Sociedá

L’Academia de la Llingua Asturiana va facer públiques les sos esmoliciones y propuestes énte la inminente reforma estatutaria nun actu que va celebrase n’Uviéu a les 20,00 hores nel Club Prensa Asturiana de ‘La Nueva España’. La conclusión más resaltable del informe ye la necesidá irrefugable d’inxerir la oficialidá del asturianu como única fórmula llegal que puede valir p’asegurar la normalización social y el futuru del idioma

La másima institución llingüística asturiana ya adelantrara la so posición ente la revisión del marcu autonómicu nun comunicáu emitíu el pasáu día 22 nel que se denunciaba la precariedá de la enseñanza del asturianu n’Educación Secundaria. Nél dábase por supuesta la necesidá d’incluir la declaración d’oficialidá pa la llingua y aludíase al tratamientu qu’habría tener nel Estatutu reformáu y “nes lleis qu’habríen desendolcar ésti”.

El plan de normalización llingüistica p’Asturies va tar completáu pa enantes de qu’acabe’l presente añu. El presidente del Principáu Vicente Álvarez Areces aprovechó’l so discursu nel debate sobro l’estáu de la comunidá pa comprometese públicamente a entaínar un de los puntos claves del alcuerdu de gobiernu robláu ente PSOE, Izquierda Xunida y Bloque por Asturies. Nel capítulu destináu a la política cultural y de comunicación del executivu Areces refirióse a la puesta en marcha de la Xunta de Toponimia y a la presencia del asturianu na enseñanza

Nun discursu nel que se tentaba resumir el llabor desenvueltu pol gobiernu autonómicu y adelantrar los proyectos más inmediatos, el presidente del Principáu remembró los pasos daos hasta agora en materia de política llingüística cola creación d’una Dirección Xeneral y d’una Oficina dependiente d’ella. Aludió darréu a l’empiezu de los trabayos de la Xunta de Toponimia cola inminente tramitación de 13 espedientes d’otros tantos conceyos.

Pa rematar Areces remembró que “la presencia efectiva de la llingua asturioana y, nel so territoriu, del gallegu-asturianu, ye un fechu que tien el so reflexu nos distintos niveles educativos: impártese nun 86% de centros de Primaria y nun 81% de los de Secundaria, con un aumentu bultable n’alumnos matriculaos, el tripe de fai dos años”.

Espertos en planificación llingüística de Cataluña, Galicia, País Vascu, Valencia y Aragon van xuntase en Xixón ente los díes del 15 al 17 de payares nunes xornaes entamaes pola Oficina Municipal de la Llingua alrodiu de la normalización social nel marcu xeneral de los conceyos. Ye la primer vez que n’Asturies el departamentu d’una administración pública organiza un alcuentru pa tratar les polítiques actives de promoción de la llingua asturiana.

El programa de les xornaes inclúi meses redondes, conferencies y debates alrodiu d’asuntos como la esperiencia normalizadora n’otres comunidaes con llingua propia, asina como la promoción llingüística nel marcu administrativu de los conceyos asturianos al través de la rede d’oficines municipales. Otru de los asuntos que van tratase nestes xornaes xira alrodiu de normalización y ciudadanía.

Coles xornaes de payares la Oficina de la Llingua de Xixón afonda nel so llabor, completáu con otres iniciatives puestes en marcha como la redacción del borrador d’unes ordenances muncipales relatives a la presencia de la llingua asturiana na administración del conceyu, del que ya disponen tolos grupos con representación nel Ayuntamientu pa la so posterior aprebación. Dientro l’afayamientu de la oficina como serviciu ciudadanu aína va procedese a la contratación d’un ausiliar administrativu con conocencia d’asturianu.

La Oficina presenta güei la so Axenda Escolar destinada a alumnos de llingua asturiana d’Enseñanza Secundaria. En total van repartise más de seiscientes axendes ente otros tantos escolinos de los centros educativos del conceyu. L’axenda ta ellaborada como recordanza de los díes internacionales que se celebren en tol mundu pa sensibilizar a la población respective a temes como’l mediu ambiente, la solidaridá o el reblagu de prexuicios discriminatorios.

