Sociedá

Xixón quier da-y puxu a la normalización de la llingua asturiana nos conceyos. La Oficina Municipal de la Llingua ultima la preparación d’unes xornaes de caltenimientu y promoción del asturianu nel ámbitu municipal que se cellebrarán ente’l 15 y el 17 de payares, coincidiendo col avance de resultaos d’un estudiu sociollingüísticu ellaboráu pol caderalgu de la Universidá del País Vascu Francisco Llera Ramo.

Asina, los responsables de la oficina municipal que dirixe María Xosé Rodríguez centren el so llabor a mediu plazu nuna seronda na que’l conceyu más populosu d’Asturies dará pasos importantes na normalización del asturianu, empezando pola definición, nes prósimes selmanes, del cuestionariu nel que va sustentase l’estudiu de Llera Ramo y pol aniciu d’esa investigación a partir de setiembre.

Si se cumplen les previsiones de la Oficina Municipal de la Llingua, los xixoneses tendrán al so algame nos últimos díes de payares o nos primeros d’avientu un primer diagnósticu de la vitalidá de la llingua asturiana nel so conceyu, al traviés d’un avance de los resultaos del estudiu tuteláu por Francisco Llera Ramo, caderalgu de Ciencia Política y de l’Alministración, director del ‘Euskobarómetro’ y responsable del principal estudiu sociolóxicu sobro l’asturianu, cuya segunda edición asoleyóse en febreru pasáu.

A esi soporte teóricu pondrá-y la parte práctica la xuntanza de trabayu de los servicios municipales de normalización yá en marcha o a puntu d’echar a andar, qu’aconceyarán por iniciativa de la Oficina de la Llingua de Xixón nunes xornaes a les que tamién van asistir representantes d’entidaes de promoción llingüística d’otres comunidaes autónomes, y nes que van debatise midíes concretes de promoción y defensa de la llingua nel ámbitu llocal.

Una gramática pal estremeñu basada na grafía adaptada de la llingua asturiana. La páxina web ‘Iventia.com, Noticiariu Elehtrónicu Estremeñu’, editada n’Estremadura, estudia y difunde les variedaes del dominiu llingüísticu “astur-lleonés”, del qu’inclúi un mapa detalláu hasta Huelva.

El sitiu ellectrónicu resume, nun documentu de 42 páxines descargable en formatu pdf, la normativa gramatical pa la variedá llingüística estremeña a partir, ente otros estudios, de la Gramática pal asturianu publicada pola Academia de la Llingua en 2001, y alita la conservación del pallabreru autóctonu al traviés d’un breve diccionariu on-line castellanu-estremeñu.

Tres de la iniciativa, qu’inclúi una portada con noticies d’ámbitu mundial y rexonal redactaes dafechu n’estremeñu, hai dos nomes propios: María Teresa Batalla, responsable’l diseñu, y Carlos Quiles, ellaborador de los conteníos, nacíu en Badajoz y titular d’un currículum qu’incorpora más d’una decena d’idiomes falaos y leyíos n’estremaos niveles.

Según precisa Quiles, qu’asume el llabor d’alministrador de la páxina web, ‘Iventia.com’ céntrase nes “fales estremeñes de raigón lleonés” qu s’enserten nel dominiu “astur-lleonés”, y quier abordar l’alderique estrictamente llingüísticu más allá de les sos connotaciones polítiques.

La web estremeña, que pretende abrir un discutiniu sobro la necesidá de normalizar les estremaes llingües y variedaes minoritaries -ente elles, l’asturianu-, inclúi un foru d’opinión abiertu a la participación de los internautes.

Enllace a la páxina web ‘Iventia.com’

Un total de 1,8 millones d’euros nos prósimos tres años pa facer d’Asturies la “capital cultural del mundu”. El presidente’l Principáu, Vicente Álvarez Areces, comprometió güei la entrega d’esa cantidá a la Fundación ‘Príncipe de Asturias’, que concede los premios homónimos y qu’a partir d’ochobre de 2005 cellebrará’l so 25 aniversariu aconceyando n’Asturies a docenes de galardonaos nel últimu cuartu de sieglu.

