Sociedá

La Xunta pola Defensa de la Llingua Asturiana y l’asociación cultural Xeira nun van tar nes xornaes que la prósima selmana se celebren en Ribadeo organizaes pola Universidá de Vigo pa debatir de la normalización llingüística en Galicia y n’Asturies. Les discrepancies y el refugue a les últimes iniciatives provenientes de la comunidá vecina pa la tierra de Navia-Eo paecen tar nel orixe d’estes ausencies nun alcuentru que fue duramente criticáu va unos díes pola Academia de la Llingua.

Nel programa de les xornaes, nomaes I Escola Permanente Fermín Penzol, taba anunciada la presencia pal sábadu 29 d’ochobre del filólogu y miembru de la Xunta pol Defensa de la Llingua, Fernando Balbuena al llau de Carlón Callón de la Mesa Pola Normalización Lingüística de Galicia pa debatir alrodiu de “As normalizacións pendentes en Galiza e Asturias”. Pal mesmu día taba programáu el debate “Estandarización e normalización das falas do Eo-Navia” nel que diba participar l’asturianu Xosé Miguel Suárez, miembru de l’asociación Xeira, al llau de Carlos Varela, presidente d’Abertal y representante de l’Academia Galega na tierra de Navia-Eo. A la fin, según pudo saber esti mediu, nin Balbuena nin Suárez van tar presentes.

La representación asturiana nes xornaes de Ribadeo queda asina reducida a la participación del escritor Xuan Bello, el profesor de la Universidá d’Uviéu, Xulio Viejo y el responsable de la Oficina de Política Llingüística del Principáu, Ramón d’Andrés. Bello va abrir les xornaes con una conferencia titulada “Historia de dos hermanes y un llobu”, presentáu pol caderalgu de la Universidá de Santiago Francisco Fernández Rei. El profesor Viejo falará de la situación del asturianu na Universidá d’Uviéu y el xefe de la Oficina de Política Llingüística va tratar de les virtúes y deficiencies del actual Plan de Normalización Social de la Llingua Asturiana.

Les xornaes de la I Escola Permanente Fermín Penzol van celebrase del 28 al 30 d’ochobre nel Auditoriu Municipal de Ribadeo y tan organizaes pola Vicerrectoría de Relaciones Esteriores de la Universidá de Vigo y col sofitu del conceyu agospiador.

El director de l’Axencia Asturiana de Cooperación y portavoz nacional del Bloque por Asturies Rafael Palacios pronúnciase nun comunicáu unviáu a los medios informativos sobre la polémica remanecida nes últimes selmanes alrodiu de la realidá llingüística del Navia-Eo. Palacios pide un esfuerzu conxuntu en defensa del gallegu-asturianu per parte de toles instituciones del Principáu “especialmente la Oficina de Política Llingüística y la Academia de la Llingua Asturiana”.

El responsable de Cooperación de la Conseyería de Xusticia y Esteriores ye, después de que lo ficiera’l presidente Areces, un de los pocos miembros del executivu autonómicu que se pronuncia sobre’l casu de la fala d’Entrambasaguas y les pretensiones nesa zona del gobiernu de Galicia o les conteníes na iniciativa parlamentaria d’Esquerra Republicana de Catalunya (ERC) sobre llingües del estáu.

Respective a les inxerencies esternes nel Navia-Eo, Rafael Palacios afirma que “el Gobiernu de Galicia nun tien nenguna atribución pa tomar iniciatives qu’ afecten a los Conceyos del Eo-Navia y a la so lengua, y menos tovía sin contar n’asoluto coles instituciones asturianes y col Gobiernu d’ Asturies”. Nesi sen manifiesta que “nun se pueden tolerar los intentos d’inxerencia del Gobiernu de Galicia o d’Ezquerra Republicana de Catalunya (ERC) nos asuntos llingüísticos, culturales o políticos que competen a Asturies y a les sos instituciones, y condénolos con toa enerxía”.

