Cine

Redacción.

El Centru d’Interpretación del Cine d’Asturies, creáu al mesmu tiempu que’l Casinu de Xixón y asitiáu na planta cuarta del mesmu, inauguró ayeri una esposición na que pue vese un percorríu pel cine melodramáticu a lo llargo de la hestoria. El comisariu de la esposición ye Juan Jose Plans y el títulu ‘Grandes Melodrames Cinematográficos’. La esposición va tar abierta hasta’l 14 de xunetu.

La esposición inclúi cartelos y otros elementos de les películes que s’enxerten dientro d’esti xeneru que ñació nel ámbitu operísticu pero pasó a tolos artes pa denomar a les obres nes que l’aspeutu que más destaca ye’l rellacionáu colos sentimientos y el calter de la xente.

Cartelos de películes tan conocíes como ‘Lo que’l vientu llevó’, ‘Rebeca’, ‘Al este del Eden’, ‘Les uves de la ira’, ‘Margarita Gautier’, ‘Que verde yera mio valle’ y ‘Cumes borrinoses’ pueden vese na esposición organizada pol Centru d’Interpretación del Cine d’Asturies nel so horariu d’apertura.

El ciclu de cine europeu en versión orixinal subtitulada Eurosferas 2007 continua’l so programa de proyecciones cola película “Los espigadores y la espigadora: dos años dempues ” del belga, Agnès Varda. La película va proyectase güei miercoles 9 de mayu na biblioteca pública de El Fontán n’Uvieu, coincidiendo cola cellebración del Día de Europa y el 50 aniversariu de la Firma de los Trataos de Roma.

Por segundu añu consecutivu la DG de Relaciones Esteriores y Asuntos Europeos y la Cámara de Comerciu d’Uvieu, al travies de la so oficina Europa Directo, organizen un ciclu de películes europees en versión orixinal subtitulada en castellán. Esti añu en collaboración cola Biblioteca Pública del Fontán, la Filmoteca d’Asturies y la Conseyería de Cultura.

L’oxetivu d’esti ciclu, qu’entamó el pasáu 8 d’Abril, ye averar la Unión Europea a los sos ciudadanos al travies de la cultura. Europa tien la so propia identidá, esencia social y política, que munchas veces, en cuestiones cinematográfiques, queda relegada y olvidada pol dominiu del cine d’EEUU, que nos ufre visiones bien lloñe de lo que ye la realidá de nueso.

L’amuesa arranco cola proyección de “Viva Zapatero, obra de la cómica italiana Sabina Guzzanti. La película ye un documental en tonu satíricu sobre la democracia y la clase política italiana durante’l gobiernu de Silvio Berlusconi. La proyección, en versión orixinal subtitulada, entamó (durante toles xornaes) a les 8 de la tarde.

Con un total de 5 obres actuales de directores europeos extremaos, el ciclu quier amesta-y al ciudadanu una visión del marcu cultural y social europeu y dar a conocer una filmografía minoritaria, en ocasiones discriminada frente a les grandes superproducciones. Amás l’amuesa ye una perfecta ocasión para reflesionar acerca de los valores culturales y sociales que comparten los ciudadanos de la Unión Europa y se ven espeyaos nes obres escoyíes pa esta ocasión.

Nel curtiu repasu que quier facer el ciclu Eurosferas sobre la actualidad del cine d’autor europeu tendrán cabida autores tan extremaos como la citada Sabina Guzzanti, el checu ganador d’un oscar, Jan Svirák del que se va proyectar la obra “Un mundo azul Oscuro”, el británicu Joel Hershman cola comedia “Flower Power: Como una Regadera”, o el belga Agnès Varda con “Los espigadores y la Espigadora: un año despues”. La proyección del documental de Varda va coincidir col festeyu, el miercoles 9 de Mayu del 50 aniversariu de la Firma del Tratáu de Roma.

La aportación castellanoparlante al ciclu Eurosferas llega cola oscarizada “El laberinto del Fauno” del mexicán Guillermo del Toro. La proyección va ser el miercoles 16 de Mayu y va servir para clausurar el ciclu. Amás esi mesmu día, el ciclu Eurosferas va sumase a la cellebración del Añu Europeu pola Igualdá d’Oportunidaes pa Todos.

Esti añu hai 3 motivos destacaos que se quieren recordar a los asistentes: el 50 aniversariu de la firma del Tratáu de Roma (el 25 de marzu de 1957 sellose’l documentu qu’anició’l procesu de igua de la actual UE de 27 países), el 9 de mayu “día d’Europa” y el 2007 como “Añu europeu de la igualdá d’oportunidaes pa todos”.

