Tecnoloxía

Jon Lech Johansen, un programador noruegu conocíu nel mundu de la piratería antimonopolista col alcuñu de DVD Jon, llogró derromper los códigos d’encriptación de Windows Media Player dexando francu l’accesu a los sos conteníos distribuíos pola plataforma Windows Media Technology Server pa que puedan instalalos computadores ensin esi sistema operativu.

L’anunciu de la falcatrúa al xigante Microsoft féxolu’l mesmu hacker dende la so weblog y hasta agora la corporación del magnate Bill Gates nun gorgutó al respective d’esta nueva resquiebra del so sistema de seguridá.

DVD Jon desplica nel so weblog como llogró crear un algoritmu de decodificación, gracies a un métodu d’ inxeniería reversa, que-y permitió romper la encriptación que protexía los archivos NSC, usaos por Windows Media Player p’acceder a emisiones de video y audio emitíes a múltiples usuarios al mesmu tiempu. Estos archivos NSC contienen datos d’una emisión “Multicast”, o lo que ye lo mesmo una emisión entamada pa que la sientan dellos usuarios al empar, datos como’l nome y la dirección IP del emisor, que los usuarios tienen descargar p’acceder a elles.

Jon Lech Johansen ye autor d’otres trastaes paecíes a xigantes de la industria informática como la de desarrollar un software pa poder lleer los DVD en entornu Linux. La Motion Picture Association of America (MPAA)calcó-y una demanda; pero la corte falló a favor de Johansen indicando que nun infrinxera nenguna llei y que namás quería poder ver los DVDs nel so PC.

Otra de les falcatrúes del noruegu fue la que-y valió romper el códigu de protección del serviciu Itunes d’Apple arreblincando pel xerenciaor de derechos dixitales (digital rights management o DRM).

Weblog de DVD Jon

El gobiernu del Principáu va invertir 9,4 millones d’euros nel so proyectu pa empobinar l’accesu a la banda ancha de particulares y empreses de too Asturies. La Secretaría d’Estáu de Telecomunicaciones pa la Sociedá de la Información (SETSI) apoya los planes del executivu autonómicu que tienen nel añu 2008 el so horizón más inmediatu.

L’administración asturiana quier que la Banda Ancha seya d’equí a tres años una realidá en tola nuestra comunidá y 338.000 persones, vecines de más de milenta parroquies, se vean beneficiaes con esti proyectu.

Según afirmó’l viceconceyeru de Presupuestos, Luis Iturrioz, el proyectu “ye una apuesta clara del Principáu pa desarrollar el texíu empresarial y otres actividaes, como la formación y el turismu”

La SETSI, en colaboración col obiernu autonómicu quier consiguir que les operadores nel periodu de 2005 – 2008, doten a les zones rurales y aislaes d’ Asturies del serviciu de banda ancha. Telecable y Telefonica son les dos operadores elexíes pa universalizar l’accesu a Internet.

El total del proyectu asciende a nueve millones cuatrocientos mil euros, de los cualos, un millón cuatrocientos mil son subvencionaos , y tres millones y mediu, van ufiertase con calter de créditu reembolsable. El viceconceyeru Luis Iturrioz declaró que más de trescientos treinta y ocho mil asturianos van poder beneficiase de la banda ancha a partir de 2008: “un de los requisitos imprescindibles p’abordar la sociedá de la información ye que haya accesu a la rede en banda ancha”.

L’Euskal Encounter, una de les folixes pioneres de los aficionaos a les cares creatives y lúdiques de la informática, escomienza esti viernes 22 en Barakaldo con una asistencia confirmada d’alrrodiu seis mil participantes. En total van ser cuatro díes nos qu’artistes dixitales, xugadores aficionaos y profesionales y usuarios en xeneral van xuntase en maratonianes sesiones d’enganche énte la pantalla d’un ordenador. El software llibre y la seguridá na rede son dos de los asuntos sobre los que tamién va haber ocasión de falar nesti alcuentru que tien llista d’espera pa participar nél na prósima edición de 2006.

