Portada Sociedá SUATEA-STES organiza unes xornaes sobre’l lliderazgu de les muyeres nel sieglu XXI

SUATEA-STES organiza unes xornaes sobre’l lliderazgu de les muyeres nel sieglu XXI

by asturnet

La Secretaría de la Muyer del sindicatu d’enseñanza SUATEA-STES organiza pa esti fin de selmana unes xornaes sobre’l lliderazgu de les muyeres nel sieglu XXI. El programa, basáu nuna serie de ponencies y meses redondes, ta centráu nel lliderazgu femenín nel ámbitu políticu-sindical, na so presencia dientro de los movimientos sociales y nel ámbitu intelectual.

A les diez de la mañana del sábadu día 27 de mayu, Alicia Poza, responsable de la Organización de Muyeres de la Confederación STES-Intersindical, ya Isabel González, responsable de la Secretaría de la Muyer de SUATEA, van inaugurar les xornaes con una charra sobre la presencia de les muyeres nes instituciones públiques. Tres d’elles, Lidia Falcón, abogada, escritora y fundadora del partíu feminista d’España, fadrá lo propio analizando el “Feminismu, la única política posible pa les muyeres”, mentes que Rosario Fenrnández Hevia, xueza nel Xulgáu de lo Penal nº2 de Xixón, falará sobre “Muyer, Xusticia y Órganos de Gobiernu”.

A les cuatro y media de la tarde, Elin Peterson y Raquel Platero van analizar les dificultaes pa l’aplicación del ‘mainstreaming’ de xeneru, al travies de la metodoloxía MAGEEQ, a los que van siguir dos talleres sobre estos trabayos.

El domingu día 28, ta previsto qu’a les diez de la mañana Charo Altable y Carmen Sarmiento falen del lliderazgu de les muyeres nos movimientos sociales, faciendo un percorríu hestóricu. Y a les doce, como pieslle d’estes xornaes confederales, va ser la periodista y escritora, Llum Quiñonero, la que lo faiga dende la persepectiva del ámbitu intelectual.

Tamién te podria gustar