Por eso se van poder ver películes dirixíes por muyeres, que traten sobre la reinserción social, la llibertá d’espresión, la pobreza y la desigualdá qu’aún güei hai n’Europa, etc. Amás va intentase igualar les oportunidaes de toles persones que quieran disfrutar d’una tarde de cine europeu: nel actu de entamu la Fundación Vinjoy va encargase de la traducción por signos y la película de clausura va dir en castellán con audiodescripción pa tol públicu.

El sistema de audiodescripción ye un serviciu de sofitu a la comunicación formáu por un conxuntu de tecniques y habilidaes aplicaes, que compensen la carencia de captación de la parte visual en cualquier tipu de mensaxe, suministrando una adecuada información sonora que la traduz o explica. D’esta manera el posible receptor con llimitaciones visuales percibe’l mensaxe como un tou armónicu, de la forma más parecida a como lo fai una persona con plena capacidá visual.

Durante’l mes d’abril, en dalgunos de los Centros Asturianos más representativos d’Arxentina y Uruguay, van desendolcase diverses xeres arrellaes a la cultura asturiana como la proyección de curtios cinematográficos, y la cellebración de cursos y xornaes. Nesta edición va poder contemplase tamien la música de Nacho Vegas y del dúu de música tradicional Núa.

El ciclu entama’l día nueve nel Centru Asturianu de Buenos Aires cola proyección de los curtios “Hestoria d’un vezu” de Santos Hevia, “Proa al Norte” d’Óscar Fernández, ” Entaina” d’Alberto Pardo, ” Tierra de Guerrilleros” d’Amanda Castro, y ” El Beso de la Tierra” de Lucinda Torre). Rematará la xornada’l músicu Nacho Vegas que va ufrir un Recital acústicu nel que repasará’l so últimu trabayu discográficu.

Tres pasar por Buenos Aires el ciclu visitará Montevideo, Rosario y Tucumán en sesiones de tres díes en caún de los centros asturianos d’estes ciudaes.

“Rellumes 2007” presentase güei en rueda de prensa a partir de les 13:00 hores nes nueves oficines del Teatru Jovellanos de Xixón, asitiaes na Casa de La Palmera. Al actu tienen previsto acudir en calidá d’organizadores el Director de l’Axencia Asturiana d’Emigración, Luís Miguel Fernández Romero, el Conceyal de Festeyos de Xixón y Presidente del Teatru Jovellanos, Iván Álvarez Raja, y el Director del Festival de Cine de Xixón. Jose Luís Cienfuegos.

La tercer edición del Festival de Cine Asturianu va desenvolvese ente los díes 30 de marzu y 4 d’abril. El día 30 de marzu fadráse la presentación oficial de los nominaos a los premios d’esti eventu que premia a les meyores producciones del cine asturianu.

El llunes 2 d’abril, a partir de les 18 hores va facese la Gala d’Entamu de la tercer edición d’esti festival nel Teatru Filarmónica de la capital asturiana. Les siguientes sesiones van facese’l martes 3 d’abril cuando a partir de les 18 hores se proyecte’l documental Suena’l Camín, premiáu nel concursu “Nun mos cuentes películes”. Darréu esti documental va proyectase La Noche del Escorpión, a les 20 hores y a les 22 hores va facese la proyección de Vete de mi.
El miércoles 3 d’abril va facese la gala de clausura d’esti festival con un homenaxe a Juan Gona.

El xueves 22 de marzu a partir de les 19.00 hores nel Centru d’Interpretación del Cine n’Asturies del Casinu d’Asturies en Xixón el director xixonés Ramón Lluís Bande va presentar la so película “La carta de Bárbara” un averamientu a la realidá de los y les ciudadanes asturies desapaecides na dictadura militar arxentina.

La película ta coproducida por Publicaciones Ámbitu y la Productora de Programes del Principáu cola collaboración de l’Axencia Asturiana de Cooperación al Desarrollu.

La VI edición del Certame de Curtiometraxes d’Avilés recibió 251 trabayos pa esti concursu. D’esti númberu 24 de los trabayos corresponden a autores asturianos.
Los premios que va repartir la sesta edición d’esti concursu de curtios ye de 2.100€ pa la obra ganadora, 1.200 pal segundu y 900 pal premiu Especial del Públicu. Amás d’estos premios los trabayos de directores asturianos opten a los premios de meyor cortu asturianu, con una dotación de 750 euros y el del Públicu al meyor curtiu asturianu con 750€ de premiu.
Esti concursu ta empobináu a autores de menos de 35 años, con obres de temática llibre. Un comité de selección va escoyer d’ente toles obres presentaes les meyores pa la so proyección.

