Cine

El Centru Cultural Valey de Piedrasblancas (Castrillón), va acoyer la proyección de la película pa neños n’asturianu “Los viaxes de Gulliver”, el viniente 9 d’ochobre a les 11,30 hores.

Na película, doblada al asturianu por Gonzali Producciones, el barcu nel que viaxa Gulliver naufraga y la mar arrástralu a la costa del país de Lilliput, un llugar habitáu por unos homucos perpequeños.

Al esconsonar, Gulliver descubre que ye prisioneru d’estos entrañables seres. Por embargu, cuando la princesa de Lilliput y el príncipe d’un reinu vecín tán a piques de casar, entama una absurda guerra ente damos pueblos y Gulliver tendrá d’usar el so inxeniu pa salvar la ceremonia.

L’Academia de les Artes y les Ciencies Cinematográfiques de Hollywood fizo anuncia esto martes pela nueche nun comunicáu que les candidatures a los Oscar van conocese esti 10 de xineru, cinco díes antes de lo que taba previsto, col obxetivu de da-yos a los académicos y al públicu en xeneral un periodu mayor pa ver les películes nomaes y darréu perconoceles.

El procesu de nominaciones va quedar abiertu’l 17 d’avientu y va cerrase el 3 de xineru. La tradicional xinta entamada pola Academia pa los candidatos va tener llugar el 4 de febreru y cuatro díes depués abrirase’l plazu pa escoyer los ganadores.

La organización fizo alcordanza ayer nesti comunicáu que pa la próxima edición de los Oscar va emplegase por primer vegada’l votu electrónicu ente los sos miembros, al traviés d’un sistema ellaboráu en comuña poles empreses Pricewaterhouse Coopers y Everyone Counts.

El nuevu tráiler del esperau filme de Peter Jackson “El Hobbit: Un viaxe inesperáu”, amuesa la calidá que va tener la primera de los trés películes coles que Peter Jackson torna a la Tierra Media pa rellatar los fechos anteriores a El Señor de los Anillos, basándose na novela cola que Tolkien completó la so obra cimera.

El nuevu trailer tien más de dos minutos de duración y amuesa abondes imaxes que nun foron vistes nos tráilers que lu precedieron, llegando nuna fecha enforma significativa: la selmana dedicada a Tolkien en tol mundu, col motivu del aniversariu qu’esti vienres 21 de setiembre celebra l’apaición hai 75 años de la so primer obra.

Martin Freeman, qu’encarna al mozu Bilbo Bolsón, ye’l protagonista d’esta aventura que lu va llevar, al pie de la tropa de trelce nanos encabezada por Thorin Escudu de Carbayu (Richard Armitage) y el magu Gandalf (papel nel que repite Sir Ian McKellen), hasta’l Monte Solitariu en busca de la gran ayalga que curia’l tarrecible dragón Smaug.

“El Hobbit: Un viaxe inesperáu” va estrenase nos cines el 14 d’avientu de 2012, dando pasu un añu dempués a la segunda entrega, “El Hobbit: L’ablayamientu de Smaug”, que va llegar a les sales el 13 d’avientu de 2013. Nun va haber qu’esperar tantu pa finar la triloxía porque la tercer entrega, “El Hobbit: Partida y regresu” ta previsto que puea estrenase’l 18 de xunetu de 2014.

En dientro la Vagamar de L’Arribada 2012 va presentase y proyectase’l DVD Esbilla 2012, editáu por Gonzali Producciones y patrocináu pola FMCEyUP del Ayuntamientu de Xixón. Esbilla 2012 ye una amuesa de curtiumetraxes y documentales rodaos n’Asturies y que van divulgase en países que formen l’Arcu Atlánticu européu. Nella figuren obres n’asturianu, castellán y gallego-asturianu de los realizadores Julio de la Fuente, Jim-Box, Pablo Quiroga, José Luis Velázquez, Jorge Dopacio, Álvaro Núñez, Marisa López Diz, Melania Fraga ya Illán Gonzali.

