Tecnoloxía

La Conseyería d’Educación va esparder a lo llargo d’esti añu l’accesu a Internet a 212 centros de primaria y secundaria de toa Asturies. El programa d’espardimientu de la rede a centros docentes ta previsto que se desenvuelva dientro los Planes Aules TIC y Educastur.

El primeru d’estos planes va aplicase a 95 centros y el segundu a otros 207. Les Aules TIC pretenden completar la iniciativa nomada ‘Internet en la escuela’, que s’entamó en noviembre del 2002. Agora col nuevu programa quier completase la conectividá en banda ancha y tamién l’equipamientu multimedia.

El plan beneficia a Primaria y Secundaria, en concreto a 97 centros de tola comunidá. Nel listáu de la Conseyería apaecen colexos d’Avilés, Siero, Bimenes, Llanera, Xixón, Uviéu, Morcín, Cangas del Narcea, Navia, Carreño, Gozón, Tapia y Valdés.

Los xestores encargaos de rexistrar y distribuir los primeros sitios web adscritos al nuevu dominiu .cat nun dieron abastu dende qu’escomenzó la primer fase esti llunes 13 a media tarde. Hasta agora hai ya más de 1.600 páxines rexistraes nel dominiu reserváu pa la comunidá catalana.

El gobiernu de la Generalitat y los sos diversos departamentos, les universidaes catalanes, medios de comunicación y entidaes deportives señeres de Cataluña como’l F.C. Barcelona o el R.C. Espanyol son los nomes más signficicativos que se pueden atopar nel nuevu rexistru .cat . La entidá que xestiona’l nuevu dominiu, la Fundación Punt Cat afirmó que más d’un cientu de los sitios web rexistraos nel dominiu catalán ya tán activos y lliberaos.

La primer fase pa rexistrase na nueva estensión ta empobinada a entidaes públiques y privaes de calter institucional, social o cultural. Nuna segunda fase van poder rexistrase les cerca de 60.000 entidaes y particulares que sofitaron la creación del dominiu pa la comunidá catalana y na tercera fase va abrise’l rexistru de manera universal.

Alrodiu de milenta direcciones de les primeres que se rexistraron en .cat pertenecen a l’administración autonómica catalana, que tien ya el so nuevu nome dixital en www.gentat.cat y en www.catalunya.cat les sos principales señes.

El procesu de rexistru de les primeres direcciones de sitios web nel dominiu .cat escomienza esti llunes 13 a les 17,00 hores y d’entós pa en delantre va ser cuando se puedan ver les primeres páxines inxertaes nel nuevu dominiu. La segunda fase de rexistru ta programada pal prósimu 20 de febreru y la tercera y última pal Día de San Jordi el prósimu 23 d’Abril.

La fase de rexistru que principia esta tarde ta empobinada a entidaes que trabayen nel ámbitu de la defensa y promoción de la llingua y cultura catalanes. La segunda fase va dar pasu a les empreses y asociaciones con presencia en catalán na rede al través de páxines web, blogs, etc. La última fase, prevista pal Día de San Jordi, va dar la posibilidá de rexistrase a les más de 60.000 entidaes y particulares que sofitaron la campaña en favor d’un dominiu propiu pal idioma nacional de Cataluña.

L’ICANN, organismu internacional encargáu del rexistru de dominios web, reconoció en setiembre de 2005 l’apertura d’un rexistru dedicáu a la llingua y la cultura catalanes. Yera la primer vez qu’esti organismu reconocía un dominiu propiu pa una comunidá nacional y cultural ensin estáu.

El primer conseyeru de la Generalitat de Cataluña, Josep Bargalló, presentó esta selmana el primer corrector ortográficu y gramatical en llingua catalana que ye al empar traductor automáticu en diversos idiomes. La nueva ferramienta va completar les sos prestaciones a lo llargo d’esti añu y ye d’accesu gratuítu a los usuarios.

El traductor empobináu pol gobiernu de la Generalitat va costar unos 250.000 euros y ta concebíu pa traducir testos curtios y páxines web del catalán a otros idiomes y viceversa. A lo llargo’l primer trimestre de 2006 va perfeccionase en castellano y n’inglés, darréu, enantes de que fine l’añu va poder utilizase tamién en francés. La ferramienta va desarrollar nun futuru la capacidá pa tornar tamién testos del catalán al alemán y al rusu, y viceversa; tamién al gallegu, italianu, portugués y aranés, anque nestos casos la torna va ser namás nesti sen.