La Fundación Euskaltel, en colaboración cola Sociedá pa la Promoción y Reconversión Industria, la Diputación Foral de Bizkaia y el Banco Bilbao-Bizkaia, organicen esti alcuentru que se celebra nel País Vascu dende 1994 y que ye un de los más conocíos ente les “party” de xugadores y artistes na rede. Na parte creativa, desenvuélvese un programa d’amuesa de demoescena, alrodiu del que nació esti alcuentru. Na parte más lúdica Gamegune ufierta la posibilidá de pasar hores xugando nes carpes habilitaes pa ello na villa de Barakaldo.

Nel Euskal Encounter participen aficionaos y profesionales de toles fasteres del estáu, tamién de países como Francia, Alemania, Polonia, Rusia, Reinu Uníu y Finlandia. La mayoría de los participantes son mozos d’ente los 14 y los 30 años, y predomina ente ellos el xéneru masculín. Los participantes van poder disfrutar d’una navegación d’altísima velocidá con una banda de 1 gigabit y tendrán zona d’agospiamientu, comedor, aparcamientu especial.

Hasta agora tienen confirmao la so asistencia alrodiu de seis mil participantes y la organización tien abierto una llista d’espera pa la prósima edición. La cita ye ente los díes 22 y 25 de xunetu en Barakaldo.

Euskal Encounter

El Centru de Cultura Contemporánea de Barcelona acoyó esti fin de selmana un alcuentru internacional sobre les relaciones ente la creatividá y la propiedá intelectual na Rede. La defensa del copyleft, el control de la cultura y la información y les formes pa que artistes y creadores puedan vivir profesionalmente del so trabayu ufiertándolu de baldre ensin renunciar a los sos derechos d’autor, son dellos de los temes que se tán analizando en COPYFIHGT.

Ente los participantes nel alcuentru destacó la intervención de Lawrence Lessing, fundador del movimientu Creative Commons que denunció el poder qu’exercen sobre la cultura y la creatividá les lleis de copyright y el mercáu. Pa Lessing “ta creándose una cultura del permisu na que la creatividá requier l’autorización de dalguién ayenu a ella pa desarrollase”, afirmó, esponiendo les idees del so últimu ensayu “Free Culture”. L’abogáu, profesor de la Universidá de Stanford y una las autoridades mundiales más influyentes nel campu del ciberderechu afirmó que “los propietarios de los derechos de copyright tienen güei un control total sobre la cultura, ye un poder absolutu ensin precedentes y contra’l qu’hai que lluchar”.

Otru de los participantes nel alcuentru de Barcelona ye Jimmy Wales, fundador de la Wikipedia, la mayor enciclopedia na Rede. Pal creador y propietariu d’esta fonte de consulta d’accesu llibre, la popularidá de la enciclopedia vien precisamente d’esa singularidá y abogó por una nueva realidá basada en principios asemeyaos a los de la so empresa porque asina, afirmó “too está baxo llicencia llibre,y eso fai que la sensación de propiedá se reduza, naide que nun estéa seguru de lo que ta faciendo va a arriesgase a que lu corrixan o lu editen.

L’escritor norteamericanu Cory Doctorow intervieno énte’l Centru de Cultura Contemporánea de Barcelona pa relatar cómo se ganaba la vida como autor “regalando” los sos propios llibros na rede. L’escritor desplicó que’l fechu de colgar n’Internet el testu íntegru de les sos noveles nun ye un obstáculu pa poder vendeles nes llibreríes y consideró amás que “ye dalgo que beneficia al creador, nun lu perxudica”, dixo y refiriéndose al so casu declaró que “dalgunos de los mios llibros van ya peles cinco ediciones y se tan traducíos a varios idiomes, asina puedo vivir tranquilamente, Internet nun va acabar col llibru tradicional porque ye un formatu más cómodu”. Pa Dorctorw: “La nuestra llucha tien ser pa abolir los copyrights esclusivos en manes de les multinacionales, porque limiten la creatividá”.

Nel alcuentru celebráu en Barcelona tamién se trató del P2P (Peer to Peer) cola presencia de representantes del colectivu Downhill Battle, un grupu que desenvuelve un proyectu creativu d’activismu artísticu en defensa del intercambiu d’obres y idees. El colectivu llucha llegalmente contra la esclusividá del copyright y al empar desenvuelve esitoses campañes publicitaries o de difusión masiva de música, diseños, etc. pela rede.