Sedrán doce meses d’actos culturales espardíos pol Principáu qu’hasta la seronda de 2006 pretenden proyectar la imaxen d’Asturies nel mundu mediante un programa “difícil d’emular”, según Areces, articuláu en tres grandes estayes: Grandes conciertos, esposiciones pictóriques de sonadía y conferencies y alderiques, too avalao pola participación de galardonaos nes anteriores ediciones de los premios.

Magar que los actos concretos entá nun tán definíos, yá que la comisión que los prepara sólo manexa un “esquema d’idees”, el presidente de la Fundación ‘Príncipe’, José Ramón Álvarez Rendueles, avanzó esti mediudía n’Uviéu, depués de firmar l’alcuerdu económicu col Gobiernu autonómicu, que “docenes” de premiaos yá sondeaos pola entidá confirmaron la so disposición de participar nes cellebraciones ensin problemes d’axenda, tomando en cuenta que los actos cellebraránse a lo llargo d’un añu enteru.

No puramente abstracto, tanto Rendueles como Areces sorrayaron el papel de los premios ‘Príncipe’ pa difundir la imaxe d’Asturies nel mundu, premios que’l presidente autonómicu reivindicó -citando al escritor Octavio Paz, galardonáu en 1993- como un “mapa moral ya intelectual de la nuesa cultura”.

Vicente Álvarez Areces y José Ramón Álvarez Rendueles rubricaron güei na Presidencia’l Gobiernu el conveniu pol que’l Principáu financia con 1,8 millones d’euros los actos conmemorativos del aniversariu de la Fundación ‘Príncipe’, que llevarán por lema xeneral “Asturies, capital cultural del mundu: 25 aniversariu de los Premios ‘Príncipe de Asturias’. Ochobre 2005-Ochobre 2006.”

Al actu formal de la firma l’alcuerdu asistieron amás el director xeneral de Promoción Cultural, Carlos Madera, y el director de la Fundación ‘Príncipe’, Graciano García.

La llingua asturiana nun participa nel Fórum de les Cultures Barcelona 2004, o a lo menos permanez bien escondida. Visitantes al macroespaciu allugáu na Ciudá Condal denuncien l’ausencia del asturianu n’eventos significativos del Fórum, empezando pola esposición ‘Voces’, que reivindica la diversidá llingüística’l planeta al traviés d’un recorríu por dellos de los 5.000 idiomes que se falen nel mundu.

De fechu, la llingua asturiana nun apaez nin nel catálogu de l’amuesa, nin nel so cd de presentación, qu’inclúi 62 ficheros d’audio d’otres tantos idiomes, ente ellos l’araucanu, l’armeniu, el cingalés, el guaraní, el malayu, el swahili, el vietnamí y les cuatro llingües oficiales del Estáu español (castellán, catalán, gallegu y euskera).

Los organizadores del Fórum presentaron en febreru pasáu la esposición ‘Voces’ -abierta del 9 de mayu al 26 de setiembre nel recintu’l festival multicultural- como “una apuesta a favor de la conocencia llingüística del mundu” asitiada nun gran espaciu con capacidá p’acoyer a milenta persones al mesmu tiempu.

La falta de presencia de la llingua asturiana nel macroeventu de Barcelona vien a confirmar el barruntu asoleyáu 24 hores antes de l’apertura del Fórum pol director de la Oficina de Política Llingüística del Principáu, Ramón D’Andrés, quien aseguró que, a lo menos dende’l Gobiernu autonómicu, nun se xestionara la presencia de la llingua asturiana nel eventu catalán por problemes de plazos y de planificación.

Magar de too ello, el director xeneral de Turismu de Barcelona, Pere Durán, que visitó Uviéu na viéspora de l’apertura del Fórum al públicu, garantizó entós la inclusión del asturianu na bayura d’idiomes que l’eventu reivindica al entender cada perda d’una llingua como la desapaición dafechu d’una forma singular d’interpretar la vida y, poro, d’un ricu elementu de diversidá.

Ficha de la esposición ‘Voces’ na web del Fórum

Meyorar la implicación de los ayuntamientos na defensa de la llingua asturiana, con independencia de que los sucesivos Gobiernos del Principáu dean o non perres pa esi conceptu. Esi ye, según Rafael Palacios, voceru’l Bloque por Asturies y representante d’esa formación nel Executivu asturianu, el tresfondu de la marcha atrás nos convenios previstos pa crear nueves oficines municipales de normalización, que van sustituyise por subvenciones p’actividaes concretes.

