Sociedá

La Fundación Caveda y Nava celebra esti sábadu 12 la so III Xornada nel monesteriu de Valdediós. La institución va acoyer como nuevos patronos a la presidenta del PP de Xixón Pilar Fernández Pardo y al alcalde de L.lena y presidente de la Federación Asturiana de Conceyos Hugo Morán. Nel actu va presentase l’informe “El marcu llegal pal asturianau: víes de reconocimientu efectivu” del xurista José Manuel Pérez.

L’acoyimientu de los nuevos patronos de la Fundación va entamar a les 18.00 hores nel monesteriu de Valdediós y como introductores de la presidenta del PP xixonés y del alcalde de L.lena van actuar l’ex presidente del Real Uviéu, Manuel Lafuente y el diputáu socialista Faustino Álvarez, respectivamente. Darréu del acoyimientu los miembros de la Fundación van treslladase hasta La Villa onde van rendir homenaxe a Xosé Caveda y Nava énte la so casa natal na cai del Agua.

Nel informe xurídicu del que ye autor José Manuel Pérez analícense les diverses posibilidaes llegales de desenvolver la oficialidá y la so aplicación al casu asturianu. Pérez ye profesor titular de Derechu Administrativu na Universidá d’Uviéu y nel so estudiu sobre la realidá llingüística de la nuestra comunidá defende que nel Estatutu se reconoza l’asturianu y el gallegu asturianu como llingües propies del Principáu y oficiales xunto col castellanu.

Izquierda Xunida d’Asturies tien mieu que si prospera un pautu ente PSOE y PP p’alcordar la reforma estatutaria el nuevu testu sea namás un “estatutu fotocopiáu” de los d’otres comunidaes. El conseyu políticu de la coalición pide nun documentu entaínar el debate sobre’l nuevu estatutu pa evitar qu’Asturies quede descolingada del procesu abiertu en tol estáu.

Izquierda Xunida considera necesario aporfiar na so estratexa de pidir niveles más altos d’autogobiernu pa la nuestra comunidà y pola so reconocencia como país inda “ensin caer na tentación de los nominalismos”, afirma’l documentu aprebáu pol conseyu políticu de la coalición. Nel documentu cuéntase prioritario entaínar el procesu de reforma estatutaria pa evitar que’l PP y el PSOE puedan imponer “un estatutu fotocopiáu”. El documentu aprobóse col 70 por cientu de los votos de los representantes del conseyu políticu.

Leopoldo Tolivar Alas defendió esti miércoles 9 nuna conferencia pronunciada na Casa del Pueblo de Xixón l’inxerimientu de la cooficialidá nel nuevu Estatutu p’Asturies y el llogru d’un testu onde les cuestiones de fondu primen sobre la mera asunción de más competencies.

El caderalgu de Derechu Administrativu de la Universidá d’Uviéu, miembru destacáu del PSOE asturianu y ún de los espertos de la Comisión de la Xunta Xeneral afirmó que’l testu resultante de la prósima reforma había abordar asuntos como’l de la cooficialidá de la llingua asturiana, la creación de la futura policía autonómica o l’ampliación de les competencies a los conceyos. Tolivar resaltó tamién que la reorganización territorial d’Asturies había ser prioritaria nel nuevu Estatutu xunto a otres cuestiones de fondu.

Les Mocedaes d’Izquierda Asturiana (MIAS) de Mieres critiquen la prósima celebración d’una folixa nel so conceyu nomada “El Castañazo” y organizada pol gremiu d’hosteleros local. La nueva fiesta quier rescatar los tradicionales amagüestos como motivu central del eventu, col sofitu de l’administración municipal.

El portavoz de MIAS, Carlos Suari afirmó que “nún momentu onde la llingua y cultura asturianes tan en peligru de desapaición, el gobiernu ‘progresista’ de Mieres del PSOE fae desapaecer, lliteralmente, del mapa el nome tradicional col que n’Asturies se conoz a la popular fiesta del AMAGÜESTU, col asentimientu de los demás partíos del consistoriu, en dalgunos casos supuestos defensores de la llingua y cultura asturianes.”

Pa la organización moza el Conceyu de Mieres afita la so intención de nun mirar pola llingua y cultura d’Asturies y torga la tresmisión oral de xeneración en xeneración de los nomes y términos tradicionales del país”. Poro, dende mias>> ínstase al Conceyu de Mieres y a la conceyala de Turismu y Comerciu, Isabel Sánchez, a que camude la denomación de la nueva fiesta “El Castañazo” por “L’Amagüestu” y qu’incluya na so promoción l’emplegu de la llingua asturiana pa que les tradiciones y vezos astures sigan pasando de padres a fíos.

