Sociedá

La Fundación ‘Príncipe de Asturias’, que concede añalmente los premios del mesmu nome, quier cellebrar el so primer cuartu de sieglu per tolo alto. Parte de los premiaos nos últimos venticinco años pasarán per Uviéu a partir de la seronda de 2005 nun programa conmemorativu que tien l’envís declaráu de facer d’Asturies un “referente mundial” de la cultura.

Asina lo anunciaron güei en París el presidente autonómicu, Vicente Álvarez Areces, y el másimu responsable de la Fundación Príncipe, José Ramón Álvarez Rendueles, nel trescursu d’un actu formal nel que l’axencia de les Naciones Xuníes pa la Educación, la Ciencia y la Cultura -la Unesco- dio’l so plenu sofitu a los actos del aniversariu de la entidá asturiana.

Al traviés del so director xeneral, el xaponés Koichiro Matsuura, la Unesco reconoció esti mediudía l’importante papel de la Fundación ‘Príncipe de Asturias’ nel afitamientu y la difusión de la cultura mundial, y apoyó dafechu un programa de conmemoraciones que va prollongase dende ochobre de 2005 hasta la seronda de 2006 y que, magar de nun tar peslláu, trayerá otra vuelta a Asturies con toa probabilidá -según la propia Fundación- a figures de la talla del cineasta Woody Allen, l’ex presidente soviéticu Mijail Gorbachov y el sociólogu Anthony Giddens, ideólogu de la nomada ‘Tercer vía’.

Amás de dar el so simbólicu sofitu, la Unesco tien previsto participar activamente nel calendariu d’eventos del 25 aniversariu de la Fundación ‘Príncipe’: El propiu director xeneral de l’axencia tará presente na apertura’l programa, en cuyos alderiques y conferencies tarán llamaos a intervenir nomes propios lligaos a l’axencia cultural de la ONU.

La lliteratura asturiana tresciende fronteres. La comunidá autónoma de La Rioja acueye a partir de mañana la cellebración del IV Día de les Lletres nel Esterior, cuyos actos centrales van desendolcase en Logroño y nel monasteriu de San Millán de la Cogolla. Esther Fonseca, Roberto Iglesias y Xuan Bello protagonizarán nesi edificiu relixosu l’actu institucional, concebíu como un amiestu de música, poesía y alderique.

Los tres van contribuyir dende estayes diferentes: Fonseca llevará la voz cantante nun recital musicáu, en tantu que Bello pronunciará una conferencia y l’autor Roberto Iglesias recibirá un homenaxe públicu nuna tierra -La Rioja- a la que ta fondamente vinculáu.

El sábadu, les cellebraciones treslladaránse a la capital de La Rioja, Logroño, onde ta prevista la proyección de curtiumetraxes asturianos y l’actuación del Orfeón de Mieres. Una espicha popular nel Centru Asturianu sedrá’l remate de les cellebraciones.

El Día de les Lletres nel Esterior, que n’años anteriores se cellebró n’Uruguay, París y Las Palmas de Gran Canaria y respuende a una iniciativa conxunta del Conseyu de Comunidaes Asturianes y l’Academia de la Llingua, algama la so cuarta edición col envís d’espardir la cultura d’Asturies ente los emigraos fuera’l país, en feches prósimes a la cellebración del Día de les Lletres Asturianes.

Dos mil d’ente mediu millón. Les biblioteques públiques asturianes d’ámbitu autonómicu, qu’ultimen un meyor serviciu al traviés d’internet p’aportar a más llectores y popularizar l’usu de los catálogos, atesoren un total de 1.937 obres lliteraries escrites en llingua asturiana sobre un total de 484.264 llibros y cartafueyos, lo que supón alpenes el 0,4 por cientu de los fondos.

Esi ye’l datu consultable nos ordenadores en rede polos que s’accede al catálogu xeneral de les biblioteques públiques que son titularidá del Principáu, pa les qu’inda ayeri el presidente autonómicu, Vicente Álvarez Areces, vaticinó un meyor serviciu gracies a la busca y solicitú de títulos al traviés d’internet.

Los casi dos mil rexistros en llingua asturiana qu’atesoren les biblioteques asturianes, catalogaos nel sistema informáticu embaxo’l términu “bable”, suponen el doble de les obres que tien catalogaes l’Axencia española del ISBN, l’organismu ensertáu nel Ministeriu d’Educación, Cultura y Deporte, que controla y sistematiza tola producción editorial estatal, asignándo-y un númberu a cada obra dientro d’un códigu d’aplicación mundial (l’International Standard Book Number, que da llugar al acrónimu ISBN).