El proyectu inxértase dientro los planes del gobiernu catalán pa fomentar l’usu del idioma propiu d’esa comunidá nes nueves tecnoloxíes. L’otru serviciu que presta la ferramienta, el de corrector, ta presupuestáu nunos 270.000 euros y tien por oxetivu ayudar a la escritura curiosa en llingua catalana afayada a les normes ortográfiques y gramaticales del idioma.

Un informe recién del Instituto Nacional de Estadística (INE) desvela que nueve de cada diez rapaces asturianos, con edaes comprendíes ente los 15 y los 24 años, usen d’avezu Internet. La cifra de xente mozo que navega pela rede na nuestra comunidá ye la más alta del estáu, superando n’once puntos la media española.

El porcentaxe de rapacinos d’ente 10 y 14 años tamién algama una de les cotes más altes del estáu, asitiándose nel 76,3 por cientu, el segundu del conxuntu de les comunidaes. La cifra cimera, sicasí, ye la de rapaces d’ente 15 y 24 na que’l 91,41 por cientu d’ellos naveguen d’avezu por Internet, mientres la media española ta nun 80,38 por cientu.

El campus universitariu de Mieres va ser la sé que va abellugar el futuru European Center of Soft Computing, un proyectu conxuntu del gobiernu del Principáu y Caxastur que se presenta como centru investigador de referencia na Unión Europea. Un presupuestu de 13,2 millones de euros pa los prósimos seis años, aportaos pola administración autonómica y la primer entidá financiera d’Asturies van destinase a facer realidá el proyectu.

El primer pasu pa la materizalización de la iniciativa fue la presentación esti martes 17 en Mieres de la Fundación pal Progresu del Soft Computing, una institución encargada de poner en marcha el proyectu del centru d’investigación tecnolóxica. De los fondos colos qu’escomienza andar el proyectu Caxastur va aportar 6 millones, otros 6 l’Institutu pa la Reestructuración de la Minería del Carbón, provenientes de los fondos mineros, más 1,2 millones d’euros apurríos por parte del Gobiernu del Principáu.

L’European Center del Soft Computing va dedicar les sos actividaes a la investigación d’esta rama específica de la intelixencia artificial y tien como oxetivos la creación de grupos d’investigadores y el desarrollu de proyectos y llínies d’ investigación de nueves tecnoloxíes y d’ innovación, asina como la difusión del conocimientu científicu d’aspectos relacionaos cola tecnoloxía al través de programes de formación y d’otres actividades.

La presidenta de l’Academia de la Llingua, Ana Cano Fernández y el decanu del Colexu Oficial d’Inxenieros n’Informática del Principáu d’Asturies, Aquilino Adolfo Juan Fuente, firmaron esti xueves 12 un conveniu de colaboración ente entrambes entidaes. L’alcuerdu allampia l’espardimientu y la normalización de la llingua asturiana nel ámbitu de les tecnoloxíes de la información y la comunicación.

El conveniu-marcu robláu pola Academia de la Llingua y el Colexu d’inxenieros informáticos Conveniu-Marcu, talo afirma nel propiu testu del alcuerdu: “nagua por afitar un entornu de referencia pa l’aición coordinada ente les Partes, tanto sobre l’intercambiu d’información como sobre’l desarrollu d’aquelles actuaciones empobinaes a potenciar la investigación, l’estudiu y la celebración de Seminarios, Cursos y Conferencies sobre temes d’interés común”. Los exes nos que va articulase el desenvolvimientu del alcuerdu cinquen a la realización de xornaes divulgatives, conferencies y seminarios, asina como l’entamu de cursos específicos, seminarios, meses redondes, etc., sobre temes d’interés nel ámbitu del espardimientu y normalización de la Llingua Asturiana nel mundu de les nueves tecnoloxíes. Tamién se recueye l’intercambiu d’información sobre les actividaes de dambes entidaes y acciones empobinaes a la formación.