A partir del prósimu martes 20 de marzu entama la nueva edición d’El Cine de la Caxa: L’aventura. El ciclu va tener 8 películes, que se van proyectar nos Centros Culturales d’Uviéu, Xixón, Mieres y Llangréu. Toles sesiones entamen a partir de les 20 hores.

Les películes que se van proyectar a lo llargo d’esti ciclu son: La taberna del irlandés, Los dientes del diañu, Sólo los ánxeles tienen ales, Dersu Uzala, La humanidá en peligru, Fuga ensín fin, L’Expresu de Xangai, Quiero la cabeza de Alfredo García. Como ye vezu toles películes vanse proyectar en versión orixinal subtitulada.

Cine de la Caxa nº79: L’aventura

La nueva película del director americanu va facese en Barcelona anque dalgunes de les sos escenes van grabase n’Asturies, concretamente n’Uviéu. La película va tar protagonizada por Penélope Cruz y Javier Bardem si bien s’espera la incorporación de Scarlett Johansson, que yá fuera protagonista de Match Point y Scoop, y a quien se considera como la nueva musa del director de Nueva York.

La última sala de cine urbana d’Uviéu, los cines Brooklyn, echó ayeri’l peslle, depués de 28 años d’actividá, pa dar pasu a una superficie comercial de mediana supercie. A partir de güei los únicos cines d’Uviéu tán nel centru comercial Los Prados, ensin cuntar con sales non proyectaes pal cine como les de Caxastur o el teatru Filarmónica.

Uviéu tuvo, ente otros, los cines Aramo, Principado, Real Cinema, Clarín o los Minicines; la presión de les sale de los centros comerciales provoca la unión de la capital asturiana a la llarga cifra de localidaes asturianes que perdieron les sos sales urbanes.
La primer de les películes proyectaes nos cines Brooklin foi “La Luna” del director italianu Bertolluci allá pela añu 1978 y la última foi “Volver” d’Almodovar na sesión de les 22.30 d’ayeri 18 de febreru.
Los seis empleaos del cine Brooklyn, pertenciente a la cadena Clarín, pasarán a trabayar nos cines Marta d’Avilés y Centro de Xixón; últimos cines d’una cadena que llegó a tener sales en delles ciudaes del estáu.

La Filmoteca d’Asturies posiblemente seya’l destín del proyector de 35 milímetros y de la llámpara de carburo que decoren les zones comunes del espaciu.

Al traviés del nuevu programa Media 2007, la Unión Europea quier potenciar la distribución de les obres europees nel ámbitu de la unión y nel restu del mundu durante los siete años siguienes. Media sofitará l’accesu a la financiación por parte de les PYME y apostará pol usu de les tecnoloxíes dixitales para fomentar la competitividá del sector.
Según Viviane Reding, Comisaria de Sociedá de la Información y Medios de Comunicación, la industria cinematográfica europea tien qu’abrise a la dixitalización y modernizar los cines y el sistema de distribución p’algamar l’éxitu. “El Programa MEDIA 2007 ufre les ferramientes pa sofitar a la industria del cine européu a avanzar nesta dirección”, apuntó la comisaria.
Los 755 millones d’euros qu’aportará MEDIA 2007 en conceutu de financiación van repartise en cinco apartaos: un 7% va dir empobináu a formación (guiones, xestión económica y tecnoloxíes dixitales), el 20% a desarrollu (proyectos únicos, catálogos, nuevos talentos, coproducciones, otres formes de financiación), un 55% a distribución, un 9% a promoción y patrociniu, un 5% va ser p’aiciones tresversales (facilitar a les PYME l’accesu a la financiación y fomentar la presencia de películes europees nes plataformes dixitales) y un 4% pa proyectos esperimentales (nueves tecnoloxíes pal desarrollo, la producción y la distribución de películes)
El programa Media 2007 vien avaláu pol ésitu de los programes predecesores nel ámbitu de la financiación al cine: Media plus y MEDIA formación. Por cada euro que financió la Unión Europea xeneráronse seis euros d’inversión privada nel sector. L’exemplu de que’l programa funciona ye que na última edición del Festival Internacional de Cine de Berlín proyectáronse 17 películes subvencionaes polos programes MEDIA.
MEDIA sofita la industria europea del cine dende va16 años. Sólo gracies a MEDIA Plus y MEDIA Formación (2001-2006), destináronse más de quinientos millones d’euros a un total de 8 000 proyectos. Cada añu, la Comisión Europea financia 300 nueves obres y la metá de les películes europees asoleyaes nes sales de cine recibieron subvenciones comunitaries.