Tecnoloxía

Un email humorísticu, escritu dafechu n’asturianu y entituláu ‘Los que nun sois asturianos igual nun lo entendéis’ entamó hai poco a espardese pela rede nun exemplu nidiu de que la normalización acaba aportando a toles fasteres sociales y culturales.

El mail satiriza los hoax que ca pocu s’atopen nel corréu basura y asemeya a un mail d’alvertencia de los munchos que s’atopen davezu na internet y que nun tienen otru oxetivu qu’amenorgar la velocidá de les conesiones, saturando les mesmes col reunviar costante de correos

El mail reproducímoslu darréu:

Los que nun sois asturianos igual nun lo entendéis.

¡¡¡¡¡¡¡¡¡¡URXENTE!!!!!!!!!!

Tán cerrándose les cuentes de Hotmail, y el Messenger, y el Google, el Ozú y el Yahoo y los chats de MSN y Teleline y tolos móviles Movistar, Amena, Airtel y Vodafone, y tamién Plus.es y Microsoft, y Casio y Sony y Philips y Sansung y Toshiba y Moulinex y Zanussi y la MTV y la NBC, la FOX, la BBC, la Warner Bros., los estudios Universal y la Paramount y la DreamWorks y la Bonoloto, la Primitiva y la Quiniela y la ONCE y el sortéu’l guaje y la Superbowl y Expediente X, y Los Simpsons y Cine de Barriu y los telediarios y el tiempu y Sabor a Ti y los 40 principales, amás de pesllar les llinies del metru Barcelona y Madrid y d’El Berrón cuando lu faigan, el funicular de Bulnes, y tamién quiten l’antroxu, Nuechivieya, la fiesta La Pomar, San Valentín, el Día’l pa, los bolígrafos d’Ágatha Ruiz de la Prada, les fiestes de Pañeda y Argüelles y el día d’América n’Asturies, amás del club de Fans de Bustamante y Enrique Anaut, los Pokemon, Mortadelo y Los Pitufos, les películes d’Alfredo Landa y Eurovisión, la OTI y los concursos de Miss España, Francia, Bulgaria, Canadá, Arxentina, Colombia, Corripos de arriba y Xibraltar, amás del Ministeriu Fomento, el Bar Julio Fuentes, l’Ayuntamientu Noreña y el Carrefour de Lugones.

Esto ye debido a una saturación d’estos servicios por un escesu d’usuarios. Por eso necesitamos que reenvíes esti mensaxe a 487.375 millones de persones pa saber quiénes furrulen ca poco en Hotmail.

A tou aquel que nun reunvíe esti mensaxe, Ceferino Ridruejo Vélez, Director Xerente de la Asociación d’Apicultores de Caborana, vetará-y l’accesu a tales servicios, amás sufrirá cortes d’agua, llume y gas, detendrálu la Guardia Civil, griparáse-y l’ordenador, esplotará-y el móvil nos pantalones, incautaráse-y el permisu conducir, quedaráse ensin trabayu, perderá a los sos amigos, sufrirá perdes d’orina, almorranes, abandonarálu el desodorante, les sos tostaes tarán siempre fríes, soñará con Loli Álvarez y Tony Genil, y l’únicu corréu que recibirá amás de les factures serán sobres con Antrax y el catálogu primavera verano de Deportes Llosa. Por favor, reenvíalo enantes poder

Si lo reenvíes en 3 hores, el mozu o la moza que te faiga tilín acercarásete y diráte que tú tamién y-faes tilín y que quier salir contigo.

Si lo reenvíes en 1 hora esi mozu o esa moza ofreceráte sexu ensin compromisu tola nueche.

Si lo reenvíes en media hora el sexu ensin compromisu repetiráse ca nueche durante tol añu.

Si lo reenvíes en 10 minutos regalaránte dineru a esgaya y toles mozos o moces desearánte sexualmente tola vida.

Si lo reenvíes en 5 minutos nunca nun tarás gachu, nun avieyarás, conseguirás tolo que quieras na vida y de quien tú quieras y conocerás la felicidá etenra.

Tolo que pon nesti E-mail ye cierto, y yelo porque yo garantízotelo.

Eso sí, enxamás te pongas a pensar: “¿Nun sería más lóxico que Hotmail usara la so propia páxina p’avisar a los sos usuarios de daqué? ¿Nun puen colocar un mensaxe na páxina de corréu de ca usuariu pa comunica-yos cualquier noticia, o simplemente enviar un mail que llegue a tolos usuarios mediante la so llista de corréu?” Estes reflexones nun tienen nengún fundamentu y son totalmente falses.