Jakob Nielsen, consideráu el gurú de l’accesibilidá y la usabilidá en páxines web, va participar en payares nel congresu “Fundamento web 2005” que va aconceyar n’Asturies a dalgunos de los másimos espertos mundiales en teoría y diseñu de sitios na rede. CTIC la fundación tecnolóxica financiada pol Principáu y empreses privaes ye la encargada d’entamar estes xornaes nes que se va falar del presente y futuru d’un llinguaxe mudable según s’avanza en nueves formes d’espresión n’Internet.

El congresu “Fundamentos web 2005” va celebrase ente los díes 22 y 24 de payares ente Uviéu y Xixón y ente los numberosos espertos que van aconceyar nestes xornaes ensin dulda lo más destacao ye la presencia de dos figures referenciales del asuntu que va tratase ende: Jakob Nielsen, conocíu como “el gurú de la usabilidá”, actual responsable de la empresa NNGroup, y Steven Pemberton, Investigador Senior nel CWI y coordinador de los Grupos de Trabayu de XForms y HTML del W3C.

El congresu va tratar de poner en claro “la urxente necesidá de garantizar un accesu universal a la información”, según palabres de los organizadores, la fundación CTIC. Los ponentes plantearán nel congresu el llamáu “diseñu pa toos” como requisitu indispensable pa que’l accesu a Internet sea equitativu ya independiente del tipu de hardware, software, infraestructura de rede, llingua, cultura, localización xeográfica o capacidaes de los usuarios.

El conceyu “FUndamentos web 2005” enmárcase dientro del plan del Principáu e-Asturies 2007, que tenta difundir la necesidá del accesu a la rede a los qu’inda nun lu tienen y pa espardir el conocimientu de la llamada sociedá de la información.

El conseyeru científicu de la Representación Permanente del estáu español énte la UE, Miguel Royo, afirmó ayer en Bruseles qu’Asturies recibe namás un 1% de fondos comunitarios pa Investigación y Desarrollu tecnolóxicos, menos de lo qu’había corresponde-y pol volume de negociu xeneráu pol conxuntu de les empreses de la nuestra comunidá. Royo punxo en comparanza a comunidaes como Madrid que reciben el 40 % de les ayudes o Cataluña, con un 20. Asturies namás s’aprosima a La Rioja y Cantabria.

Los datos remembrólos ayer l’asesor científicu de la representación española énte la UE nel cursu de les xornaes sobre I+D qu’entama’l gobiernu del Principáu en Bruseles col oxetivu de promover el desarrolu tecnolóxicu d’Asturies. Según estos datos les empreses del sector públicu y priváu de la nuestra comunidá recibieron en 2003 y 2004, 4,4 millones d’euros col fin de financiar proyectos d’I+D, frente a los 176 millones que recibió la comunidá de Madrid nesi periodu. Royo calculó nun 2 ó 3 por cientu, como mínimu, el porcentaxe qu’había corresponde-y a Asturies pol so volume de negociu.

L’espertu comunitariu reflexonó tamién que non ye fácil llograr acceder a estes ayudes porque pa ello desíxese l’agrupación y asociación d’empreses y organismos, y animó tanto a los empresarios asturiano como a l’administración a apostar por esi camín pa dir allegándonos al nivel d’otres comunidaes.

A estes xornaes que se celebren nel Edificiu Asturies de Bruseles, asistieron el presidente autonómicu, Vicente Álvarez Areces, asina como los conseyeros de Xusticia y Esteriores, Francisco Javier García Valledor, y d’Industria y Empléu, Graciano Torre. Xunta ellos una representación del IDEPA, de la Universidá d’Uviéu y de les principales empreses d’Asturies, ente elles Asturiana de Zinc, Aceralia, Química del Nalón, Corporación Peñasanta o Du Pont. Güei ta previsto qu’intervengan el presidente asturianu y el comisariu européu d’Economía y Asuntos Monetarios, Joaquín Almunia.

La viceconseyería de l’Administración Pública del Principáu, qu’empobina Luis Iturrioz, acaba de dexar en manes d’una fundación semiprivada, la CTIC (Centru Tecnolóxicu de la Información y la Comunicación), la contratación d’un serviciu d’asistencia técnica pa analizar y meyorar la usabilidá del portal Princast.es y de los diecisiete sitios institucionales de l’administración autonómica. La CTIC ye según los sos estatutos, una fundación ensin ánimu de lucru participada pol Principáu y un grupu d’empreses privaes.