Nesi sen, Palacios precisa que “quiciaes hebio malentendíos nun diálogu de sordos” y asegura que la midida persigue que les Alministraciones llocales “también se mueyen” na promoción de la llingua asturiana, a partir d’un emburrión dau dende’l Gobiernu pero en nengún casu a remolque esclusivu d’esi apoyu autonómicu.

Nel fondu, sostién el voceru y representante’l Bloque por Asturies nel Executivu de coalición PSOE-Izquierda Xunida-BA, trátase de númberos. Onde’l director xeneral de Pomoción Cultural y Política Llingüística, Carlos Madera, ve “razones d’encaxe alministrativu”, Palacios acollumbra una “cuestión económica” que deriva precisamente no alministrativo: El Principáu quier evitar que la normalización del asturianu nel ámbitu llocal funcione a güelpe esclusivu d’inyección económica de Cultura.

Dicho d’otru mou, que los ayuntamientos lleven la voz cantante nel procesu y mantengan les sos respectives oficines de la llingua “anque depués de nosotros lleguen otros que nun se preocupen pol asturianu”, según el voceru’l Bloque y director de l’Axencia Asturiana de Cooperación pal Desarrollu.

Cultura paraliza los convenios pa crear servicios de normalización nos conceyos

Imperfectu dafechu pero absolutamente necesariu. Asina califica Ramón D’Andrés el llabor realizáu pola Oficina de Política Llingüística del Principáu, de la que ye director, nos sos primeros seis meses de vida, que se cumplieron ayeri. Nesti semestre, entiende D’Andrés, echáronse a andar midíes “embrionaries” qu’apunten per ónde pue dir el camín de la normalización a tolos efectos de la llingua asturiana.

Ente elles, el titular de la xoven Oficina de Política Llingüística -organismu ensertáu na Conseyería de Cultura, Comunicación Social y Turismu- destaca la puesta en marcha de la Xunta de Toponimia, constituyida’l pasáu 18 de mayu y que yá recibió peticiones d’once conceyos pa recuperar los sos nomes tradicionales de llugar; el tratamientu específicu del gallego-asturianu; y les acciones n’educación, con una campaña específica p’alitar la matriculación n’asignatura de Llingua.

Na llista d’actuaciones que D’Andrés cita como primeros ‘deberes’ enveredaos pola Oficina que dirixe dende’l 13 de xineru tamién figura la Rede de Normalización nos Conceyos, qu’ensin embargu atraviesa un momentu d’indefinición al cambiar Cultura los convenios previstos pa la creación de nuevos servicios llocales de normalización por subvenciones nominales pa sufragar sólo actividaes, y non gastos de personal.

Nesti sen, ya inda declarándose incómodu por esa modificación que retrasará l’apaición de nueves oficines municipales de la llingua, el director de la Oficina de Política Llingüística sostién que nesti primer semestre de llabor nunca nun recibió directrices nin “restricciones” de les dos másimes autoridaes de Cultura: la propia conseyera, Ana Rosa Migoya, y el tamién socialista Carlos Madera, director xeneral de Promoción Cultural y Política Llingüística.

Dambos amuesen, según afirma D’Andrés, una actitú “bastante respetuosa y comprensible” pa col asturianu, y supervisen una Oficina “absolutamente necesaria; tanto, que si nun esistiera, repetiríase la esperiencia de la llexislatura anterior”.

En consonancia con esi argumentu, la valoración que’l director de la Oficina de Política Llingüística fai del llabor fechu por esi organismu nel so primer mediu añu d’esistencia pasa pol pragmatismu: “El camín ye difícil y nun se puen facer milagros”, evalúa Ramón D’Andrés, “y el llabor d’esta oficina ye necesariamente imperfectu porque’l marcu d’actuación nel que nos movemos nun ye’l más ampliu: La oficialidá garantizaría una acción más eficaz”.