El ministeriu d’Esteriores y de Cooperación del gobiernu español empobinó una carta oficial el 21 de setiembre al conseyeru de Xusticia, Seguridá Pública y Esteriores del Gobiernu del Principáu, Francisco Javier García Valledor, na que se respuende a la solicitú fecha pol conseyeru encamentando la difusión del asturianu nel ámbitu comunitariu. La carta, firmada pol secretariu d’Estáu pa la Unión Europea, Alberto Navarro, amuesa el deséu del ministeriu de que la llingua asturiana sea oxetu ‘d’especial atención’ na Unión y refuga la posibilidá de considerala a tolos efectos como una llingua oficial.

El secretariu d’Estáu declara na carta tomar ‘mui bona nota’ de les esmoliciones del conseyeru asturianu y del so interés “por ser reconocía nel senu de la Unión Europea la diversidá cultural y llingüística d’España”. Nesi sen, Navarro remembra-y a Valledor la inclusión na parte del Acta Final del proyectu constitucional comunitariu d’una declaración na que se “confirma el compromisu de la Unión cola diversidá cultural d’Europa y la especial atención que se va siguir prestando a éstes y otres llingües”.

El representante del ministeriu qu’encabeza Miguel Angel Moratinos refuga darréu que l’asturianu vaya tener la mesma consideranza que les llingües oficiales del estáu: “ye obvio que nun se va poder facer una traducción oficial del Tratáu en llingua asturiana pal so depósitu na Secretaría Xeneral del Conseyu”. Les razones son el calter de llingua non oficial del asturianu, dao qu’esti derechu a facer una traducción con destín a la Secretaría del Conseyu “ta limitáu a les llingües que tienen estatutu oficial en tou o parte del territoriu d’un Estáu miembru)”.

Na parte final de la carta, el secretariu d’Estáu pa la Unión Europea caltién que les anteriores razones nun esclúin que la llingua del Principáu “sea oxetu de ‘especial atención’ por parte la Unión”. Esti tratamientu especial comprométese una vez que’l Tratáu constitucional lu ratifiquen tolos estaos miembros y entre en vigor”.

La difusión del conteníu de la carta d’Esteriores coincide coles últimes declaraciones del conseyeru Valledor, feches nel pielle de la Olimpiada de Deportes Autóctonos, na que se reafirmaba na so pitición y encamentaba a los sos socios de gobiernu un compromisu real cola llingua asturiana

Sacar perres, consultar el saldu o recargar una tarxeta telefónica emplegando la llingua asturiana. Representantes de l’asociación Oficialidá, qu’echó a andar en xunu pasáu col envís de defender l’asturianu na vida cotidiana, entaínen les sos negociaciones p’algamar qu’esa llingua tea presente por primer vegada nos caxeros automáticos. El 18 d’ochobre, miembros d’Oficialidá aconceyarán con altos cargos del Grupu Sabadell, propietariu’l Bancu Herrero.

Esa ye la cita más inmediata que tienen n’axenda los cabezaleros de l’asociación ciudadana, cuyu equipu xestor provisional ta integráu por José Suárez Arias-Cachero, José Rogelio Álvarez Hevia, Xosé Nel Friera, Miguel Ángel Lago, Enrique José González y Chus Pedro Suárez.

Na reunión, que se cellebrará en Madrid y na que los responsables del collectivu Oficialidá entrevistaránse con miembros del gabinete de la presidencia’l Grupu Sabadell, los miembros de l’asociación asturiana esperen persuadir a los sos interllocutores de les ventaxes d’introducir l’asturianu na rede de caxeros del grupu bancariu, un pasu que sedría pioneru ya incluyiría la llingua asturiana na llista d’opciones llingüístiques que yá ufren terminales de tol Estáu.

Na negociación, los cabezaleros d’Oficialidá enfótense nel raigañu asturianu del Bancu Herrero -‘punta de llanza’ del Grupu Sabadell nel Principáu- y na sensibilidá catalanista de los dirixentes de la entidá bancaria, dos pegollos nos que los miembros de l’asociación esperen acabar cola ausencia de la llingua asturiana nes operaciones automátiques de banca.

Presentada’l pasáu 16 de xunu n’Uviéu cola intención de subsistir namás coles cuotes de los sos socios, Oficialidá presentó yá entós la campaña ‘Si presumes d’asturianu, ponlo tamién n’asturianu’, centrada en reclama-y al Bancu Herrero l’usu d’esi idioma nes sos terminales automátiques d’atención al públicu.

