Cine

Xixón acoyerá un añu más el quintu Festival de Cine Gai y Lésbicu d’Asturies – CinegailesAST 2011 que tendrá llugar los díes 15,16 y 17 d’avientu nel Salón d’Actos del Centru de Cultura Vieyu Institutu Xovellanos, allugáu na cai Xovellanos de Xixón. El festival premiará curtiumetraxes, documentales y películes d’esta temática y esti añu dedicará les sos proyecciones a remembrar a tolos homosexuales del mundu que viven en países onde la homosexualidá ta considerada oficialmente un delitu.

El festival concede premios votaos pol públicu asistente a les proyecciones que tendrán llugar en sesiones de tarde siendo l’asistencia de baldre a toes elles. El Festival concedió los sos Premios d’Honor a Ang Lee, Stephen Frears, Bill Condon y Gus Van Sant y premió nes sos cuatro ediciones a artistes como Eva Lesmes, Michel Horvat, Marisa Crespo, Moisés Romera, Rosario Pardo, Jalil Lespert, Juan Carlos Claver, Marcos Arriaga, Mariel Maciá, Julieta Serrano, Tess Harper, Tor Iben, Juan Simons o Anna Boluda.

“Chechu Rubiera, historia de un gregario” trata d’esplicar l’importante llabor de los “gregarios” nel ciclismu, personalizada na figura d’unu de los meyores gregarios del ciclismu modernu, l’asturianu Chechu Rubiera. Esti vienres, 25 de payares, a les ocho la tarde, va presentase nel Teatru de La Llaboral.

Nel documental enceta tolos pasos que siguió esti xixonés, dende los sos entamos na Escuela de Ciclismu de Les Mestes, en Xixón, hasta convertise nun ciclista de referencia mundial.

Johan Bruyneel, Pedro Delgado, Álvaro Pino, Samuel Sánchez, Carlos Barredo o Benjamin Noval son dalgunos de los personaxes qu’apurren la so particular visión de la trayectoria profesional del ciclista de Valdornón.

La entrada ye llibre hasta completar aforu, previa presentación de les entraes que pueden recoyese nel Centru de Recepción de Visitantes-Tienda de la Llaboral nel so horariu d’apertura: de llunes a vienres, de 08:00 a 20:00 hores; sábados y domingos, de 10:00 a 14:00 y de 15:30 a 20:00 h.

De resultes d’un alcuerdu con Gonzali Producciones, el conceyu de Samartín del Rei Aurelio va acoyer un ciclu de películes n’asturianu. Van facese cuatro proyecciones qu’emprimarán a les 19 hores, y que son el martes 15 de payares, na Casona del Bravial de Blimea, El tercer home; el xueves 17 de payares, na Casa Cultura de L’Entregu, Los viaxes de Gulliver; el xueves 24 de payares, nel Aula Cultural La Plaza de Sotrondio,Popeye y les mil y una nueches; y el xueves 1 avientu, na Casona del Bravial de Blimea, McLintock. La entrada ye llibre.

La sucursal uvieína d’El Corte Inglés allugada nel centru comercial Salesas, na cai Xeneral Elorza 75, tien nel departamentu de vídeos una estaya denomada Cinema n’asturianu a disposición de los sos clientes, según informen dende Gonzali Producciones.

Esti espaciu creóse pa ufiertar les películes doblaes al asturianu por Gonzali Producciones. Nelli puen topase copies de Los viaxes de Gulliver y El tercer home, a les que van xunise n’avientu copies de McLintock y d’una edición especial de La nueche de los muertos vivientes. L’ésitu de ventes, afirmen dende GP, “llevó a qu’en poco más de dos meses ficiérense nesti establecimientu trés remeses de películes”.

Gonzali Producciones tien programao sacar a la venta en DVD dos películes n’asturianu más pa últimos d’avientu. Trátase del filme McLintock y d’una edición especial de La nueche de los muertos vivientes. L’anuncia coincide col entamu del doblaxe al asturianu y al eonaviegu de Popeye y les 1001 nueches. La productora punxo yá a la venta los clásicos Los viaxes de Gullivery El tercer home.

El Festival Internacional de Cine de Xixón busca xente d’ente 17 y 25 años pa formar parte del Xuráu Mozu de la so 49 edición. Valoraráse la conocencia y pasión pol cine, tener siguío otres ediciones del festival, ente otres cuestiones. Les bases pa participar, hasta’l 21 d’ochobre, pueden consultase na web del Festival.

El salón d’actos del Centru de Cultura Vieyu Institutu de Xixón allugará’l primer pase de McLintock n’asturianu. La proyección fadráse güei, vienres 23 de setiembre, a partir de les 19:00 hores, y forma parte de les actividaes de L’Arribada 2011.

La productora Gonzali Producciones ye la encargada d’esti doblaxe d’un nuevu llargumetraxe al asturianu. Trátase del perconocíu western McLintock, rodáu nel añu 1963 nos Estaos Xuníos y dirixíu pol cineasta Andrew V. McLaglen. La película ta protagonizada polos actores John Wayne y Maureen O’hara. El guión basóse parcialmente na obra de William Shakespeare The Taming o the Shrew.

Pa esti trabayu la productora anunció que trabayaríen un grupu de profesionales integráu por 30 persones, ente técnicos y dobladores. El doblaxe y acabáu técnicu de la película fadráse nel estudiu Fase Cuatro de Xixón, onde yá se ficieren les versiones asturianes de los clásicos “Los viaxes de Gulliver” y “El tercer home”.

La realizadora Melania Fraga ta rodando un curtiumetraxe nos conceyos d’El Franco y Tapia, protagonizáu pola escritora Ana Vega. El curtiu va rodase en gallego-asturianu y tarás sotituláu en castellán ya inglés, amosando’l camín al debalu de la escritora asturiana Ana Vega, “a la gueta” (como se titula’l documental), de los sos oríxenes al traviés de la llingua, la hestoria de los antepasaos…

El proyectu puede sofitase con aportaciones personales al taviés de la web Lánzame, na que se puede collaborar a partir de diez euros.

Páxina onde sofitar el proyectu

Gonzali Producciones ta completando’l repartu de copies de les películes “El tercer home” y “Los viaxes de Gulliver”, en dellos establecimientos de Xixón y Uviéu. Na páxina de la productora van dir espublizándose los puntos de venta, tanto los allugaos en grandes superficies como n’establecimientos especializaos. Tamién sedrá posible xestionar pidíos empobinándose directamente a la productora.

En Xixón los puntos de venta actuales son Llibrería Paradiso, Toma 3 y La Librería de Bolsillo; mientres que n’Uviéu pueden mercase los dvds n’El Corte Inglés de Saleses.

La película protagonizada por Los pitufos estrénase esti vienres. Nella, estos pequeños dibuxos animaos entren nos escenarios de la vida real.

Cuando’l malváu bruxu Gargamel los escuerre fuera del so pobláu, al traviés d’un portal máxicu que los lleva al nuesu mundu, aterricen metanes Central Park, en Nueva York. Los pequeños seres azules tendrán d’atopar el camín a casa primero que’l malváu Gargamel los atope a ellos…. Pel mediu aventures a esgaya y munches rises.