Cine

El Colectivu 1000 metros bajo tierra cellebra esti xueves 14 de febreru’l festival de cine “Buenos Aires-Asturias. Puente cultura”. La xornada que va agospiar l’Ateneu Obreru de Xixón va entamar a les 20:00 y dientro d’ella van esibise dos mediumetraxes arxentinos: “Dulcita y el hada”, de Pablo del Teso y “Inocente y vano” de Lorena Gall”. Les dos cintes tan inedites y la so esibición respuende a la política del colectivu de da-yos salidá a películes ensín estrenar.

FNAC dedica esta selmana al cine de ciencia ficción de baxu presupuesto con un cuadruple pase de “El vengador tóxicu”, película señera de la factoría Troma. Los pases entamen el llunes, como davezu a les 19:00 hores y van siguir hasta’l xueves nel mesmu horariu. “The Toxic avenger” va esibise en versión orixinal sotitulada al español.

Estrenada en 1985, “El vengador tóxicu” ye una de les obres maetres del cine gore de los años 80 y la producción más conocía de la Troma. Cunta la hestoria de Toxie, un indivuduu corriente hasta que por mor d’un accidente nel que cae dientro de la cuba radioactiva d’un camión pasa a taber superpoderes. Humor negru y película de cultu por escelencia de la serie B nesta obre de Michael Herz y Lloyd Kaufman .

Una de les obres más conocíes del director Stanley Kramer, Adivina quien viene esta noche, ye la película que se va proyectar esti miercoles 13 de febreru nel centro municipal de El Coto de Xixón, dientro del ciclu de cine “La Comedia”. El pase va entamar, como davezu nestes proyecciones, a les 19:30 hores y ta organizáu pola Fundación Municipal de Cultura, Educación y Universidá Popular del Conceyui de Xixón.

Adivina quien viene esta noche afonda nel tema del conflictu racial al travies de la hestoria d’un noviazgu: el de la xoven Joanna Drayton, interpretada por Katharine Houghton y un medicu negru, del que se fai cargu Syney Poitier. Katharine Hepburn algamó l’oscar a la meyor interpretación femenina pol so papel de madre xuiciosa y Spencer Tracy da-y la replica faciendo del pa de la neña.

La Filmoteca d’Asturies va ufrir esti llunes 11 de febreru una nueva sesión del ciclu de cine d’aventures que se vien esibiendo nel Teatru Filarmónica d’Uvieu. La película escoyida pa esta ocasión ye “Las cuatras plumas”, drixida en 1939 pol húngaru Zoltan Korda en base a la novela orixinal del autor ingles Alfred Edward Woodley Mason. El pase va entamar a les 20:30 hores.

“Las cuatras plumas” cunta la vida d’un noble ingles que, tres una vida dedicada a servir al exercitu británicu, decide abandonar durante una campaña n’Egipto y recibe les cuatro plumes blanques, un símbolu que se-yos daba a los desertores. A partir d’estu fechu el protagonista trata de recuperar l’honor perdíu. El prestixosu productor Alexander Korda, algamó un gran esitu con esti clásicu del xeneru d’aventures.

“Alredor de mayu del 68: dende les barricaes del septimu arte” ye’l nome del nuevu ciclu cinematográficu que ta organizando la Filmoteca d’Asturies pa los meses de febreru y marzu. Dende’l primeru d’esti mes tan pasando pola sala de la Biblioteca d’Asturies del Fontán n’Uvieu un piñu de películes rellacionaes colos acontecimientos del 68, la mayoría prohibíes na España nel so momentu. El ciclu fina’l 13 de marzu.

Dalgunos de los títulos que la institución dirixida por Juan Bonifacio Lorenzo en collaboración cola asociación Tribuna Ciudadana son: “Soi importosa, mariellu” y “Soi importosa, azul” de ; “La Chinoise” y “Tout va bien” de Jean-Luc Godard, o la más reciente (2003) “The Dreammers: Documentos” de Bernardo Bertolucci.

Dende’l 6 de febreru y hasta’l 15 de marzu el centro d’interpretación del cine n’Asturies (CICA) va acoyer una esbilla de películes alredor del holocaustu xudíu. Amás y como actividá complementaria a esta serie de proyecciones, va poder vese, dende esti sábadu, l’amuesa “No es un juego de Niños”, formada por 17 cartelos donaos pol museu Yad Vashem de Jerusalem, premiu Príncipe d’Asturies de la Concordia en 2007.