La decisión d’utilizar a esta fundación semiprivada pa contratar l’asistencia técnica, en vez de ser la propia viceconseyería de l’Administración -de la que depende tolo relacionao cola política informática-, causó un fondu malestar ente los mesmos trabayadores de la Dirección Xeneral d’Informática y nel Comité d’Empresa de la Conseyería d’Economía, según informa na so edición de güei el diariu La Nueva España.

El fechu de dexar en manes d’una institución ayena a l’Administración Pública y polo tanto non obligada a cumplir coles garantíes de tresparencia y oxetividá a la hora de decidir la contratación, asina como l’encamenta-y un llabor que podía facer el propiu personal de la Dirección Xeneral d’Informática, ye la causa d’esti malestar ente unos trabayadores que consideren “cada vez faen menos” pal Principáu. La contratación por parte de la CTIC nun ta suxeta a los informes xurídicos del contratu nin l’Administración va tar presente na mesa de contratación. El fechu de que se trate d’un serviciu esclusivu y nel que la fundación CTIC queda como propietaria de tolos documentos, desarrollos informáticos y productos que resulten del contratu,tamién ye criticao pol Comité d’Empresa de la COnseyería y en distintos ámbitos del senu l’executivu autonómicu.

Los pliegos de cláusules técniques y administratives pa la contratación de l’asistencia técnica apaecen colgaos na web de la fundación CTIC y pueden consultase en formatu pdf. Na mesma introducción del sitiu defínese a la fundación como una “institución sin ánimo de lucro, promovida pol Gobiernu del Principáu d’Asturies cola colaboración d’un grupu d’empreses del ámbitu de les Tecnoloxíes de la Información y la Comunicación. L’oxetivu objetivo fundacional de la Fundación CTIC ye, según afirma la propia institución “promover y estimular actividaes relacionaes col desarrollu de la Sociedá de la Información y Tecnoloxíes de la Información orientaes al desarrollu rexonal. Nesi sen la CTIC espón ente les sos funciones les de “realizar actividaes de difusión, promoción, dinamización, formación, diseñu de estratexes, xestión y desarrollu de proyectos tecnolóxicos, tresferencia tecnolóxica, asina como actividaes d’investigación”.

Fundación CTIC

El diariu madrilanu El Mundo informa na so edición de güei que dos de los responsables de la web conocía como “El vino y el jamón” acaben de ser condenaos por un tribunal de Barcelona a dos años de cárcel y el pagu d’una multa de 30.000 euros por colgar nel so sitiu ‘cracks’ empobinaos a desprotexer programes comerciales de sosftware. La denuncia contra esti sitiu punxéronla en 1997 Autodesk, Lotus, Adobe, Novel y Microsoft. Agora un xuez de Barcelona acaba solventar la denuncia condenando a los creadores de “El vino y el jamón” nuna sentencia poco corriente nel estáu español.

Según informa El Mundo y otros medios la noticia d’esta sentencia difundióla l’axencia internacional BSA, una organización d’empreses de software que persigue’l fin de la piratería)y sienta un precedente na llucha contra la difusión de programes descodificadores de software protexíu.Los condenaos son F.J.D.G. (alias ‘Fer13’), creador del sitiu “El vino y el jamón” y F. M. (alias ‘Maki’) administrador de la páxina y copropietariu del dominiuvesatec.com xunto a A. B. (alias ‘Angeloso’), pola comisión d’un delitu permanente contra la propiedá intelectual, previstu nos artículos 270 y 271.b del Códigu. Penal.

El procesu escomenzó va ocho años cuando les empreses Autodesk, Lotus, Adobe, Novel y Microsoft presentaron una denuncia énte’l xulgáu númberu 3 de Barcelona pola reproducción y distribución de programes y pola tenencia y puesta en circulación de ‘cracks’ en nuna páxina ‘web’.Estos ‘cracks’ valíen pa derromper les protecciones incorporaes nos programas de software y otros materiales protexíos por derechos d’autor, que s’ufiertaben dende la páxina denunciada.