Nel escritu remitíu a los medios Palacios diz que “dende’l nivel de responsabilidá que tengo nel Gobiernu d’Asturies voi trabayar pa que les instituciones asturianes se fagan valer, tanto nes sos declaraciones públiques como nes iniciatives de defensa de la personalidá llingüística, cultural y política del gallego-asturiano o fala y de los asturianos y asturianes de los Conceyos del Eo-Navia”.

El director xeneral de Cooperación reafirma nel so comunicáu “indudable e incuestionable asturianidad cultural y política” de les fasteres d’Entrambasaguas y recalca que la competencia de la política llingüística nesos conceyos “tienla n’esclusiva el Gobiernu d’Asturies”. Palacios remata’l so comunicáu con un encamientu na defensa del gallego-asturiano, qu’al so xuiciu “necesita del esfuerzu conxuntu de los movimientos sociales, del Gobiernu d’Asturies y de les instituciones asturianes competentes na materia, especialmente la Oficina de Política Llingüística y l’Academia de la Llingua”.

El Conseyu de Gobiernu del Principáu aprebó esta mañana na so reunión avezada de los xueves el proyectu de presupuestos autonómicos presentáu pol conseyeru d’Economía Jaime Rabanal. Los miembros d’Izquierda Xunida nel executivu valoraron positivamente l’aumentu del gastu social nes cuentes pa 2006.

El responsable económicu del gobiernu asturianu presentó esta mañana’l so proyectu presupuestariu con un sesenta y cinco por cientu de la so cuantía dedicada a gastos sociales. L’aumentu nesti capítulu, especialmente en materia d’empléu y vievienda yera una de les desixencies de los socios de coalición d’IX-BA, que valoren positivamente sti incrementu, aseguró’l conseyeru Rabanal.

La puesta en marcha del Ente Públicu de Comunicación contémplaee nes nueves cuentes: diecisiete millones d’euros, dos millones más de los previstos por mor, según el conseyeru de la carga del IVA.

La III Selmana de Cultura Astur de Candás inclúi na so edición d’esti añu la celebración d’una Feria del Llibru y del Discu n’Asturianu, amás de numberoses actividaes relacionaes cola realidá cultural del nuestru país.

La villa carreñesa va acoyer dende’l prósimu llunes 24 d’ochobre y hasta’l prósimu 4 de payares diversos actos entamaos nel marcu d’estes xornaes organizaes pol grupu de Baile San Félix y l’Ensame Xuvenil Trisquel, y na que colaboren otros colectivos ya instituciones como la Xunta pola Defensa de la Llingua Asturiana, la Mancomunidá del Cabu Peñes y l’asociación Enredar Carreño.

El llunes 24 inaugúrase na Casa de Cultura de Candás la esposiciòn “Asturies n’otra dómina” y esa mesma nueche va celebrase un conciertu de música tradicional. El 4 de payares escomienza nel Parque les Conserveres de la villa carreñesa una Feria del Llibru y del Discu Asturianu y al día siguiente, nel mesmu sitiu, celebraráse un amagüestu popular. Na nueche del sábadu 5 nel Parque les Conserveres va entamaee un conciertu con Gueta na Fonte, La Bandina’l Tombo y Skama la Rede. Meses redondes, alderiques, talleres de bailes y xuegos tradicionales componen el programa que va desenvolver esta III Selmana de Cultura Astur.

La conceyalía de Cultura del Ayuntamientu de Cangas organiza por quintu añu consecutivu los sos cursos de llingua asturiana y que nesta edición van cuntar con dos niveles: ún d’iniciación y otru d’afondamientu. El plazu de matriculación ta abiertu hasta’l prósimu 28 d’ochobre.

Los interesaos nos cursos habrán dir a la Oficina d’Información Xuvenil de Cangas pa formalizar la matricula eos niveles d’iniciación o perfeccionamientu. Como cada añu, les clases, de sesenta hores cada módulo, van desarrollase a partir del mes de payares n’ horariu de tarde a convenir polos interesaos.

