Trescorrales va acoyer, los díes 6, 7 y 8 de payares, el VI Alcuentru Nacional de l’Alianza contra la Fame y la Malnutrición

La conceyala de Polítiques Sociales, Leticia González, presentó esta la selmana pasada’l VI Alcuentru Nacional de l’Alianza contra la Fame y la Malnutrición (ACHM-Y), que se va celebrar na plaza de Trescorrales, del 6 al 8 de payares, sol títulu “La Nutrición na Opinión Pública. El Papel de la Comunicación”.

Tamién comparecieron na presentación la conceyala Concepción Méndez; Antonio Blanco Prieto, presidente de la Fundación Alimerka y secretariu de la ACHM y Alfonso Rodríguez Fidalgo, director honoríficu de la ACHM-Y. La responsable municipal de Polítiques sociales recordó que “el Conceyu d’Uviéu forma parte, dende la so creación nel añu 2013, d’Alianza contra la Fame y la malnutrición d’España, organización que nació n’Asturies y que foi estendiendo adulces, tando integrada anguaño por 16 socios. Tratase d’un espaciu neutral de diálogu, integráu por entidaes públiques y privaes que llograron arrexuntase para trabayar con unos oxetivos comunes y escorrer unos fines que nun son nada baladíes: erradicar la fame y la malnutrición. El Consistoriu, dende un principiu, consideró incuestionable la so participación nesta organización yá que, dende’l paradigma de la glo-localidá, creemos que toos podemos y tenemos d’aunir esfuerzos en favor de la seguridá alimentaria de toles persones”.

“Los fines principales de l’Alianza son la concienciación y participación social, l’establecimientu de foros d’estudiu, alderique ya intercambiu d’información, y la movilización de recursos para desenvolver actividaes coherentes coles mires de contribuyir a la erradicación de la fame y la malnutrición”, añedió Leticia González y sorrayó que “queremos contribuyir a xenerar y sofitar midíes de sensibilización y d’asistencia social directa, promoviendo la concienciación y participación social. Y para tratar d’implicar tola ciudadanía na llucha contra la fame y porque creemos que namá dende la pluralidá va ser posible llegar a tola sociedá, l’Alianza entama un Alcuentru Añal, como’l que güei vos presentamos.  A toles entidaes qu’integren l’Alianza doi-yos les gracies pol so esfuerzu, implicación y participación en toes y cada una de les actuaciones que se ponen en marcha, porque sumar siempres ye positivu y porque xuntos siempres vamos poder algamar más y meyores resultaos. Para rematar, namá me queda convidar a tolos ciudadanos a qu’asistan a esti VI Alcuentru, y n’especial a los medios de comunicación porque nesta ocasión analizará’l conceutu de nutrición y l’impactu de la comunicación nos nuesos vezos de salú”.

La primer xornada, el miércoles 6 payares 2019, va empezar presentando les conclusiones del V Alcuentru de la ACHM-Y: “Malnutrición; faltes, escesos o desequilibrios”; según la Guía d’Encamientos para l’Acción 2018. Darréu va tener llugar l’alderique, distribuyíu en delles meses de discutiniu, venceyaes a la Publicidá, la Comunicación Dixital, y los Medios Tradicionales.  La xornada va concluyir cola celebración d’un plenariu del que se van estrayer les conclusiones aldericaes en cada sector; y, finalmente, va tener llugar una actividá cultural venceyada a la tema de la xornada. La xornada del xueves 7 de payares de 2019 va centrar n’analizar y presentar les conclusiones del VI Alcuentru de la ACHM-Y; según la presentación d’acciones de sensibilización y divulgación realizaes.

Los díes 7 y 8 de payares tán dedicaos a la esposición fotográfica ‘Bodegones Contemporaneos. ¿Qué tenemos na mesa güei?’, disponible de 12.00 a 20.00 hores na plaza de Trascorrales. La entrada ye llibre y gratuita.