La prósima reforma del estatutu de Castiella y Lleón puede ser una ocasión pa que se reconozan los derechos llingüísticos de los falantes de la llingua propia d’esta comunidá. Asina lo consideren dos organizaciones en defensa del asturlleonés nun comunicáu conxuntu. Facendera pola Llingua de Lleón y l’asociación Furmientu de Zamora piden amás que se reconoza la mesma identidá pal idioma faláu a un y otru llau del cordal.

El comunicáu parte de la constatación de que l’estatus xurídicu ye bien estremáu nel conxuntu del dominiu asturlleonés, onde la llingua mirandesa ye oficial na República Portuguesa y nel estatutu d’Asturies reconozose la so protección, mientres que na comunidá de Castiella y Lleón nin siquier apaez mencionada esplícitamente. Les organizaciones firmantes del escritu caltienen que “nesti momentu nel que principia’l debate de la reforma estatutaria en Castiella y Lleón, dende les organizaciones de defensa de la llingua que firmamos embaixo pidimos -respetando les peculiaridaes polítiques y socioculturales de los territorios onde se fala la nuesa llingua asturlleonesa común- responsabilidá a los representantes políticos p’alcanzar el másimu grau posible de protección, estatus xurídícu y normalización del idioma”.

Respetive a la propuesta del PSOE de reconocer la llingua asturlleonesa nel estatutu d’autonomía de Castiella y Lleón, les asociaciones en defensa de la llingua felicítense “por esti pasu importante qu’aguardamos sigan el restu les fuerzes polítiques de la Comunidá”, inda pídese que “pa referise a la nuesa llingua s’eviten términos como’l propuestu de «dialecto leonés», que tien una vieya tradición académica, pero que nun s’axusta a la realidá sociollingüística d’anguañu y que pue ser contraproducente al poder deixar entender que nun se tá falando d’una llingua y de falantes con dereichos civiles, sinón d’outras realidaes llingüísticas de rangu y tratamientu políticu inferiores”.

Facendera pola Llingua y Furmientu consideren que na reforma del estatutu de Castiella y Lleón “ye interesante, de cara a nun creare más confusión sobre la realidá llingüística del Estáu español, por razones operatives y por asegura-y un futuru más vidable a la llingua, usar un términu ou términos pa referise al idioma que, d’alcuerdu cola realidá sociopolítica lleonesa y zamorana, deixen claro ante les instituciones españoles y europees que tamos falando de la mesma llingua asturlleonesa propia de la que se fala nel estatutu d’autonomía d’Asturies, l’asturianu o Bable”. La reivindicación d’entrambes asociaciones del dominiu asturlleonés recibió l’apoyu solidariu dende Asturies de la Xunta pola Defensa de la Llingua.

Andecha Astur critica al presidente del Principáu Vicente Álvarez Areces pol so discursu énte’l Senáu nel qu’afirmó que “los asturianos sentímonos cómodos n’España” y pidió la solidaridá del estáu pa la nuestra comunidá. La formación nacionalista considera qu’en vez de pidir “qu’España mos eche una mano lo que fai falta ye que mos la quite d’encima”.

Andecha truña na so páxina web contra Areces pola so intervención xunta los otros presidentes autonómicos: “P’Areces nun ye abondo gobernamos, vese obligáu a dicimos a los asturianos cómo y cuándo tenemos de sentimos cómodos”. La organización asturiana caltién que “la custión nun ye si Asturies ta agustu n’España, sinón qu’Asturies nun s’alcuentra a sí mesma por tenelo prohibío por partíos tan españolistes como’l del Sr. Areces”.

La intervención de Vicente Álvarez Areces nel debate sobre les reformes constitucionales y estatutaries del gobiernu de José Luis Rodríguez Zapatero desenvolvióse nos términos que ya adelantrara a los medios asturianos el propiu presidente del Principáu. Areces defendió p’Asturies una reforma estatutaria fecha a pasu “prudente y seguru” y asitióla pal prósimu cursu políticu.

L’añu 2006, remataos los trabayos de los espertos del Principáu, va ser el del empiezu de la ponencia estatutaria, según anunció ayer nel Senáu el xefe del executivu autonómicu. El presidente de la comunidá definió a Asturies como “un de los territorios más vieyos de la península, coles mesmes llendes xeográfiques polo menos dende’l sieglu XI” y al empar quiso recalcar que “los asturianos siempre nos sentimos a gustu n’España, ensin por ello renunciar a la nuestra propia identidá”.

