Servicios Sociales de Xixón presenta una guía didáctica pa prevenir adicciones

El Conceyu de Xixón, al traviés de la Fundación Municipal de Servicios Sociales, presentó esta selmana una guía didáctica pa la promoción de la salú y la prevención d’adicciones na mocedá.

Tratase d’una ferramienta de trabayu por que les y los profesionales de les entidaes sociales que trabayen cola población xuvenil y que participen nel proyectu (Mar de Niebla, Fundación Siloé, Asociación Centro Trama, Asociación Cuantaya, Cáritas Diocesanes d’Asturies Llugarín, Escuela de Segunda Oportunidá, Secretariáu Xitanu y Centru d’Iniciativa Solidaria y Empléu CISE) puedan encetar conductes específiques.

La guía cumple con trés oxetivos pal so desenvolvimientu:

• Incorporar la perspectiva de xéneru como un factor determinante de la salú na práctica profesional para favorecer la detección de dificultaes y les respuestes preventives al traviés d’acciones formatives empobinaes a profesionales del tercer sector y de los servicios sociales que trabayen con población xuvenil.
• Impulsar l’aprendizaxe sobro prevención d’adicciones y la promoción de la salú aumentando la percepción de riesgu con talleres qu’inclúin formación en prevención d’adicciones.
• Impulsar el trabayu en rede ente l’alministración y axentes sociales que desenvuelven el so llabor por aciu l’espardimientu del productu resultante de los talleres.

Ta estructurada nuna parte teórica como sofitu pa les persones que quieran poner en práctica los sos conteníos, y n’otra parte práctica con cinco talleres formativos y el so desenvolvimientu de sesiones de dos hores de duración.
La guía enmárcase dientro del proyectu La Bona Fiesta, que forma parte del Plan Municipal d’Adicciones 2019-2024, que’l so oxetivu ye sensibilizar a grupos de mozos que presenten o pueden presentar una mayor esposición a factores de riesgu énte’l consumu de sustances al traviés d’un procesu formativu qu’incorpora la participación y l’aprendizaxe activu como exa de la so actuación y qu’inclúi la perspectiva de xéneru nel so desenvolvimientu. Surde como resultancia y continuidá de la evaluación y analís de les resultancies del proyectu del añu pasáu desenvueltu cola entidá Mar de Niebla.

Descargar Guía