L’actu entamará’l sábadu 15 de setiembre, a les 17:30 hores, y allongaráse hasta les 20:00 hores nel salón d’actos del Centru de Cultura Antiguu Institutu de Xixón. Trés de la presentación del DVD fadráse la proyección de los sos conteníos, con Septiembre, de Julio de la Fuente (15 minutos), No hay nadie, de Jorge Dopacio y José Luis Velázquez (14,49 minutos), Fémina domus, de Jim-Box (3,19 minutos), El hombre fuera del tiempo, d’Álvaro Núñez (10,21 minutos), Bisarmes, de Pablo A. Quiroga y Francisco Martínez (11,52 minutos), A fiya del sastre, de Marisa López Diz (18,39 minutos) y los documentales, Eu son quen fun, de Melania Fraga (18, 24 minutos) y A bruxa de Brañavara, d’Illán Gonzali (40,49 minutos).

El FICXixón entama’l Ciclu del 50 aniversariu, tituláu “De neños bonos a Enfants Terribles”. Dende la organización camienten que “mediu sieglu de bon cine ye enforma, enforma tiempu, y tamién enforma, enforma bon cine”. Demasiao pa poder resumilo en namás un puñáu de títulos. Sicasí, el FICXixón escoyó una ventena de películes que se van proyectar na retrospectiva que va tener llugar del 1 al 23 de setiembre nel Teatru Xovellanos.

Nun van faltar la primera nin la última cinta d’estos años d’hestoria. Esta selección reflexa l’espíritu y l’evolución de les señes d’identidá del festival a lo llargo del so intensu aportar. Nun tán toles que son, pero son, y sobre too, toles que tán, espliquen.

Del 1 al 23 de setiembre podrán vese películes como Juntos, Los rescatadores, Quiéreme, Made in Hong Kong, El libro de la selva, Juno o Declaración de guerra, ente otres.

Folletu del ciclu de los 50 años del FICXixón

Esti sábadu 28 de xunetu a les 19’30 h. nel Licéu de Navia va presentase’l curtiumetraxe en gallego-asturiano “A fiya del xastre” de Marisa López Diz, inspiráu nun rellatu col que ganó’l Premiu Xeira de Narracióis Curtias en gallego-asturiano 2007.

Dempués de presentase yá en Cangas del Narcea, n’Ibias y en Grandas de Salime (llugar esti últimu onde foi rodáu), tóca-y el turnu a Navia, d’onde ye amás la protagonista del curtiumetraxe.

“A fiya del xastre” ye un curtiu ambientáu nun pueblu del occidente d’Asturies, nos años de la posguerra, onde se produz un fechu inesperáu que fai camudar la vida de caldía d’unos personaxes que viven nun entornu rural y pacetible. Ye un curtiumetraxe mui emotivu, onde los sentimientos ocupen un llugar cimeru y nel que los elementos máxicos vertebren tola historia.

Dempués de la proyeición, va haber un alcuentru cola direutora del curtiu y con dalgunos de los actores y actrices participantes, que van falar del so trabayu. Como pieslle del actu, el dúu Mestura va interpretar dalgunos de los temes que formen parte del curtiumetraxe.

Gonzali Producciones asoleyó’l so documental “A Bruxa de Brañava”, primeru de los realizaos n’eonaviegu, en YouTube. Dende va meses esti trabayu pue vese tamién na plataforma Vimeo. Gonzali Producciones presentó en 2010 esti documental en fala o gallego-asturianu. Dirixíu por Illán Gonzali y conducíu por Alberto Álvarez Peña, esti mediumetraxe recuerda como n’Asturies había homes y muyeres que teníen el don de ver a los muertos y falar con ellos.

. En Bual ñació Amparo López, más conocida como A bruxa de Brañavara. Amparo entraba en trance pa comunicase colos difuntos y mediar ente éstos y los vivos. La so fama foi bien gande, hasta’l puntu de que la revista Triunfo dedicó-y l’artículu “Una bruxa auténtica en Brañavara”, nel so númberu del 3 de xunu de 1978. D’ella, y de los sos fechos, trata esti documentu. La so figura nun ta escaecida na parte más occidental d’Asturies.