La industria editorial n’asturianu asoleya alredor de cien nuevos títulos cada añu, una cifra lixeramente superior a la de llibros que salen al mercáu añalmente subvencionaos pola Conseyería de Cultura del Principáu. Na última convocatoria resuelta, la correspondiente a 2003, el Gobiernu autonómicu subvencionó la edición de 74 llibros, d’ente los 165 proyectos presentaos.

L’Academia de la Llingua Asturiana convoca un añu más la prueba de conocencia del asturianu del mes de mayu, que constará de dos partes, una escrita (dictáu, torna, exercicios gramaticales, redaición) y otra falada (conversación). Tamién hai una estaya de llingua y sociedá, na que se pidirá conocencia de la llingua dientro del procesu normalizador nel que ta inmersu. La prueba ta abierta a toles persones interesaes.

A les persones declaraes aptes nes pruebes citaes, l’Academia va da-yos un documentu onde s’afite la conocencia nel nivel 1 o básicu según calces siguíos por esta institución. Los que nun superen les pruebes del nivel 1 podrán presentase a nueves convocatories toles vegaes que-yos pruya.

Pa concurrir a l’esamen y superalu con ésitu resulta imprescindible conocer les xeneralidaes gramaticales de la llingua asturiana y los aspeutos básicos de la so normativa ortográfica. Asina mesmo, aconséyase la llectura de testos fechos acordies cola normativa, como los asoleyaos pola propia Academia, n’especial la Gramática de la Llingua Asturiana publicada pola institución.

El Principáu quier que más neños falen y escriban asturianu porque esa ye “la meyor garantía de qu’una llingua tien futuru”. Nestos términos presentó esta mañana el director de Política Llingüística y Promoción Cultural, Carlos Madera, una campaña del Gobiernu autonómicu pa alitar la matriculación d’alumnos de colexos ya institutos na asignatura de Llingua. Repartiránse 30.000 dípticos nos centros y daráse-y especial relevancia al Gallego-Asturianu.

De fechu, según apuntó el director de la Oficina de Política Llingüística del Principáu, Ramón d’Andrés, l’envís del departamentu que dirixe ye tratar a la variedá llingüística que se fala ente los ríos Navia y Eo de mou “paralelu” a lo que se fai col asturianu. Y eso pesie al desfase nes cifres: Nel enésimu recuentu del númberu d’escolinos qu’estudien Asturianu, la directora d’Ordenación Académica, Dolores Guerra, estimó en 19.523 los alumnos qu’anguaño cursen Llingua (16.000 en Primaria y el restu en Secundaria), mientres que namás 336 ecolinos estudien Gallego-Asturiano nos colexos ya institutos de la comarca Navia-Eo.

La propaganda qu’acaben de llanciar en comuña la Conseyería d’Educación y Ciencia y la de Cultura, Comunicación Social y Turismu aportará a los centros educativos nes dos variedaes idiomátiques yá dende’l lema qu’anima a los neños a matriculase en Llingua: “Ye nuestro”, n’asturianu; “É noso”, en gallego-asturianu. Dambos eslóganes sonarán en cuñes radiofóniques y veránse en 2.000 cartelos publicitarios, coincidiendo cola apertura, ayeri, del plazu de preinscripción pal cursu escolar 2004-2005.

Magar d’ello, siguirá aplicándose la esixencia llegal de contar polo menos con ocho alumnos pa impartir clases de Llingua Asturiana nos institutos, eso sí, con posibilidá de “flesibilizar” esi númberu, según D’Andrés, y de que se puea estudiar asturianu o gallego-asturianu en centros con una cifra menor d’escolinos solicitantes, en tou casu mayor de cuatro o cinco.

La campaña informativa pola escolarización en Llingua Asturiana cuenta con un presupuestu de 30.000 euros y mantendráse en vigor hasta’l prósimu 21 de mayu. L’oxetivu esencial d’Educación y Cultura ye aportar al mayor númberu posible de pas y mas, y superar la cifra actual d’escolinos d’asturianu, que ronda los 20.000.

La edición númberu venticuatru de los Premios Príncipe d’Asturies, que s’entregarán n’Uviéu na prósima seronda, acumula yá grandes cifres: A un mes de la xuntanza del primeru de los xuraos, que decidirá pa quién ye’l premiu de les Lletres 2004, la entidá convocante de los galardones acumula más de 200 candidatures avalaes por cien mil cartes d’estremada procedencia.