El cantautor norteamericanu Bob Dylan, el guitarrista flamencu Paco de Lucía y el bailarín francés Maurice Béjart afítense como firmes candidatos p’algamar el Premiu ‘Príncipe de Asturias’ de les Artes, que se falla mañana. El xuráu analiza dende primer hora de güei una llista de 50 candidatos ente los que tamién figuren Bruce Springsteen, Chavela Vargas y Pedro Almodóvar.

El galardón correspondiente a les Artes pesllará mañana la primer fase de concesión de los galardones na so XXIV edición, que se completará depués de les vacaciones de veranu colos fallos de los premios de Concordia y Deportes. A él concurren nesta ocasión aspirantes d’Arxentina, Cuba, Dinamarca, España, Estaos Xuníos, Francia, Italia, Xapón, México, Perú, Portugal, República Checa, Rumanía, Rusia, Suecia, Suiza, Turquía y Venezuela. El premiu ta dotáu con 50.000 euros, amás d’una escultura orixinal de Joan Miró y un diploma ya insignia acreditativos.

Pa decidir a quién va parar el galardón, un total de venticuatro personalidaes rellacionaes cola creación y la comunicación entamaron yá nel hotel Reconquista un alderique que va prollongase tola xornada y nel que participen, ente otros, el director de cine José Luis Garci; el director del programa radiofónicu ‘Clásicos populares’, Fernando Argenta; el musicólogu Emilio Sagi; y los periodistes Juan Cruz, Jordi García Candau y Juan Ramón Pérez Las Clotas.

El Premiu ‘Príncipe de Asturias’ de les Artes, que l’añu pasáu recayó nel creador plásticu Miquel Barceló y ta concebíu pa distinguir el llabor de persones o collectivos destacaos na arquitectura, cinematografía, dancia, escultura, música, pintura y demás espreciones artístiques, ye’l sestu de los ocho galardones que concede la Fundación ‘Príncipe’.

Nel palmarés de premiaos en 2004 yá figuren l’escritor Claudio Magris (Lletres), l’economista Paul Krugman (Ciencies Sociales), el periodista Jean Daniel (Comunicación ya Humanidaes), el Programa ‘Erasmus’ (Cooperación Internacional) y un equipu plurinacional de cinco oncólogos (Investigación Científica).

La cultura ye siete décimes más cara n’Asturies que nel mes de mayu, anque mercar productos y servicios culturales cuesta agora nel Principáu un 1,3 por cientu menos qu’a primeros de 2004. Según los datos asoleyaos esta mañana pol Institutu Nacional d’Estadística (INE), la cultura foi la estaya -xunta les bebíes alcohóliques y el tabacu- onde más medraron los precios en xunu, rompiendo la tendencia a la baxa que se rexistraba dende l’empiezu del añu.

La esplicación a talu traballingües pasa per tres cifres concretes: Nel primer semestre de 2004, los precios de los productos d’ociu y cultura reveláronse como los que más baxaron -un 1,3 por cientu- y frenaron la subida xeneral de tarifes, que foi de dos puntos. Esi papel de frenu cumpliólu tamién la cultura na evolución interañal de los precios -variación de los últimos doce meses-, yá que les tarifes nel sector son agora un 0,8 por cientu más barates qu’hai un añu, pero nel mes de xunu desanicióse esa tendencia y rexistróse un aumentu de siete puntos.

L’Institutu d’Estadística espublizó güei l’Índiz de Precios de Consumu (IPC) correspondiente a xunu pasáu, que se traduz nuna inflación acumulada -perda progresiva del valor del dineru no que va d’añu, manifestada nel aumentu de los precios- d’un 2 por cientu.

No que cinca al índiz d’inflación interañal, que mide la evolución de los precios dende xunu de 2003, les perres de los asturianos valen agora un 3,3 por cientu menos a afectos de consumu qu’al empiezu del veranu pasáu.

Datos completos na web del INE

Once conceyos de setenta y ocho. La Xunta Asesora de Toponimia del Principáu ta acabante recibir les solicitúes de los ayuntamientos de Mieres y Casu pa recuperar los sos nomes de llugar tradicionales n’asturianu, un requerimientu que yá cursaron otros nueve municipios nos alpenes dos meses que lleva en funcionamientu l’organismu asesor.

D’esti mou, los integrantes de la Xunta ven medrar los sos ‘deberes’ veraniegos, qu’hasta agora incluyíen la revisión de los espedientes toponímicos de Llanes, Llangréu, L.lena, Castrillón, Ayer y Siero.

