llegal atribúye-y”.