Web de l’asociación Oficialidá

La Fundación Príncipe d’Asturies quier aprovechar la celebración del so vencicincu aniversariu pa entamar ún de los sos proyectos más ambiciosos, la construcción d’un espaciu museísticu propiu que recueya una amuesa del trabayu desenvueltu pola fundación dende la so esistencia. La intención de los responsables de la Fundación ye encamenta-y el llabor al arquitectu brasileñu Oscar Nieyemer, creador de la ciudá de Brasilia y ‘Premiu Príncipe d’Asturies de les Artes’

La información facilitábala el periódicu ‘La Nueva España’ na so edición d’ayer, citando fontes del patronatu de la Fundación Príncipe d’Asturies. Según estes mesmes fontes, la fecha de 2006, podía ser l’afayadiza pa entamar la primer fase del proyectu, coincidiendo colos últimos actos del venticincu aniversariu.

La escoyeta de Niemeyer como posible autor del diseñu del edificiu destináu a muséu de a Fundación paez firme ente los sos responsables. El creador de la ciudá de Brasilia xunta al so prestixu como ún de los arquitectos más importantes del mundu la so vinculación con Asturies al través del premiu ‘Príncipe de Asturias’ que se-y concedió na categoría de les Artes.

Respetu a la “llibertá cultural” de los ciudadanos, participación de los xóvenes na xestión de polítiques de mocedá y aumentu de viviendes protexíes. Con esi triple llamáu remataron güei en Xixón los XXII Alcuentros Internacionales de Cabueñes, nos que participaron 180 mozos y en cuyu pieslle quedaron emplazaos técnicos, pas y xóvenes a ellaborar n’andecha el Plan Integral de Mocedá del Principáu.

La convocatoria a esos collectivos fízola la directora del Institutu Asturianu de la Mocedá, Carmen Barrera, quien adelantó que’l Gobiernu autonómicu emplegará les conclusiones de los Alcuentros como testu de partida pa confeccionar el documentu qu’ha orientar les polítiques de mocedá del Principáu nos prósimos años.

Segundos antes de la intervención de Barrera na clausura’l foru de Cabueñes, el conceyal xixonés de Mocedá, Iván Álvarez Raja, anunciara n’idénticos términos la prósima fechura d’un Plan Integral pa Xixón con vigor ente 2005 y 2008, que l’edil espera empezar a ultimar con ocasión de la prósima Escuela de Seronda, una nueva xuntanza centrada na mocedá y prevista pa los meses finales d’esti añu.

Los participantes nos Alcuentros de Cabueñes remataron el so pasu per Xixón defendiendo l’amiestu de cultures como ferramienta pa edificar un mundu más xustu y la participación activa de los xóvenes na xestión de los planes que les Alministraciones tracen pa la mocedá.

Otres conclusiones de los Alcuentros, enunciaes tamién en forma de demanda, foron la “dignificación” de los conceyales de Mocedá, la inclusión de la formación pa la participación ciudadana como asignatura nel sistema públicu d’enseñanza, l’aumentu de la cuota de vivienda protexida ya midies eficaces pa evitar que milenta viviendes -3 millones en tol Estáu- permanezan vacies a la espera d’un porgüeyu salíu de la especulación inmobiliaria.

Na clausura del foru xixonés de mocedá énte los medios de comunicación participaron los coordinadores de los tres bloques d’alderique nos que s’articularon los Alcuentros: José Félix García Calleja (globalización), Vicente Inglada (emancipación y vivienda) y Joffre López (polítiques de mocedá).

L’Academia de la Llingua Asturiana emitió ayer un comunicáu nel que denuncia l’actitú de los responsables educativos del Principáu énte la situación na que s’alcuentra la escolarización del asturianu na Enseñanza Secundaria. La denuncia de l’Academia céntrase nel casu de l’alumna Catuxa Bermeyu nel IES ‘Monte Naranco’d’Uviéu y nella la másima institución llingüística d’Asturies manifiesta el so esmolecimientu por otros problemes como la falta de profesoráu nos centros

El comunicáu de l’Academia remembra el derechu constitucional a la igualdá y a la educación, asina como les disposiciones llegales calteníes na Llei d’Usu del Asturianu pa sofitar el drechu a recibir clases de llingua asturiana nel propiu centru d’admisión. La institución considera inadmisible cualquier otra posibilidá como la del cambiu de centru d’estos alumnos.

