Cine

El realizador Pablo A. Quiroga Prendes presenta dellos de los sos curtios nel Auditoriu de la Casa Cultura “Palaciu d’Oumaña”, en Cangas. L’actu va entamar a les ocho y media la tarde d’esti miércoles, 26 de xineru, cuntando cola presencia del propiu autor.

Quiroga Prendes ye cineasta, xestor cultural y dirixe Algamar Producciones, una productora que trabaya d’una manera amplia nel campu de la cultura.

La Casa Cultura de Mieres acueye’l 27 de xineru la presentación de dos películes: Sangre y 34-35, que se centren na memoria d’Asturies y que tán dirixíes por Ramón Lluís Bande y Alberto V.G., respectivamente. La entrada ye llibre de magar les 20:15 hores.

“SANGRE”

Nel monte, al traviés del paisaxe y de les palabres del güelu, un neñu va descubrir el pasáu escondíu de la historia familiar. DURACIÓN: 12 min.

“34-45”

Pura intrahistoria. Al traviés de los testimonios de 10 asturianos y asturianas percurre los repetíos esilios en suelu francés, teniendo como puntu de partida la derrota de la Revolución de 1934, pasando pela cayida d’Asturies en1937 y la cayida de Cataluña de 1939. A partir de 1939 asistimos al pasu d’estos homes y muyeres, apátrides según Franco y Hitler, pelos campos de concentración franceses, los campos d’esterminiu alemanes, la so importante participación en La Resistencia, la División Leclerc o’l maquis francés hasta la victoria final sobre los nazis. DURACIÓN:110 min.

El Salón d’Actos de Vieyu Institutu de Xixón acueye esti martes a les 19:30 hores la proyección del documental “Into Eterny”, en versión orixinal sotitulada en castellán. La película recueye un repás pola situación almacenaxe de residuos nucleares, dando a conocer el casu del primer cementariu nuclear permanente, que ta construyéndose en Filandia.

El basureru nuclear ta construyéndose al traviés d’un complexu sistema de túneles soterraños tallaos nun sosuelu de roca sólida. Una vegada los residuos tean almacenaos, les instalaciones tienen de ser sellaes y nun van abrise nunca, hasta pasaos 100.000 años, yá que ye’l tiempu que los residuos siguen siendo peligrosos. El documental faise entrugues como, ¿somos a aseguralo?, ¿Cómo podemos alvertir a los nuesos descendientes que los residuos nucleares tán ehí?

El director ye l’artista conceptual Michael Madsen, ñacíu en 1971. Director de dellos documentales, ganó premios con “To Damascus: A Filme on Interpretation” (2005). Fundador y líder artísticu de la instalación Sound/Gallery na plaza del Conceyu de Copenhague, Madsen foi profesor convidáu en The Royal Danish Academy of Art, The Danish Filme School, y The Danish School of Design, ganando premios en festivales de Polonia, Suiza y Bélxica.

El martes 24 va poder vese, nesti casu nel Centru Municipal de Cultura de L’Arena.

L’asociación l’Arribada y Gonzali Producciones organicen nel Centru Cultural de L’Arena, en Xixón, l’estrenu de “Los viaxes de Gulliver, un llargumetraxe d’animación producíu polos Estudios Paramount dirixida por Dave Fleischer y producida pol so hermanu Max Fleischer, dos pioneros del cine animáu que nos años cuarenta fueron mui populares polos sos curtiometraxes de Superman. A les seis de la tarde, Illán Gonzali, productor y director del doblaxe, y Antón Caamaño, actor participante nel doblaxe, van facer una introducción a la mesma.

Darréu va proyectase la película que van sacar a la venta, dica poco, y en formatu DVD. En terminando la película, a les 19:30 hores, va actuar el dúu Mestura.

Les películes que nun almitió’l Festival de Cine de Xixón y dalguna más tienen el so espaciu nel primer AlterFICXixón 2010. El centru social Sestaferia, asitiáu na cai Joaquín Alonso Bonet de Xixón acueye estos díes les proyecciones. Esti miércoles 15, a les 20 hores faise una sesión de curtiumetraxes asturianos titulada “delincuentes varios”.

El xueves 16, a la mesma hora, proyéctase ‘Paradise Now’ (Hany Abu Assad, Palestina, 2005), un llargumetraxe de 90 minutos. El vienres 17, a les 21.30 hores, va ponese ‘El hombre del traje blanco’ (A. McKendrick, 1951), un llargumetraxe d’85 minutos.

El festival alternativu va pesllase’l sábadu 18, a les 18 hores con ‘Asturias D.I.Y.’ (S. Garay, 2010), un documental sobre los colectivos autoxestionaos n’Asturies de 98 minutos, siguíu d’una charra.

Esti viernes celébrase la 2º Xornada de L’Arribada 2010 en Villaviciosa. La primer xornada d’esti añu ficiérase’l pasáu 21 de mayu. Les actividaes entámenles l’Asociación Cultural L’Arribada a comuña cola asociación maliaya La Compaña del Ronchel y desárrollense nel Teatru Riera.