Cinco rapazos de Ribeseya, que cursen primeru de bachilleratu entamaron faciendo un trabayu pa la clas d’asturianu y son yá toi un fenómenu na rede. L’Equipu A-stur foi una idea de Pablo Casanueva, que ta nel papel d’Ambás énte les cámares, y al que se sumaron darréu Luis Fernández, como La Viecha; Enol Cueto, como Marineru; Faustino Blanco, como’l Negru, Pedro Aller, faciendo del Llocu. Los dos capítulos grabaos hasta’l momentu por esti grupu de rapazos que se fai llamar Nocéu Records son una parodia de la célebre serie norteamericana L’equipu A. El trabayu surdió pola iniciativa de la profesora Xema Cueto.

Pablo Casanueva esplica como a la xente-y gustó’l primer capítulu “y entós dímos-y continuidá y ficimos un segundu capítulu”. Los guiones faenselo ente toos, aportando idees, y darréu ye Casanueva quien fai’l montaxe. Al principiu costába-yos más atopar xente pero “dempués tola xente quería metese en dalgún papel”.

El primer capítulu trata sobre la toponimia nel conceyu Ribeseya, “pero pue valir pa cualesquier otru llau”, esplica Casanueva. “El casu ye qu’un cazurru camuda’l nome del mio pueblu, Nocéu, por “Nocedo” y claro, l’equipu A-stur nun lo pue permitir… y alreor d’eso xira tola hestoria”, añade. Casanueva tienlo claro “ye un mou de pasalo bien y de pasu, lluchar pola toponimia tradicional y mirar pa quitar del mapa estes tochures d’inventar los nomes de los sitios, que me ponen fritu”, comenta ente rises.

Los vídeos pueden vese na canal de Nocéu Records en YouTube.

Esti sábadu 9 de xunu a les 19’00 h. na Casa de Cultura de Grandas de Salime va tener llugar la presentación del curtiumetraxe en gallego-asturianu “A fiya del xastre”, de Marisa López Diz. L’actu va tar presentáu por Susana Hevia, directora del Muséu Etnográficu de Grandas de Salime, onde se rodó la mayor parte del curtiometraxe, asina como n’otros llugares del conceyu. “A fiya del xastre” ye’l primer curtiometraxe de Marisa López Diz y ta inspiráu nun rellatu col que ganó’l Premiu Xeira 2007.

Ye un curtiumetraxe de ficción ambientáu nun pueblu del occidente d’Asturies nos años de la posguerra. La historia -emotiva y intensa y enllena d’elementos máxicos- reflexa la vida nel mundu rural d’unos personaxes que ven alterada la so rutina diaria por un fechu inesperáu y comprometedor.

Dempués de la proyeición del curtiu, va haber un alcuentru cola directora del mesmu y con dalgunos de los actores del curtiumetraxe, que van contanos aspeutos y anécdotes del rodaxe y que van contestar a les entrugues del públicu participante.

Como pieslle, el dúu Mestura, del que ye parte la directora d’esti audiovisual, va interpretar dalgunes de les canciones en gallego-asturianu que formen parte de la banda sonora del curtiu.

La directora

Marisa López Diz ye llicenciada en Filoloxía Hispánica, Especialista n’Asturianu y cola capacitación de Gallego-asturiano. Escribe poesía y rellatu tanto pa neños como p’adultos y tien dellos premios y llibros espublizaos. “A fiya del xastre” supón la so primer incursión nel mundu del cine como directora.

La Casa de les Llingües, entidá de la Universidá d’Uviéu encargada del enseñu d’idiomes organiza’l ciclu Cine de Babel (entamáu en collaboración cola delegación asturiana de AEGEE-Foru d’Estudiantes Europeos) Dientro d’estes xornaes dedicaes al cine, esti vienres, 18 de mayu, a les 18.30, nel Club de les Llingües del centru, van proyectase dellos curtios n’asturianu: “Lo que precises selo yo”, “Carreteres inciertes” y “7337”, en versión orixinal con subtítulos en castellán.

El pase va dir precedíu d’una curtia introducción per parte d’un profesor collaborador de La Casa de les Llingües. Va Poder celebrase un curtiu alderique al rematar les películes.