L’Academia señala otros problemes na escolarización del asturianu na Educación Secundaria por cuenta de la fala de profesoráu y alvierte de la falta de determín de l’administración educativa pa solucionar estos casos.

El comunicáu remata anunciando la intención de l’Academia de treslladar de manera oficial a les autoridaes educatives del Principáu la so esmolición por estos casos y la igua inmediata de los mesmos. La institución acaba reclamando la reconocencia d’oficilidá pal idioma asturianu como únicu arreglu posible pa evitar esta problemática socio-educativa.

Arturu Bermeyu asume una multa de 90 euros depués de reclama-y una cita a Riopedre na conseyería

De momentu, el silenciu. La carta que’l conseyeru de Xusticia, Seguridá Pública y Relaciones Esteriores, Francisco Javier García Valledor (Izquierda Xunida-Bloque por Asturies), empobinó hai una selmana al ministru d’Asuntos Esteriores pa reclama-y la oficialidá de la llingua asturiana n’Europa, y que foi censurada darréu pol PSOE, entá nun recibió rempuesta dala por escrito nin verbalmente.

Asina lo confirmaron esta tarde fontes de la Conseyería de Xusticia, organismu del que salió la comunicación el pasáu 16 de setiembre. El gabinete del conseyeru evita emitir un badagüeyu sobro si la carta tendrá o non rempuesta, pero alude a la pública discrepancia que mantienen nel asuntu los tres partíos que gobiernen el Principáu -PSOE, Izquierda Xunida y Bloque por Asturies- como razón de pesu pa una probable persistencia del silenciu ministerial.

Lo mesmo opinen fontes consultaes nel entornu de la conseyera de Cultura y vocera’l Gobiernu autonómicu, la socialista Ana Rosa Migoya, pa quienes la desautorización del actu de Valledor por parte’l PSOE, partíu predominante nel Executivu asturianu, fai prever que la demanda plantegada pol conseyeru d’Izquierda Xunida-Bloque quedará pa prau.

Poco depués que Valledor asoleyara la so misiva al titular d’Asuntos Esteriores, Miguel Ángel Moratinos, carta que’l conseyeru de Xusticia entiende “dientro de les sos competencies” y na que pide la reconocencia europea del asturianu como una cuestión de drechos fundamentales, Migoya desmarcóse del unvíu precisando que l’asuntu nun se trató en Conseyu de Gobiernu y, amás, los términos qu’emplega Valledor “nun s’axusten a la realidá del Estatutu d’Autonomía”.

Nuna comparecencia na qu’amosó a les clares la so disconformidá cola iniciativa de García Valledor, la conseyera de Cultura insistió en que’l llabor del Gobiernu’l Principáu ye “informar” al ministru del marcu estatutariu d’Asturies, y non empobina-y comunicaciones que, como la del conseyeru de Xusticia, n’opinión de Migoya, puen conducir a “error”.

La defensa del asturianu provoca’l segundu desalcuentru en diez díes de los socios de Gobiernu

Más y meyor deporte. La tertulia cultural El Garrapiellu cellebrará’l prósimu fin de selmana nel recintu’l Pueblu d’Asturies, en Xixón, la so VIII Olimpiada de xuegos y deportes tradicionales, una edición que permite alquirir pa la ciudá una bolera pública de batiente y que rescata como federáu el bolu rodáu, la única modalidá na que compiten muyeres.

Asina, l’apuesta d’El Garrapiellu polos bolos tradicionales asturianos traduciráse na recuperación d’un recintu de xuegu pa la especialidá de batiente depués qu’una reforma’l Pueblu d’Asturies dexara al muséu ensin esa instalación: El Patronatu Deportivu Municipal comprará una bolera desmontable que la entidá cultural xixonesa llocalizó y prevé allugala como cancha de xuegu de calter permanente.

Con esa alquisición, al Muséu Etnográficu del Pueblu d’Asturies faltará-y namás una instalación de la modalidá de bolu palma pa contar con recintos de xuegu específicos pa les cuatro grandes especialidaes de bolos asturianos: celta, cuatriada, rodáu y palma.

Ente les novedaes previstes na octava edición de les olimpiaes entamaes por El Garrapiellu figuren amás la inclusión por primer vegada de la patefa de Meredo, llocalidá d’A Veiga d’Eo dende la que se desplazarán a Xixón cinco xugadores d’esi deporte casi desapaecíu; y un nuevu intentu de superar el ‘record Guiness’ de tiru con gomeru.