L’organismu, al que-y correspuende afitar los nomes de llugar correctos enantes d’elevar los sos dictames al Conseyu de Gobiernu pa qu’ésti fixe la toponimia oficial por decretu, yá despachó les dos primeres consultes, cursaes por Carreño y El Franco, y prevé cellebrar la so prósima xuntanza, el 23 d’agostu, na llocalidá de Llanes col envís d’iguar ‘in situ’ los nomes de llugar del conceyu.

La Xunta Asesora de Toponimia del Principáu d’Asturies quedó constituyida el pasáu 18 de mayu col triple envís de validar, normalizar y potenciar l’usu de los nomes de llugar tradicionales d’Asturies, y apóyase pal so llabor ordinariu nel nomenclátor ellaboráu pola Academia de la Llingua Asturiana, que contién más de 15.000 topónimos.

El Gobiernu’l Principáu pon enriba’l papel la planificación de la política llingüística hasta’l fin d’esti mandatu autonómicu, en 2007. El borrador final del documentu qu’organiza y concreta nel tiempu toles actuaciones que l’Executivu ha tomar pa promocionar l’asturianu nos prósimos tres años, el Plan de Normalización Sociollingüística, ta yá sobro la mesa de trabayu de la conseyera de Cultura, Comunicación Social y Turismu, Ana Rosa Migoya.

Hasta agora, los sucesivos testos del documentu nun salieren del despachu del director de la Oficina de Política Llingüística, Ramón D’Andrés, que trabayaba nun borrador nel que se contemplen, ente otres midíes, la publicación billingüe de gran parte’l Boletín Oficial del Principáu (BOPA) y la plena validez del asturianu nes comunicaciones, na enseñanza, na relixón y nel deporte. Sendes copies de la versión final d’esi borrador tán, dende la selmana pasada, en manes de la titular de Cultura y del director xeneral de Política Llingüística, Carlos Madera.

Según el badagüeyu d’esti últimu, la recepción del testu abre agora un procesu de revisión que prevé llargu y nel que mui probablemente se modifique parte de los términos orixinales en sucesives redacciones que tamién sedrán borradores, pero nos que yá intervendrá directamente el ‘llapiceru’ iguador del Gobiernu.

No que cinca a los plazos, Madera albidra que’l Plan de Normalización -ún de los compromisos firmaos por PSOE ya Izquierda Xunida-Bloque por Asturies nel pactu pa gobernar en coalición el Principáu- podrá tar llistu pa entrar en vigor a partir de setiembre prósimu, depués del ‘parón’ de les vacaciones de veranu. De momentu, la Oficina de Política Llingüística entregó’l documentu dientro’l plazu previstu, que falaba de finales del mes de xunu o primeros de xunetu.

Plazos estremaos

Como yá informó Asturnews na so edición del pasáu 18 de xunu, ente les actuaciones más inmediates del plan tán la recuperación de los topónimos tradicionales y l’usu normal del asturianu nos conceyos, pesie a que la reciente decisión de Cultura de camudar ‘a la baxa’ los convenios previstos pa echar a andar nuevos servicios municipales de normalización cambia l’escenariu previstu nel ámbitu llocal.

Más tiempu llevará algamar la retulación billingüe de toles dependencies del Principáu y l’usu xeneralizáu del asturianu na imaxe corporativa del Gobiernu autonómicu, asina como la publicación en llingua asturiana de “gran parte” del BOPA. Too ello deberá ser una realidá palpable, según la propuesta del documentu, en tornu a 2007.

A lo llargo de 64 páxines cuyu primer borrador taba yá llistu nel mes de marzu, pónense plazos mui precisos a les actuaciones pa normalizar l’usu del asturianu en toles estayes, con menciones específiques a la relixón, el deporte, la enseñanza y la futura radiotelevisión autonómica asturiana, cuyes primeres emisiones regulares tán previstes pa mediaos de 2005 y a la que’l Plan de Normalización dedíca-y un capítulu espresu. Anque nun se fala espresamente d’oficialidá, el documentu plantega una coficialidá ‘de fechu’ a base de llevar a la práctica toles midíes pormenorizaes nel testu.