La maquinaria de la vixesimocuarta edición de los ‘Príncipe’ yá circula a plenu pulmón y esta mesma selmana tien una importante cita en París, onde l’axencia de les Naciones Xuníes pa la Eduación, la Ciencia y la Cultura -la Unesco- amosará el so sofitu formal a los galardones nun actu que se cellebrará a mediudía del vienres na Embaxada d’España énte la Unesco, allugada na capital francesa.

L’apoyu de la axencia cultural de la ONU respaldará espresamente les bodes de plata de los Premios Príncipe, que na so edición del añu 2005 cumplirán 25 años de vida, pero valdrá tamién pa da-y un puxu especial a la convocatoria d’esti añu. Dientro d’un mes, el 10 de xunu, el xuráu del premiu de les Lletres aconceyará n’Uviéu y emitirá’l so fallu al otru día, inagurando una llista de premiaos que dirá completándose antes d’aportar xunetu colos galardonaos nes estayes d’Investigación Científica y Técnica (16 de xunu), Ciencies Sociales (23 de xunu) y Comunicación ya Humanidaes (30 de xunu).

Caún de los ocho Premios ‘Príncipe de Asturias’ que s’otorgarán nesta edición ta dotáu con 50.000 euros, una escultura espresamente diseñada por Joan Miró y un diploma acreditativu.

Un total de setenta llibreríes y tiendes de discos súmense güei a la cellebración del Día del Llibru y el Discu n’Asturianu, ufriendo un descuentu xeneral del diez por cientu nes ventes que despachen a lo llargo de tola xornada. La iniciativa coincide col XXV Día de les Lletres Asturianes, cuyos dos actos centrales -una manifestación pola oficialidá y un actu solemne de l’Academia de la Llingua- treslládense esti añu a Avilés.

La llista d’establecimientos que secunden el día dedicáu a la creación n’asturianu intégrenla les principales llibreríes y tiendes de discos d’Uviéu, Xixón, Avilés y Mieres, amás d’otros negocios de L’Entregu, L’Infiestu, Siero, Nava, Villaviciosa y Llangréu. Los llectores del oriente podrán acudir a tiendes de Cangues d’Onís, Llanes y Les Arriondes, en tantu que’l públicu de la zona occidental habrá facer les sos compres en Cangas del Narcea, Cuideiru o L.luarca.

Pero el centru de gravedá de la xornada tará n’Avilés. Ellí partirá a les siete de la tarde la manifestación pola oficialidá del asturianu qu’entama la Xunta Pola Defensa de la Llingua Asturiana, y una hora depués empezará, nel auditoriu de la Casa Cultura, l’actu solemne col que l’Academia de la Llingua cellebra el XXV Día de les Lletres Asturianes, que tará conducíu pola periodista Sonia Avellaneda y ye frutu de la coordinación del académicu Xosé Antón González Riaño.

Darréu de too ello, Xunta y Academia axuntaránse nuna espicha popular que va cellebrase nuna carpa asitiada nel esterior de la Casa Cultura d’Avilés.

L’asturianu tará presente nel Fórum de Barcelona, el mayor eventu multicultural que ta programáu n’Europa pa 2004 y que mañana abre les sos puertes al públicu con más de 750.000 entraes yá vendíes. Pesie a que les autoridaes polítiques daben casi por fecha la esclusión de la llingua asturiana del Fórum por problemes de tiempu y planificación, l’asturianu codearáse a la fin coles otres milenta llingües que van tener llugar propiu nel eventu.

La confirmación dióla ayeri n’Uviéu el director xeneral de Turismu de Barcelona, Pere Durán, qu’anunció la inclusión del asturianu na bayura d’idiomes que’l Fórum va reivindicar al entender cada perda d’una llingua como la desapaición dafechu d’una forma singular d’interpretar la vida y, poro, d’un ricu elementu de diversidá.

Ye una nuncia qu’aporta cuando fontes de la Oficina de Política Llingüística reconocíen abiertamente, hai namás unes hores, que la presencia del asturianu nel Fórum de Barcelona peligraba por problemes de plazos y de planificación, y too paecía indicar que la llingua asturiana diba quedar escluyida del multitudinariu eventu.

Depués de la so apertura oficial, que tendrá llugar mañana, sábadu, el Fórum permanecerá abiertu hasta’l 26 de setiembre nun recintu edificáu pa la ocasión nel norte de la ciudá y ufrirá 350 espectáculos escénicos, cifra na que nun tán contabilizaos los conciertos, que sedrán casi cuatrocientos.