La Secretaría de Telecomunicaciones y Sociedá de la Información, dependiente de la Conselleria de Universidades, Investigación y Sociedá de la Información (DURSI) de la Generalitat de Cataluña acaba d’entamar una preba piloto de migración de los sos sistemes informáticos a software llibre, col fin d’espardelu darréu a tolos organismos del gobiernu catalán. Al empar, l’executivu que preside Pasqual Maragall, emprima una campaña al través de la DURSI pa promocionar l’usu del códigu abiertu na sociedá, dirixíu a universitarios. Entrames iniciatives surden del espíritu de progrsu del pactu tripartitu que caltién el gobiernu de Cataluña.

El secretariu de Telecomunicaciones y Sociedá de la Información de la Generalitat, Oriol Ferran, desplicó va unos díes nel anunciu de la puesta en marcha d’esta iniciativa que “el ‘software’ llibre y los estándares abiertos son un elementu importante pa garantizar una serie de llibertaes na manera d’entender la sociedá de la información”. L’apuesta pol ‘software’ llibre figuraba ente los alcuerdos del Pactu del Tinell ente los partíos del tripartitu, y tenta dinamizar el sector empresarial vinculáu coles tecnoloxíes de la información, asina como “facer accesibles tolos sitios web financiaos con fondos públicos” y “utilizar preferentemente ‘software’ llibre en catalán en los sistemes informáticos” de tolos organismos dependientes del Gobiernu catalán. El’software’ llibre, a diferencia del de propiedá, básase nel usu de códigos abiertos que se puen camudar y difundir llibremente, lo que permite un aforru nel coste de la llicencia y más facilidá pa consiguir la so traducción al catalán.

Como puntu de partida el plan de migración de los sistemes informáticos de la Generalitat ta desenvolviéndose nel usu de de “Fedora” y “Ubuntu” como sistemes operativos. Entrambes son distribuciones de Linux y tán traducíes al catalán. Nel terrenu ofimáticu, OpenOffice, una suite qu’incorpora procesador de testos, fueya de cálculu, programa de presentaciones, etc. Ye compatible col formatu Word de Microsoft y con otros formatos utilizaos por otres suites ofimátiques del mercáu. En cuantes a la edición d’imáxenes, apuéstase por “Gimp”, mientres que “Evolution/Kontact” ye l’aplicación elexida pa los servicios de corréu electrónicu y axenda. A la fin “Firefox”, va estendese per tola administración catalana y los sus ámbitos como navegador d’Internet.

Al empar el gobiernu de Catalunya al través de la DURSI emprimó una campaña de promoción del usu del software llibre ente la mocedá universitario embaxo’l lema: “Tu tries. Software lliure en catalá”(Tu escueyes. Software llibre en catalán) y créense tamién beques de hasta 2.000 euros pa los estudiantes qu’enfoquen los sos trabayos académicos dica la temática del códigu abiertu. El presupuestu d’esta campaña de difusión del software llibre ente la xente mozo ye de 90.000 euros per parte de la DURSI y d’otros 10.000 euros per parte de la Secretaría de Política Llingüística de la Generalitat.

El gobiernu de Cataluña nun ye’l primeru del estáu n’apostar pel códigu abiertu, otros como los d’Extremadura o el d’Andalucía ya lo ficieran. Fuera del estáu el gobiernu brasileiru apuesta tamién pol software llibre nes sos instituciones y el gobiernu británicu ta estudiando anguaño la posibilidá de migración de los sos sistemes informáticos.

Telecable celebró ayer los sos diez años d’esistencia nel mercáu de les telecomunicaciones con un actu públicu nel Auditoriu d’Uviéu que quiso compartir colos sos accionistes y empleaos pa rembrambrar el camín andáu hasta agora y preparase pa los nuevos retos del futuru. Nel actu, presidíu pol másimu responsable de la operadora asturiana, Roberto Paraja, presentóse’l llibru d’Eduardo García: “Diez años de telecable” y el profesor Fernando Pardo ufiertó una conferencia alrodiu de la tesis de que dientro otros diez años “nada va ser como ye anguaño” y “namás los que tean preparaos van ser quien a sobrevivir a los nuevos cambios”.