Y tienes que creeme. Si nun me crees, el FBI dirá por ti, encerraráte y nunca enxamás nun volverás a ver la lluz del día. Amás lobotomizarán a tolos tus familiares, amigos y conocíos, amás de a los 487.375 millones de persones a los que reenviaste esti e-mail pa que crean que enxamás te conocieron.

L’Ayuntamientu de Barcelona y el TecnoCampus de Mataró tan acabantes d’asoleyar 60.000 CD-Roms d’una nueva y completa distribución Linux (Catix) qu’incorpora un total de 1.200 aplicaciones y programes informáticos d’usu llibre, tanto pa poder emplegar nel ámbitu domésticu como nel profesional. Esti nuevu CD inclúi programes y utilidaes como el OpenOffice 1.1.1. en catalán, el KOffice 1.3, Mozilla 1.6, Konqueror 3.2.2 y otres ferramientes pa diseñar páxines Web, escuchar música o mirar la TV.

Nun ye la primer vegada que les alministraciones catalanes faen apuestes pol software llibre, siguiendo un enfotu que ya entamaren cuantayá, magar nun se-y diere la publicidá qu’algamó l’apueste d’Estremadura cola distribución de Linux nomada como Linex. La importancia de cuntar con un sistema operativu llibre nuna llingua minoritaria como’l catalán y de programes d’ofimática del valir de OpenOffice ye perimportante nel ámbitu educativu y nel profesional al amenorgar dafechu, hasta niveles insignificantes les inversiones en software.

Esti CD sedrá ufiertáu esti domingu 27 de xunu xunta’l diariu Avui, anque tamién pue descargase una semeya en:

ftp://ftp.softcatala.org/pub/knoppix/catix/

ftp://caliu.info/pub/distribucions/knoppix-ca/catix/

N’asturianu namái ye posible emplegar una versión del navegador Mozilla dafechu en llingua asturiana.

Una adaptación de Mozilla permite navegar por Internet n’asturianu

‘Uviéu.es’ sal 63 euros más caru al añu que ‘Uviéu.as’. El dominiu d’internet que se correspuende coles islles d’American Samoa, pero qu’evoca a Asturies na so grafía y pronunciación, ye más baratu y esixe menos burocracia qu’un dominiu español ‘.es’, y magar d’ello permanez nun discretu segundu planu: Sólo dos de los grandes ayuntamientos asturianos -Llangréu y Uviéu- tienen actives direcciones ellectróniques ‘.as’, poles que nun acaben d’apostar empreses nin instituciones.

Según les tarifes asoleyaes pola autoridá pal dominiu de rexistros d’internet na Samoa Americana, l’internauta que quiera designar con un ‘.as’ al so portal o páxina web tien que pagar una cuota añal de 45 dólares, lo que según el cambiu oficial de divisa traduzse güei en pocu más de 37 euros. American Samoa tramita’l dominiu de forma inmediata y requier el pagu anticipáu de dos añalidaes: 90 dólares (unos 74 euros al cambiu de güei).

Por esi preciu, l’autoridá delegada n’España pal rexistru de dominios baxo códigu de país, la ESNIC, nin siquiera da d’alta una dirección d’internet qu’acabe en ‘.es’. Sólo la concesión cuésta-y a una empresa 110 euros, mientres que cada una de les renovaciones añales tien un preciu de 100 euros, too ello depués d’esperar trámites pa tener operativu’l dominiu español que suelen prollongase a lo menos dos selmanes y a los que namás puen optar -por llei- persones xurídiques o bien individuos que quieran activar n’internet una web col so nome y apellíos siguíos del ‘.es’. Nesti segundu casu, les tarifes son más barates.

Esa llista de potenciales inconvenientes, ensin embargu, nun disuade a les empreses ya instituciones asturianes, que se decanten en masa polos dominios ‘.es’ -o tamién ‘.com’, cuyu preciu ye d’unos 13 euros añales- y dexen de llau les direcciones ‘.as’.

Tanto’l Gobiernu autonómicu -aloxáu en ‘princast.es’- como los grandes conceyos d’Asturies -Xixón, Avilés, Mieres, Siero- canalicen la so presencia na rede a partir de dominios ‘.es’, coles escepciones de los ayuntamientos de Llangréu, cuya páxina principal ye ‘www.langreo.as’, y d’Uviéu, que mantién actives les direcciones ‘oviedo.es’ y ‘oviedo.as’.

