Una quinta parte de les midíes del plan de normalización social deberá tar executada en 2005

Una quinta parte de les midíes previstes nel Plan pa la Normalización Social del Asturianu habrá tar en marcha esti mesmu añu. El documentu, que prioriza nel tiempu la promoción municipal del idioma, la formación de funcionarios, y l’alfabetización d’adultos, ente otres acciones, evita concretar al másimu los plazos d’execución del 76 por cientu de les midíes del plan, porcentaxe pal que s’establez la puesta en práctica “dende 2005”.

D’esti mou, tres cuartes partes de los conteníos del testu queden baxo un más ambiguu criteriu d’evaluación, yá que les espresiones “dende 2005” y “a partir de 2005” consignaes nel documentu pa 52 de les 68 acciones concretes plantegaes escapen a futures revisiones precises del grau de cumplimientu de cada midida.

Pa 2005, primeru de los tres años que tará en vigor el plan hasta les prósimes elecciones autonómiques en 2007, el plan de normalización obliga al Gobiernu asturianu a tener yá a plenu funcionamientu sendos convenios cola Alministración del Estáu pa garantizar l’usu de la llingua asturiana en dependencies estatales nel Principáu y na toponimia. Tamién nesti mesmu añu habrá ponese en marcha la formación llingüística de funcionarios autonómicos, la promoción d’estudios nel ámbitu municipal y la fechura d’unes bases pal tratamientu del asturianu nos medios de comunicación.

Currículos y adultos

Nel capítulu de les midíes más inminentes, el documentu que determinará la política llingüística d’equí a 2007 inclúi amás retoques nos currículos educativos de Primaria y Secundaria, un programa integral d’alfabetización d’adultos y l’asoleyamientu de materiales didácticos multimedia pa que los escolinos deprendan Llingua valiéndose de les nueves tecnoloxíes.

Fuera de la estaya de la enseñanza, el plan de normalización da-y prioridá tamién a la regulación interna de la Xunta de Toponimia y al fomentu l’usu del asturianu nes asociaciones. Nel estremu opuestu, les midíes que más se posterguen nel tiempu son la creación d’un Premiu de les Lletres Asturianes, l’amuesa d’una gran esposición itinerante y la fechura d’un estudiu xurídicu sobro la especialización de los profesores de Llingua fuera de la Universidá (les tres habrán executase en 2006); y la edición del nomenclátor y el mapa de topónimos oficiales del Principáu, yá en 2007.

Archivu. El Gobiernu implica al Estáu na defensa l’asturianu y oblígase a recuperar tolos nomes de llugar en 2007