Con esta ya son cinco les ediciones convocaes d’unos cursos a los que l’añu pasáu acudieron cerca de mediu cientu de persones.

El presidente del gobiernu asturianu Vicente Álvarez Areces declaró esti martes 18 en A Veiga que la polémica remanecida énte los últimos intentos de galleguización de la fastera de Navia-Eo ye “artificial” y que se trata de “un conflictu inesistente que nun afecta al conxuntu de la población, porque n’Asturies hai una idea de convivencia amplia cola comunidad vecina”.

Areces fexo estes declaraciones nel cursu d’una visita pelos conceyos de Os Ozcos, El Franco y A Veiga. El presidente del Principáu dixo que “la fala y el gallego tienen mirar al futuru y crear convivencia, ensin necesidá de nengún conflictu”, porque según aseguró “n’Asturies tol mundu reconoz la fala y en Galicia tán arguyosos d’un idioma guapísimu», añadió.

Mientres Álvarez Areces facía estes declaraciones los galleguistes de l’asociación Abertal, afirmaben na sección comarcal que xestionen nel diariu dixital Vieiros.com Galicia Hoxe que los pronunciamientos de conceyos de Navia-Eo gobernaos pol PP contra la galleguización d’esta fastera busquen truñar contra’l PSOE, ERC , y contra Galicia: “la estratexa tá más que clara, truñar contra Galiza, ERC y de pasu contra’l PSOE asturianu pol apoio de ERC a nivel estatal, cuando el PP lo único que defende ye la imposición de la llingua española y declarase contrariu a la oficialidá del asturianu y del gallegu d’Asturies.

L’asociación Abertal, de la ye cabezaleru el representante de l’Academia Galega en Navia-Eo Carlos Varela afirma nel mencionáu disriu dixital que “resulta indesplicable qu’un partíu como’l PP que nunca fizo nada pol gallego d’Asturies agora s’amuese’l so defensor xunto cola idea interesada y terxiversada de l’asturianía defendida por grupos minoritarios radicales como Andecha Astur o la defenestrada Academia de la Llingua Asturiana”. Pa los galleguistes d’Abertal declaraciones institucionales como la fecha pol conceyu de Santiso d’Abres contra los intentos d’esparder l’idioma de la comunidá vecina son frutu de l’actitú personal de los dirixentes políticos: “son surrealistes les desplicaciois de l’alcaldesa de Santiso, maestra en Lugo, y qu’arrastre tamién a otros grupos como’l PSOE”, afirmen los galleguistes del Navia-Eo pa los que “esta situación sería impensable col antigu alcalde (de Santiso) Jesús Ferreiro o con dirixentes del PP como Rozada”.

Santiso d’Abres y Cuaña fueron los primeros conceyos d’Entrambasaguas en pronunciase institucionalmente contra la galleguización del estremu occidente. Nos prósimos díes otros conceyos de la zona podíen siguir los mesmos pasos.

El PP asturiano contra el galego de Asturias

La responsable de Cultura del Ayuntamientu de Mieres, Diana González, anunció esta selmana l’aprebación na última xunta local de de la contratación d’una plaza empobinada a poner en marchar un serviciu de normalización llingüística. El conceyu del Caudal súmase asina a los integrantes de la rede d’oficines municipales de promoción del asturianu.

El futuru serviciu de normalización de Mieres xúntase a los ya esistentes en Llangréu, Xixón, Siero, Avilés, Comarca de la Sidra, Mancomunidá de Peñes y Cangas del Narcea nel mesmu llabor de convertir el nuestru idioma en vehículu corriente de comunicación nel ámbitu local.

L’Ayuntamientu mierense va contratar temporalmente a una persona pa entamar la so oficina de la llingua “hasta fin d’añu”, según anunció la conceyal de Cultura y l’enfotu del consistoriu ye da-y continuidá a esta plaza en 2006 pa en delantre.