El programa entama a les 19.00 hores con “L’especial de Navidá paramilitar de Lobo” – curtiumetraxe (subtituláu n’asturianu) de 14 minutos; pa siguir darréu, a les 19.15 hores, con una Mesa redonda sobre Zombies na lliteratura y el so treslláu al cine, cola participación de Jesús Parrado, Alberto Álvarez Peña ya Illán Gonzali.

A les ocho la tarde va proyectase “La nueche de los muertos vivientes” (Night of the living dead), llargumetraxe dobláu al asturianu.

Tres el gran ésitu de los cuatro ediciones anteriores y de nuevu en collaboración col Festival Internacional de Cine de Xixón, Asturianos en Bruseles (ASBRU) entama’l V Ciclu de Curtios Asturianos, que se va celebrar los próximos díes 25 y 26 de payares a les ocho la tarde, na Casa d’Asturies en Bruseles, asitiada na cai Saint Laurent, 36-38 de la capital de Bélxica. FICXixón y ASBRU escoyeron especialmente pa esta iniciativa los meyor curtiumetraxes asturianos proyectaos nel certame xixonés en 2009.

Nel primer pase del xueves 25 ASBRU va presentar una selección de la meyor y más recién producción de curtiumetraxes fechos por cineastes asturianos mozos. Ente los curtios escoyíos atópense “Puntu”, d’Eva Gallego Valdés, y “Tacones”, de Benjamín Villaverde, ganadores del Premiu Día d’Asturies nel últimu Festival Internacional de Cine de Xixón.

El vienres 26 va clausurar el V Ciclu de Curtios Asturianos el curtiumetraxe documental “La tierra de Oscar”, dirixíu pol xixonés Alejandro Zapico y que narra un día cualesquier na vida d’un neñu de Karangasso (Mali). Con un escelente guión robláu por Julio Rodríguez, “La tierra de Oscar” cunta cola particularidá d’utilizar pal doblaxe les voces d’una ventena d’alumnos d’un colexu de Xixón. Nel añu en que ASBRU celebra’l so quintu aniversariu, va completar el pase del vienres la sección “Cinco años, cinco curtios: los favoritos d’ASBRU”, compuesta polos filmes que, por distintos motivos, son los preferíos de la xunta directiva de l’asociación. La directora Julia Guillén Creagh va tar presente na clausura pa presentar el so curtiumetraxe “Sombras en el viento”, filme basáu nel cuentu La última fueya, d’O. Henry, y que yá lleva llograos nel últimu añu 14 premios en festivales internacionales.

Con esta actividá ASBRU pretende siguir na llínea, empecipiada en 2005, de sopelexar distintos aspeutos de la cultura asturiana en Bruseles y d’ufiertar la posibilidá de conocer les sos facetes más innovadores a un públicu ampliu ya internacional.

Esti martes 23, a les siete la tarde, el Conceyu Abiertu, organiza la proyección d’esta película dirixida por Adolfo Ramírez, Fermín Lizarraga y Diego del Barrio.

Sinopsis:

Bamba, ye un Senegalés afincáu en Zaragoza y vuelve a la so casa en Dakar pa pasar una temporaína cola so familia. ¿Quién son?, ¿Qué y-os preocupa y cómo lleven l’ausencia de los sos seres queríos? Estes son dalgunes de les entrugues que s’aborden nel documental.

L’actu ta entamáu por SOS Racismu Asturies y ye’l tercer documental de les sos terceres xornaes sobre menores non acompañáos.

El realizador y dibuxante collaborador d’Asturnews, Alberto Álvarez García, presenta esti martes nel Festival Internacional de Cine de Xixón, la película domumental “34-54”, na que , al traviés de los testimonios de 10 asturianos y asturianes, percurre los esilios de contino en suelu francés, tomando como puntu de partida la derrota de la Revolución de 1934, pasando pela cayida d’Asturies en 1937 y la cayida de Cataluña de 1939. La proyeición va ser el martes 23 de payares nel salón d’actos del CMI Xixón-Sur, dende les 19:45 hores.

El documental sigue’l so percorríu qu’a partir de 1939 pasa pa los esiliaos “apátrides según Franco y Hitler, pelos campos de concentración franceses, los campos d’esterminiu alemanes, la so importante participación en La Resistencia, la División Leclerc o’l maquis francés hasta la victoria final sobre los nazis”.

Ente les persones que dan testimoniu nel documental tán Ángeles Álvarez Fernández, Juan Antonio Alonso Alcalde, Felipe Martín Pajares, Gregorio Cenitagoya González, Manuel Fernández Arias, Mary German Ríos, Vicente García Riestra, Ángel Álvarez Fernández, Ángel Villar Tejón, Joseph González Ocaña, Henri Farreny del Bosque y Alfredo Rotella Morán.

Esti sábadu 20 de payares, dientro del programa del 48FICXixón, el cienasta Ramón Lluís Bande estrena la película “Sangre” y proyecta “Estratexa”, dos obre feches n’homenaxe públicu a Manolín el de Llorío, qu’inspiró una y protagonizó la otra.

La proyección va entamar a les cuatro la tarde nel Centru Cultural Vieyu Institutu de Xixón.