Unicef apurre a Xixón el sellu que lu reconoz como Ciudá Amiga de la Infancia

Unicef apurrió a Xixón el sellu que lu reconoz como Ciudá Amiga de la Infancia nun actu que tuvo llugar el 15 de payares nel Paraninfu del Palaciu de la Madalena, en Santander. El galardón foi recoyíu por Eva Illán Méndez, Concejala de Bienestar Social y Participación Ciudadana.

“Ser Ciudá Amiga de la Infancia ye más qu’un sellu, ye escoyer ser una ciudá onde los derechos faigan patentes y verdaderos, onde se conviva en redol a los derechos humanos y de los neños, y onde ellos y elles sían el centru”. Asina s’espresó Carmelo Agudu, el presidente de Unicef Comité Español, demientres la entrega del Sellu de Reconocencia de Ciudá Amiga de la Infancia (CAI) a 80 conceyos, 55 d’ellos per primer vegada, nuna ceremonia celebrada nel Paraninfu del Palaciu de la Madalena, en Santander. Estes nueves incorporaciones amplíen la rede a 170 conceyos y ciudaes comprometíes na promoción y implementación de polítiques municipales a favor de los derechos de los neños y neñes en toa España.

Xuntu con Xixón, 10 conceyos asturianos llogren per primer vegada la reconocencia de Ciudá Amiga de la Infancia (CAI). Tratase de Carreño, Coaña, Pravia, Illas, Sobrescobiu, Uviéu, Noreña, Llanera, Grau y Ribesella. Ente que otros dos, Salas y Castrillón, anueven la so reconocencia y reciben mención d’excelencia per parte del Programa.

El programa CAI promueve el compromisu de les instituciones locales por qu’integren el diseñu de polítiques públiques eficaces basaes na Convención sobre los Derechos del Neñu, promocionen la participación infantil ya impulsen aliances ente tolos actores rellacionaos cola infancia a nivel local. Tamién busca consiguir que la participación infantil nun sía solo un derechu, sinón tamién una ferramienta nel diseñu de polítiques públiques.