La presidencia colexada d’Izquierda Xunida d’Asturies aconceyada esti martes 18 n’Uviéu aprebó una resolución de sofitu al proyectu de presupuestos autonómicos elaboráu pol gobiernu del Principáu nel que la coalición participa como sociu minoritariu.

L’apoyu espresáu por IX ta condicionáu a que l’executivu de Vicente Álvarez Areces especifique y concrete’l conteníu del anunciáu Plan d’Empléu pa la Mocedá y a a la elaboración d’una iniciativa de polítiques integrales pa les cuenques mineres. El cumplimientu en política social y de vivienda, asina como nel restu de les estayes autonómiques, son otros de los condicionantes puestos por Izquierda Xunida pa da-y el so respaldu a los presupuestos del gobiernu asturianu.

El resultáu de la votación d’esta resolución cuntó con ventiséis votos a favor, cuatro en contra y otres cuatro abstenciones. Los miembros de la presidencia colexada d’IX que nun dieron el so votu favorable argumentaron falta d’información y disconformidá col procedimientu siguíu pa preentar a discutiniu el proyectu presupuestariu.

Cuaña ye’l segundu conceyu de Navia-Eo -después de que lo ficiera Santiso d’Abres- que se pronuncia institucionalmente énte la candidatura a la UNESCO de Galicia y Portugal qu’inclúi territorios asturianos. El plenu municipal aprebó una moción del alcalde popular contraria al inxerimientu del conceyu dientro les fasteres de fala galaico-portuguesa que recueye la iniciativa pola declaración d’Obra Maestra del Patrimoniu Oral Inmaterial de la Humanidá.

La moción presentóla nel plenu l’alcalde de Cuaña, Salvador Méndez, del PP, y provocó un enfrentamientu ente’l grupu gobernante y el socialista. Los conceyales del PSOE nun dieron el so votu a la moción contra la inclusión del conceyu na candidatura luxo-galaica, argumentando que desconocíen el conteníu de la iniciativa énte la UNESCO. A la fin la moción salió alantre coles abstenciones de los ediles socialistes.

Cuaña conviértese asina nel primer conceyu d’Asturies que refuga los intentos espansionistes d’instituciones y grupos políticos de Galicia. En díes pasaos la formación nacionalista Andecha Astur presentara en tolos conceyos del Navia-Eo una iniciativa pa que los sos plenos decidieran oponese a ls so inclusión dientro los territorios de fala galaico-portuguesa. Santiso d’Abres debatió l’asuntu nun de los últimos plenos del Ayuntamientu y tamién refugó los intentos ‘espansionistes’ gallegos con unanimidá de tolos grupos municipales.

El vestíbulu del Auditoriu d’Uviéu acueye hasta’l prósimu 20 d’ochobre una esposición entamada pola Fundación Príncipe d’Asturies con recuerdos personales del pilotu Fernando Alonso. Ente los materiales enseñaos tán el coche col que’l campeón mundial de Fórmula 1 compitió la temporada pasada y oxetos como cascos de karts colos qu’empezó correr de guaje El Nano.

Na esposición, que después de tar n’Uvièu va poder visitase nel Palaciu Revillaxixéu de Xixón del 20 al 23 d’ochobre, amuésense monos vistíos pol pilotu carbayón nos equipos de Renault y Minardi, asina como volantes de los vehículos guiaos por Fernando Alonso na Fórmula Nissan y nos mundiales de karts.

Per otru llau, la Fundación Príncipe d’Asturies pon dende esti martes 18 nes taquielles del Auditoriu alrodiu de 2.000 entraes gratuítes p’asistir al coloquiu abiertu al públicu que Fernando Alonso va celebrar el prósimu sábadu 22 na sala central del coliséu uvieín. Les invitaciones van poder retirase n’horarios de 10.00 a 14.00 hores y de 16.00 a 20.00 nes taquielles del auditoriu.