Web de rexistru de dominios d’American Samoa

El Premiu ‘Príncipe de Asturias’ d’Investigación científica y técnica reconoz l’estudiu internacional de vanguardia sobro l’orixe y desendolcu del cáncer. El xuráu premió esti mediudía n’Uviéu a los científicos Joan Massagué, Judah Folkman, Bert Vogelstein, Robert Weinberg y Tony Hunter por responder a “ún de los mayores retos de la Humanidá”, como autores d’un llabor citáu en más de 250.000 referencies bibliográfiques.

Na so acta, los miembros del xuráu del ‘Príncipe’ d’Investigación destaquen “l’enorme impactu” de la producción científica de los cinco espertos premiaos y eloxa les sos decisives contribuciones tanto pa delimitar les bases del cáncer, como pal desendolcu de nueves llinies de tratamientu d’esa enfermedá.

El catalán Joan Massagué despunta como ún de los meyores conocedores de cómo s’orixinen les metástasis tumorales, mientres que’l británicu Tony Hunter ye autor del descubrimientu d’una enzima que permite definir l’activación del procesu cancerosu y ellaborar fármacos con cierta eficacia.

Pol so llau, a los tres científicos estaoxunidenses premiaos valórase-yos la conocencia del sistema vascular que desendolquen los tumores (Judah Folkman), la definición de la base molecular del cáncer de colon (Bert Volgestein) y la pionera identificación d’oncoxenes humanos (Robert Weinberg).

La candidatura de los cinco oncólogos foi presentada pol caderalgu de Microbioloxía César Nombela, miembru del xuráu, ya impúsose a otres 44 persones y collectivos qu’optaben al galardón, el segundu que la Fundación ‘Príncipe de Asturias’ concede na so edición d’esti añu depués que l’escritor y xermanista italianu Claudio Magris algamara’l ‘Príncipe’ de les Lletres el pasáu vienres.

El galardón algamáu pol equipu plurinacional d’investigación contra’l cáncer ta destináu a valorar el llabor de la persona, grupu de trabayu o institución cuyos descubrimientos o xera d’investigación representen una contribución importante pal progresu de la Humanidá nes estayes de les Matemátiques, la Física, la Química, la Bioloxía, la Medicina y les Ciencies de la Tierra y del Espaciu.

Mieres, Llangréu, Samartín del Rei Aureliu, Llaviana, Ayer y L.lena xestionarán en comuña una canal de televisión dixital. Los alcaldes de los seis municipios de les cuenques mineres del Nalón y el Caudal firmaron güei un conveniu p’asumir una concesión que s’emplegará como vínculu ente los ciudadanos d’esos conceyos, pero que nun va traducise n’emisiones reales a lo menos hasta 2010, según s’axilice o non la implantación de la tecnoloxía de tv dixital n’Asturies.

Esa dilatación nel tiempu va provocar que los avances que los habitantes de les cuenques podrán ver nos prósimos años sedrán más bien burocráticos ya intanxibles: De sutaque s’apruebe nos plenos de los seis municipios el conveniu firmáu güei, los responsables municipales pondránse a trabajar nel modelu de xestión de la futura canal dixital, que según les intenciones de los alcaldes mineros emplegaráse como vehículu pa informar de les iniciatives que s’echen a andar nes cuenques y pa da-y puxu a la marca ‘Valles mineros’ como reclamu turísticu.

La concesión que soliciten los seis Consistorios de les cuenques del Nalón y el Caudal ye una de les ocho qu’habilitó el Gobiernu central pa implantar la televisión dixital pública nel territoriu asturianu, un procesu abiertu qu’hasta agora namás secundaron los conceyos d’Uviéu y, agora, los seis de les cuenques.

Según precisó l’alcalde de L.lena, Hugo Morán, los responsables municipales del Nalón y el Caudal inspiraránse nun modelu yá en marcha en Francia pa determinar cómo va xestionase la televisión dixital de les cuenques, qu’aportará al públicu al traviés de la canal 46.

La comunidá científica reconoz a Carlos López Otín, caderalgu na Facultá de Melecina de la Universidá d’Uviéu, como ún de los más destacaos investigadores n’oncoloxía molecular. Un xuráu compuestu por una quincena de premios Nobel alcordó güei distinguir a López Otín col galardón ‘Rey Jaime I’ na so modalidá d’Investigación, concediendo-y los 75.000 euros con que ta dotáu el premiu polos sos avances na llucha contra’l cáncer.