El festival arranca’l miercoles 6 de febreru cola cinta “Amen” de Costa Gavras, criticando’l silenciu de la ilesia católica durante’l xenocidiu. El restu de películes que van poder vese nel CICA son “Ghetto”, d’Audrius Juzenas; “La solución final”, de Frank Pierson; “Vencedores y vencíos”, de Stanley Kramer; “El novenu día”, de Volker Schlölondorf y “Escape en Sobibor”, de Jack Gold.

Tamien va haber espaciu pal análisis d’esta traxedia hestórica nel festival cola conferencia de la especialista Jimena García Herrero, miembru del grupu d’educación sobre la Shoah “Zivia Lubetkin”, el xueves 14 a les 20:00 hores.

Los curtios del Festival Nacional de Curtiumetraxes al Aire Llibre REC (Ribadeva en curtiu) van poder vese dende esti martes nel ovetense Teatru Filarmónica gracies a una iniciativa conxunta de los concetos d’Uvieu y Ribedeva y la Fiulmoteca d’Asturies. La primer sesión va ufrir les siguientes obres: “Con lengua” d’Anna Rodríguez Costa; “La Quela” de Liz Lobato, “Garto” de Luis Gómez Guzmán, “In between” de J. E. Iglesias Vigil, “El camino de Ana” de Richard Vázquez y “Sálvame” de Javier Veiga.

El miercoles 6 va continuar el programa de proyecciones con: “Mensajes de voz” de Fernando Franco, “Padam” de J. Manuel Carrasco, “Benelux” de Gonzalo Munilla, “Diente por ojo” d’Eivind Holmboe, “Cirugía” d’Alberto González y “Tadeo Jones” d’Enrique Gato.

L’espaciu cultural de la Fnac, en collaboración cola Filmoteca de Cuba, ufre pa esti miercoles 6 de febreru una nueva amuesa del meyor cine de la islla col pase de la película “La bella del Alhambra” de los directores Enrique Pineda Barnet y Miguel Barnet. La proyección va tener llugar na sala d’actos que la tienda tien nel centru comercial Parque Principado de Siero a les 19:00 hores con entrada llibre.

“La bella del Alhambra” cunta la hestoria d’una corista y prostituta na Cuba de los años 20. La cinta algamó’l Premiu Goya en 1990 y foi l’aspirante al Oscar a la meyor película estranxera en 1991.

Asturies ye, dende esti llunes 4 de febreru, l’esceneriu natural del rodaxe de la serie “La Señora”, que va emitir la primer canal de Televisión Española. La serie, una ficción ambientada la vida d’una familia d’empresarios mineros durante la dictadura de Primo de Rivera, llevará sellu asturianu gracies a que ta rodada en parte en llocalizaciones como Llanes, Colombres, la sablera de Niembru, Moreda y na playa d’Aguadamia en Cuerres.

L’equipu de la productora Diagonal TV, formáu por noventa profesionales, entamó a rodar el pasáu 8 de xineru en Navalcarnero y agora aporta a rodar esteriores a Asturies. Amás del Principáu tamien van rodar nes llocalidaes madrileñes de Bustarviejo y Miraflores, en Sepúlveda (Segovia), Lupiana (Guadalajara) y na finca Górquez (San Martín de la Vega).

Les películes rodaes n’Asturies y nominaes esti añu a los Goya yeren “El Orfanato”, con 14 nominaciones, “Oviedo Express” con 7, “Luz de domingo” con 5, “La Torre de Suso” con 3 y “Pudor” con 2, y eso ensin cuntar colos asturianos que competíen en categoríes técniques. Sicasí, el resultáu final nun dexó más que la metá de los premios “Goya” pa los que taba “nominada” Asturies, toos ellos pa “El Orfanato”.

El más asturianu de los premios, el que recibió Sergio G. Sánchez pol guión orixinal d’El orfanato, que como él mesmu comentó ta basáu nel curtiu que fizo como ensayu, n’asturianu, 7337. Llevaron amás un Goya, Juan Antonio Bayona, como meyor director novel, David Martí, Montse Ribé, Pau Costa, Enric Masip, Lluis Castells y Jordi San Agustín pol meyor soníu, Lola López e Icíar Arrieta pola peluquería y el maquillaxe y Joseph Rosell pola dirección artística.

A la fin, el cine rodáu n’Asturies, tuvo mui bonos resultaos nes nominaciones, pero non asina nos premios finales.