Acaba d’entamase l’Ensame pa la Oficialidá de la Llingua d’Asturies, una asociación que sigún desplicaba na so presentación pública, al traviés d’un comunicáu, va dedicar “los sos esfuercios a trabayar na igua del conflictu llingüísticu que carez Asturies, puxando pola oficialidá del asturianu y la defensa los drechos llingüísticos de los sos ciudadanos, dando rempuesta a la represión que carecen nesti ámbetu”.

Miembros del Ensame pa la Oficialidá presentáronse’l xueves seis de mayu pela mañana, víespora del sinificáu Día de les Lletres Asturianes, énte la Oficina de Política Llingüística pa denunciar con dos prebes materiales “la represión llingüística que define la política’l Gobiernu IU-PSOE”. La primera d’elles yera un garrapiellu d’indicaores viales que, acordies cola llexisllación vixente, presentaben topónimos illegales, al nun tar espresaos na llingua d’Asturies. Y la segunda yera “l’escritu de la Conseyería d’Economía y Alministración Pública pol que se refuga’l rexistru del propiu Ensame pa la Oficialidá por presentar unos Estatutos n’asturianu”.

Sigún denuncia l’Ensame, el Gobiernu comunicó-yos que tienen de presentar los sos Estatutos n’español, en gallegu, euskera o catalán, pero que nun puen facelo n’asturianu. Curiosamente, sigún diz la nota asoleyada’l mesmu día de la so apaición en públicu, “el Gobiernu acaba dar de pasu estatutos presentaos sólo n’asturianu por otres asociaciones; sicasí, IX y PSOE punxeron especial precuru pa reprimir l’usu del asturianu nuna asociación que ñaz pa defender nequívocamente la oficialidá de la llingua d’Asturies”.

La nota que sirvía de presentación al nuevu coleutiu plantegaba delles otres desixencies y crítiques abondes al discursu qu’ufriera la Conseyera de Cultura, Ana Rosa Migoya, nel entamu de la programación de la Selmana de les Lletres 2004.

Crítiques a la clas política asturiana, pidimientos directos d’eficiencia al Gobiernu autonómicu y, sobre too, la esixencia de que l’asturianu seya oficial “pa nun velu morrer en tiempu real”. Con esi triple mensaxe discurrió la manifestación ciudadana del Día de les Lletres Asturianes, qu’axuntó nes cais d’Avilés a 2.500 persones, según el cálculu de la Policía Municipal.

La cifra de participantes abultóse menor a simple vista, pero en tou casu la marcha enllenó de colloríu el cascu vieyu avilesín ente eslóganes de nuevu cuñu vieyes consignes. Ente éstes últimes, la propia demanda d’oficialidá pa la llingua asturiana, presente na pancarta de la cabecera venti años depués de que la Xunta pola Defensa de la Llingua Asturiana naciera precisamente cola meta de la oficialidá como fin cimeru.

Ente les innovaciones, una sátira de la futura radiotelevisión autonómica contra una hipotética ausencia del asturianu nes emisiones, glayíos de censura al Gobiernu autonómicu de coalición y un guiñu al reciente cambiu de signu del Gobiernu central: “ZP fala asturianu na intimidá”, rezaba una pancarta de Lliberación.

Polo demás, presencia reseñable de tolos partíos políticos, sindicatos y collectivos sociales implicaos na defensa de la llingua asturiana, dende Andecha Astur, Izquierda Asturiana y Partíu Asturianista a Izquierda Xunida-Bloque por Asturies, a cuyos cabezaleros, que circularon na cola de la manifestación, tocó-yos aguantar el chaparrón de les llamaes severes a una acción más intensa en defensa del asturianu dende l’Executivu autonómicu.

De “decepción” tildó un voceru de la Xunta, al acabu de la marcha, les polítiques desendolcaes hasta la fecha pol Gobiernu PSOE-IX-BA. Entiende la Xunta pola Defensa de la Llingua que ye imprescindible una Dirección Xeneral de Política Llingüística “con rangu y presupuestu abondu” pa garantizar la sobrevivencia d’un idioma qu’amorrenta, y llama la clas política a apartar el “provincianismu” pa incluyir la oficialidá nuna futurible reforma del Estatutu d’Autonomía del Principáu.

Los organizadores de la manifestación, que trescurrió nuna tregua meteorolóxica ente la estación intermodal y la Casa Cultura d’Avilés, amosáronse amás escépticos énte les midíes concretes de normalización anunciaes esta mesma selmana pola Conseyera de Cultura, Comunicación Social y Turismu, Ana Rosa Migoya, “porque en casi un añu de gobiernu nun foron quien a garantizar que tolos rapacinos puean estudiar asturianu”.