D’esti mou, el profesor de la Universidá d’Uviéu completa una llista de premiaos na que tamién tán l’economista Jordi Galí, l’inxenieru Luis Navarro Lucas, el mélicu Antonio Pellicer y el biólogu Alex Aguilar. Toos ellos tarán presentes, na prósima seronda, la entrega de los galardones, concedíos pola Fundación Valenciana d’Estudios Avanzaos y pol Gobiernu d’esa comunidá autónoma.

El xuráu valoró especialmente’l llabor del equipu dirixíu por Carlos López Otín, doctor en Ciencies Químiques, na comprensión del funcionamientu y la estructura de les célules humanes, orixen del cáncer cuando entamen un procesu de reproducción illimitada.

Caderalgu nel Departamentu de Bioquímica y Bioloxía Molecular de la Universidá d’Uviéu, López Otín imparte nel presente cursu académicu tres asignatures ordinaries y un cursu de doctoráu sobro actualización en bioquímica y bioloxía molecular. Nel cursu 2004-2005, tará al frente d’un cursu de tercer ciclu qu’afondará na Bioloxía molecular del cáncer.

La rede, dende la llingua asturiana. Una adaptación del navegador Mozilla, desendolcada por voluntarios acordies col sistema de códigu llibre -ayenu al porgüeyu de les empreses y poro ensin ánimu de llucru- permíte-y al usuariu ver n’asturianu na so pantalla toles ferramientes pa la navegación por Internet, dientro d’una filosofía de construcción collectiva de la rede que moviliza a millones de persones en tol mundu.

Alternativu a otros navegadores como’l que proporciona Microsoft, el Mozilla incorpora un llector de corréu ellectrónicu y de noticies basáu nel motor Gecko, el mesmu qu’emplega el navegador de Macintosh, y ufre avances talos como una mayor seguridá énte posibles fallos, bloquéu de ventanes qu’apaecen automáticamente en pantalla y una gran proyección de futuru, gracies en gran parte a la so independencia respecto a la evolución d’empreses determinaes y a l’andecha con que ye desendolcáu por parte de voluntarios con conocimientos d’informática.

La versión disponible de Mozilla n’asturianu, que pue descargase gratis, ye la 1.4, dos pasos perbaxo del máximu desarrollu qu’algamó el navegador polo d’agora. Na mesma llista na que figura l’adaptación asturiana, tán disponibles les versiones de Mozilla n’otres llingües como l’euskera o el catalán.

Ente les ventayes que sorrayen los partidarios del usu’l códigu abiertu tán la posibilidá de que cualquier persona puea intervenir p’ameyorar el navegador y que queda abierta la puerta a posibles revisiones del códigu, fechu inviable n’otros navegadores comerciales y que permite atopar y pesllar ‘puertes traseres’ poles que los virus puen entrar nos equipos informáticos.

Sitiu pa descargar gratis Mozilla n’asturianu

La normalización llingüística da un pasu al frente. El primer corrector informáticu de testos n’asturiano, bautizáu “Iguador” polos sos pás, sal a la venta en formatu de cd al preciu de 6 euros y col doble envís declaráu de facilita-yos el llabor a quienes usen la llingua asturiana nes sos comunicaciones escrites y d’allanar, de pasu, el camín hacia la normalización del idioma.

Pa ello, L’Academia de la Llingua Asturiana y la empresa Araz -promotora y executora del corrector, respectivamente- xunieron esfuerzos concretaos en grandes cifres: Más de 50.000 entraes, que se correspuenden coles del diccionariu normativu de L’Academia, 6.000 verbos conxugaos y 300 normes ortográfiques pa xenerar una base de datos na qu’apigacen cuatro millones de pallabres.

No práctico, el primer iguador informáticu de llingua asturiana correxirá les faltes ortográfiques y léxiques más comunes na escritura, amás d’iguar les pertitentes errates. L’usuariu podrá personalizar el corrector ensertando pallabres determinaes según les sos necesidaes singulares.

Na parte técnica, el preséu informáticu que sal a la venta funciona baxo plataforma PC col procesador de testos más común, el Word de Microsoft, y ye compatible colos sistemes operativos Windows 98, XP y 2.000 y coles versiones de Word 97, 2.000 y XP.