Cine

Esti martes nel marcu de les xornaes que sobre menores non acompañaos organiza SOS Racismu Asturies, de magar les siete y media la tarde, va proyectase’l documental Cayuco, de María Miró.

Con una duración de 54 minutos Cayuco, ye un documental cinematográficu que cuenta de manera desgarraora les penuries poles que tienen que pasar aquelles persones subsaharianes que s’embarquen nun viaxe inciertu pol desiertu y el océanu a la gueta d’una vida meyor. Ye un retratu intimista de la dura realidá que representa’l fenómenu de la inmigración illegal que quier entrar n’Europa poles Isles Canaries.

Les entraes pa les sesiones del 48 Festival Internacional de Cine de Xixón tán yá a la venta en llinia pa mayor comodidá al traviés de Caxastur. Más de 250 proyecciones de 171 cintes en 10 sales espardíes pela ciudá. Una gran oportunidá pa descubrir esti cine frescu qu’ufierta’l certame a partir d’esti vienres, 19 de payares y hasta’l 27 del mesmu mes.

Programa completu del FICXixón 2010

Con motivu de la celebración de les Terceres Xornaes Sobre Menores non Acompañaos y nel marcu de les mesmes, SOS Racismu va proyectar, a lo llargo d’esti mes de payares, dellos curtios que falen de la tema de la inmigración. Esti martes, 9 de payares, a les 19:30 hores, va pasase “Semillas que el Mar arrastra”.

Sinopsis de la película:

N’Africa, son munchos los neños que suañen con poder viaxar en cayucos, dexando la so casa y la so familia, cola ilusión de trabajar nel destín que’l mar-yos brinde. Los que lleguen a la otra oriella, alcuéntranse con una realidá distinta a la que suañaron, los centros d’internamientu de menores inmigraos. Esta película-documental da voz a los neños inmigraos que nagüen una vida meyor na tierra prometío.

Gonzali Producciones acaba de dar anuncia de la inteción de siguir cola xera de doblar clásicos del cine al asturianu. Según informen dende la productora, “entamó yá’l trabayu pa versionar el llargumetraxe El tercer home”, una película del Reinu Xuníu dirixida por Carol Reed, escrita por Graham Greene y protagonizada por Joseph Cotten y Orson Welles. La película ta considerada por munchos como la meyor obra fílmica británica de la hestoria y recibió nel so día l’Óscar a la meyor fotografía en blanco y negro.

Pa esti doblaxe Gonzali Producciones, que yá entamó la fechura del guión n’asturianu, cuntará cola participación d’actores profesionales asturianos, a diferencia del so primer trabayu de doblaxe “La nueche de los muertos vivientes”. La productora anuncia que esti versionáu realizaráse “ensin sovención nenguna”.

El Serviciu de Normalización Llingüística del Cabu Peñes entama nel centru polivalente de La Baragaña, Candás, un alderique sobre la producción en llingua asturiana, na que va presentase’l curtiu “Bisarmes” de Pablo A. Quiroga Prendes, ganador del tercer concursu de curtios de la Mancomunidá del Cabu Peñes. L’actu va celebrase de magar les siete la tarde.

Güei, xueves 7 d’ochobre, a les 18:30, va facese la segunda y cabera xornada de L’Arribada en Corvera, na que se proyectará’l primer llargumetraxe dobláu al asturianu (por Gonzali Producciones), el clásicu de George A. Romero ‘La nueche de los muertos vivientes’.

La xornada pieslla los actos de l’Arribada nesti conceyu, asitiaes dientro de la so estaya “Per Asturies”. Les actividaes organícense a comuña ente l’Asociación Cultural L’Arribada y l’Ayuntamientu de Corvera d’Asturies.

La sétima edición del Festival de Cine Asturianu abre’l plazu pa la presentación de candidatures, pudiendo participar realizadores individual o colectivamente. El Concursu tien dos categoríes principales. La primera, formada por obres en llingua asturiana y la otra, por obres asturianes en cualesquier otra llingua. Al Concursu podrán presentase llargumetraxes, curtiumetraxes, mediumetraxes, o documentales en cualesquier formatu yduración, preferiblemente en DVD, siempres que tean realizaos en llingua asturiana.

Tamién pueden presentase obres feches por realizadores asturianos o rodaes básicamente n’Asturies o nos Países Asturianos en cualaquier llingua y en cualuquier añu de realización. Les bases completes pueden consultase na páxina del festival.

La edición númberu 48 del Festival Internacional de Xixón va cuntar con delles novedaes, que fueron avanzaes yá. Ente los conteníos nuevos, lo más nuevo del cine español, que davezu nun solía tener espaciu nel FICXixón, un alcuentru internacional de productores, homenaxe a la Escuela de Berlín y la tevisión de la obra d’Eugène Green. Sicasí, estes son namás dalgunes de les novedaes, munches otres tán tovía por descubrir y van poder vese ente’l 19 y el 27 de payares nos cines de Xixón.

Ciclu Escuela de Berlín

Per primer vegada nel estáu español un festival alluma una xeneración de cineastes alemanes que, baxo la denomación d’Escuela de Berlín, comparten les llinies maestres d’un cine sobriu, realista y ensin concesiones. Esti ciclu, organizáu pol Goethe Institut, va ser una bona oportunidá pa examinar los referentes ya influencies d’un grupu de lo más variao que non siempres s’identifica col títulu; con nomes que surden de la Deutsche Film und Fernsehakademie Berlin, como Christian Petzold, Angela Schanelec y Thomas Arslan (qu’entamaron el grupu), y dellos direutores que magar nun se formaran na mentada DFFB, tán ensin dulda venceyaos, como Valeska Grisebach, Ulrich Köhler y Maren Ade.

El programa inclúi Yella, de Christian Petzold, ganadora de dos premios en Berlín en 2007; Bungalow, d’Ulrich Köhler, ganadora nel BAFICI, y les últimes películes d’Angela Schanelec (Orly) y Thomas Arslan (Im Schatten), y títulos comoLonging, de Valeska Grisebach, Meyor Película nel 44 FICXixón y Entre nosotros, de Maren Ade, que s’estrenó equí va poco.

El cine español torna al FICXixón