Uviéu celebra’l #8M y encamienta a la ciudadanía a sumase a la fuelga

Uviéu va de lila y celebra el 8M encamentando a la ciudadanía a sumase a la fuelga pol Día Internacional de la Muyer.

La Corporación municipal, encabeza pol Alcalde, y cola presencia de los grupos municipales de Somos, PSOE, Izquierda Xunida y Ciudadanos, celebraron l’actu institucional del Consistoriu, con motivu del 8M, Día Internacional de la Muyer, en Villa Madalena. L’actu, al qu’asistieron, ente otres persones, la directora de la Fundación Princesa d’Asturies, Teresa Sanjurjo, tuvo amenizáu poles muyeres integrantes de la Real Banda de Gaites Ciudad d’Uviéu y presentáu pola periodista Sonia Fidalgo. A entrambos llaos de los xardinos, 11 paneles que recuerden les grandes fuelgues y marches feministes de la hestoria.

La conceyala d’Atención a les Persones ya Igualdá, Marisa Ponga, empezó les intervenciones encamentando a toos y a toes “a sumase a la fuelga de mañana, día 8, na plaza de la Güelga, en Xixón”, y recordó “el nuesu compromisu cola igualdá real y cola muyer, sol paradigma ‘Paramos p’avanzar'” y col convencimiento “de que tenemos que romper esos techos de cristal (…) sofitar la igualdá salarial, revalorizar a les muyeres y siguir trabayando por una igualdá efectiva”. La edil venció-y l’atril a la so compañera Cristina Pontón (IX) que lleó un testu d’Almudena Grandes “apináu de palabres guapes pa cuntar daqué tan desagradable como la falta d’igualdá”. “El feminismu impulsó la única revolución social triunfante nel sieglu XX, la única capaz de tresformar efectivamente la vida de les persones. Si nós paramos, el mundu parará esti 8 de marzu”, aseguró Pontón.
La vicealcaldesa, Ana Taboada, por Somos, aportunó en que “toos y toes tendríamos de ser feministes porque’l feminismu ye igualdá” y adelantró que mañana, na fuelga, “vamos tar sofitando a tantes muyeres que nun pueden llevantar la so voz, porque son víctimes de la violencia machista, porque tán nes sos cases, porque son migrantes en precaries condiciones…” Y, citando a Clara Campoamor, concluyó: “La llibertá apriéndese exerciéndola”.

L’Alcalde foi l’encargáu de cerrar l’actu institucional. El primer conceyal empezó dando les gracies “por allegar a un actu que pretende ser l’antoxana d’un 8 de marzu distintu a los anteriores. Creo que toes y toos vamos tar d’alcuerdu en que la llucha y la reivindicación del movimientu feminista, que foi constante y valiente dende va décades ya inclusive sieglos, adquirió nos últimos tiempos xuna relevancia que munchos deseyábamos dende va años.  Escuchemos en munches ocasiones nos últimos meses que ‘yá nun hai marcha tras’, qu’esa llucha y esa revolución de les muyeres yá nun se volverá callar nunca. Ye lo que toos deseyamos de corazón porque la igualdá nun puede siguir siendo un deséu, xuna utopía. La igualdá real ye xuna cuestión de pura y absoluta xusticia. Asina de senciellu. Nun puede ser que daquién sía más o menos qu’otra persona pol fechu de ser home o muyer”.