El profesor Pardo, encarrilador de proyectos audiovisuales como la televisión autónomica andaluza Canal Sur y espertu n’economía de les telecomunicaciones,emprimó la so conferencia confesándose un “admirador” del proyectu de Telecable dende los sos oríxenes n’Asturies y al ver que yera “la primera operadora española de cable que ganaba dinero”. Fernando Pardo emponderó la xestión desenvuelta hasta agora pol equipu directivu de la empresa y congratulóse del sitiu qu’ocupa anguaño nel ránking de les operadores de cable del estáu. De siguío, el conferenciante, pasó esponer la so tesis basada en que “dientro d’otros diez años nada de lo que güei conocemos y facemos con ésitu va ser igual”, polos cambios revolucionarios que se producen aína nel ámbitu tecnolóxicu: “olvidáivos de coses qu’anguaño son corrientes como que la telefonía fixa va pagase al preciu qu’agora se paga en comparanza coles otres formes de comunicación de voz, olvidáivos de que puedan siguir esistiendo empreses qu’ofrezan namás un solu serviciu, como delles cadenes de televisión actualmente líderes nel so campu”.

El futuru dibuxáu pol profesor Pardo resúmese na evidencia de qu’entós “too va ser dixital, tola información va unviase en cachinos y en paquetes, porque eso fai les redes más eficaces, dirá too en cachinos, la llamada que facemos por teléfonu, los archivos audiovisuales qu’unviemos, y si too va ser asina, too va dir pela mesma llinia”. Pa esti espertu nel mercáu de les nueves tecnoloxíes nesi futuru prósimu namás van sosistir los

xugadores múltiples: “los xugadores triples, el que crea qu’ufiertando un solu serviciu va siguir nel mercáu, ya puede xubilase o marchar al esiliu voluntariu, porque va aviáu”.

La dicotomía ente llinia ADSL y ente llinia de banda ancha de cable va dirimise nos nuevos tiempos como “una griesca ente’l vieyu esperimentáu de la ADSL y el mozu fuerte del cable y la fibra óptica”, sigún el símil del profesor Pardo. Nesa griesca, a xuiciu del espertu, “nun se sabe quién va vencer, lo único claro ye que’l vieyu esperimentáu por más que quiera nunca va ganar en mocedá y el mozu fuerte cuenta con esa ventaya, y la de tener la oportunidá de preparase lo meyor posible pa afrontar cualquier retu”. Tampoco la posibilidá d’escoyer ente cable y aparatos inalámbricos esmolez especialmente a Pardo pal que “vamos vivir nun mundu nel que naide conciba que pa falar por teléfonu l’aparatu tenga tar conectáu a un cable con servicios que namás van llegar por llinia de cable o fibra óptica”.

Pela so parte el periodista Eduardo García, na presentación del so llibru sobre la hestoria de Telecable, discurrió en tonu desenfadáu alrodiu de los cambios qu’esperimentara’l mundu desque él yera “un críu que xugaba peles cais de Xixón y que diba con munchos otros xixoneses a poneme delantre l’escaparate d’una tienda d’electrodomésticos a ver los partíos televisaos”, hasta la realidá actual na que “tola información ta al algame de cualquiera en tiempu real”. Afirmó que cuando entamó la so investigación sobre la operadora asturiana desconocíalo too “del mercáu de les nueves tecnoloxíes y del mesmu funcionamientu y estructura de la empresa”, la esperiencia, confesó valió-y “pa tener una imaxe de verdá atractiva, mui prestosa y provechosa d’esti proyectu qu’agora conozo casi como si fuera un empleáu de la casa”, darréu ironizó: “bono, meyor qu’un empleáu, como si fuera dalguién de fuera”.

Telecable, la única operadora de cable asturiana y cabezalera del sector na nuestra comunidá, afronta’l so décimu aniversariu sabedora de ser, según datos ufiertaos por un recién estudiu del Institutu Nacional d’Estadística, líder n’Asturies en conexón a Internet per cable, per enriba de competidores como Telefónica, Wanadoo o Ya.com, y responsable de que la nuestra comunidá ocupe un sitiu destacáu ente les comunidaes autónomes qu’apuestes pola banda ancha.