Nel conveniu encamiéntase darréu “afitar canales d’espardimientu y promoción de servicios y actuaciones col envís de concienciar a los titulaos n’Inxeniería n’Informática y a los Profesionales d’esti sector en xeneral sobre aspeutos rellacionaos cola Llingua Asturiana”. Nel entamu del conveniu el Colexu Oficial d’Inxenieros n’Informática del Principáu d’Asturies (COIIPA), “acordies colo conseñao nel artículu 4.1 del Estatutu d’Autonomía del Principáu d’Asturies en redaición dada per Llei Orgánica 1/1999 de 5 de xineru, reconoz tener parte de responsabilidá nel espardimientu y normalización de la Llingua Asturiana nel ámbitu de les Teunoloxíes de la Información y de les Comunicaciones y la Informática en xeneral” y considera d’interés, poro, desenvolver llabores de collaboración cola Academia de la Llingua Asturiana que habrán concretase dende la robla d’esti alcuerdu.

Amnistía Internacional denuncia nun informe fechu públicu estos díes de la ufierta de videoxuegos y xuguetes en secciones comerciales dedicaes al públicu infantil nos que se fomenta la violación de los derechos humanos. La organización humanitaria cita nel so informe una llista con dellos de los xuegos qu’inciten a la tortura y a los malos tratos.

Cuando se cumple el 10 aniversariu de la Convención sobre los Derechos del Neñu, tortures, matances, asesinatos y execuciones tán presentes nos xuguetes y, sobetoo, nos videoxuegos ensin qu’ esista lexislación nel estáu español y nel marcu de la Unión Europea que protexa a los neños y otros menores d’edá del fomentu d’estes práctiques atentatories contra los derechos humanos. Esi ye’l principal mensaxe de la denuncia cola qu’Aminstía Internacional avisa nel so informe alrodiu de xuguetes, videoxuegos y derechos humanos.

El documentu d’AI estudia dalgunos casos de xuguetes y videoxuegos que aplauden con impunidá la tortura, la matanza o les execuciones y proporciona amás, una serie de recomendaciones concretes a autoridades del Estáu, Gobiernos Autonómicos, Asociaciones de Fabricantes de Xuguetes, Empreses de Videoxuegos, Asociaciones de Padres y Consumidores y profesionales de la educación pa promover una lexislación y Códigos Éticos que protexan al menor y que se denuncien los xuguetes que promuevan estes práctiques aberrantes.

Más información

La modernización de los servicios administrativos afayándolos a les nueves posibilidaes de la comunicación electrónica ye l’asuntu que va xuntar en Xixón los prósimos díes 19 y 20 de xineru a espertos de tol estáu. Les xornaes nomaes “Abierto 24 hores” van debatir los retos y ventayes de l’Administración tecnolóxica.

Nes xornaes van tar presentes ente otros el director xeneral de Modernización Administrativa del Ministeriu d’ Administraciones Públiques, Domingo Laborda Carrión;Miguel Azorín Albiñana, subdirector xeneral de Tecnoloxíes de la Información del Ministeriu d’Industria, Comerciu y Turismu; Joseba Koldo Bilbao Gaubeka, director de la Oficina pa la Modernización Administrativa del Gobiernu Vascu; Marta Continente, directora xeneral d’Atención Ciudadana de la Secretaría Xeneral de la Presidencia de la Generalitat de Cataluña; y José Manuel Alonso, director de W3C España.

El programa de les xornaes “Abierto 24 hores” van escomenzar el xueves 19 de xineru con una conferencia de Manuel Toharia, director del Muséu de les Ciencies de Valencia y al actu inaugural tien previsto asistir el Ministru d’Administraciones Públiques, Jordi Sevilla.

Les xornaes estructúrense alrodiu cinco meses redondes nes que va analizase la situación de la administración electrónica dende’l puntu de vista del Gobiernu Central, los Executivos Autonómicos y les Corporaciones locales; asina como la visión que d’ella tienen les empreses y los ciudadanos.

El Conseyu de Gobiernu del Principáu aprebó nel so aconceyamientu d’esti viernes 30 el Plan de Ciencia, Tecnoloxía ya Innovación p’Asturies, un ambiciosu programa col que l’executivu autonómicu quier dar puxu a la I+D como motor de la economía de la nuestra comunidá.

El Plan encarrila les medíes necesaries p’algamar un desarrollu equilibráu y eficaz del sistema asturianu d’innovación y amuesa especial atención al diseñu de la estratexa d’apoyu a la innovación.