Areces amosó’l so apoyu a les reformes entamaes pol presidente Zapatero y sumóse a les crítiques de los otros mandatarios autonómicos socialistes contra’l PP. Dende esti partíu n’Asturies, pel so llau Ovidio Sánchez refugó’l discursu del presidente asturianu al que calificó de “auténticu disparate”.

L’alcaldesa de El Franco Cecilia Pérez y l’alcalde de Coaña Salvador Méndez participen esti miércoles 9 nun debate sobre la recién polémica del gallego-asturiano qu’organiza el Club Prensa Asturiana de La Nueva España. Xunta ellos van tar nel alderique el filólogu José Antonio Vior y Santiago Somoza, maestru de Primaria.

El periódicu La Nueva España nun quier desaprovechar la oportunidá d’afondar na repercusión mediática que ta teniendo nes últimes selmanes la realidá llingüística de la Tierra del Navia-Eo y entama en El Franco -ún de los conceyos que se pronunciaron oficialmente sobre la polémica- un debate que quier poner enriba la mesa estremaes opiniones sobre un asuntu eleváu de cuantayá a rangu de polémica. La cita ye na tarde del miércoles 9 nel Salón de Plenos del Ayuntamientu de El Franco en A Caridá.

El presidente del gobiernu asturianu Vicente Álvarez Areces intervién esti llunes 7 nel Senáu dientro’l debate parlamentariu sobre les reformes d’estatutos puestes en marcha. El mandatariu del Principáu va defender un procesu “basáu na solidaridá interterritorial y non na defensa de les identidaes” y según adelantró a diversos medios va sofitar los sos argumentos en que los asturianos “nun nos sentimos obligaos a entamar una carrera pa definir la nuestra identidá” y en que ” nós sentímonos cómodos n’España”.

Areces quier estremar el so discursu del que desenvuelven los dirixentes d’otres comunidaes nel debate del Senáu y énte estes postures va esponer que n’Asturies “entamamos esti procesu con tranquilidá y responsabilidá, como nos demanda la sociedá, convencíos de que’l perfeccionamientu del nuestru autogobiernu tien de redundar directamente en beneficios pa los asturianos y siendo conscientes de que la reforma tien ser afrontada con un importante nivel de consensu».

La V Selmana Cultural n’Asturianu de Llangréu escomienza esti llunes en Sama con una conferencia de Pablo Xuan Manzano sobre’l venticincu aniversariu de la creación de l’Academia de la Llingua. La lliteratura nel vai del Nalón, el teatru, les actividaes pa los más mozos y un conciertu de Llan de Cubel completen el programa d’estes xornaes organizaes pola Oficina de Promoción Llingüística del conceyu embaxo’l títulu “A la gueta los oríxenes”.

La Casa Cultura de Sama acueye esti llunes a les 20.00 hores la conferencia del académicu Pablo Xuan Manzano titulada “25 años de l’Academia de la Llingua Asturiana. Mañana martes 8, a les 20.30 na Casa Cultura de La Felguera, l’actor y monologuista Carlos Alba “Cellero” va representar dellos monólogos modernos. Les actividaes d’esta Selmana Cultural siguen el miércoles 9 a les 20.00 hores na Casa la Cultura de Sama col III Alcuentru d’Escritores del Valle del Nalón, que nesta ocasión van falar de la torna y van facelo al través de les voces d’Helena Trejo Fombella, Severino Antuña, Anselmo Orviz y Pablo Rodríguez Medina.

El xueves 10 nel Centru Cultural de Riañu va haber una llectura de cuentos a cargu de los escritores Xosé R. Martín Ardines, Chechu García y Ana Vanessa Gutiérrez. Los escolinos van ser los protagonistes de l’actividá del viernes 11 nel Teatru Llangréu a les 10.30 de la mañana con una representación de la obra “Un besu por un quesu” a cargu de la compañía Electra y pela tarde a les 19.00 hores van proyectase dellos cortometraxes n’asturianu nel Centru Cultural de Riañu. La Selmana Cultural remata’l sábadu 12 con un conciertu de Llan de Cubel nel Teatru Llangréu a les 20.00 hores.

Como actividá complementaria a les programaes pola Oficina de Promoción Llingüística de Llangréu va celebrase la esposición “Alcordanza: 50 años de Reija” nel Centru de Cultura de Riañu, una amuesa que repasa la hestoria del grupu de baile de Reija ente’l 7 y el 21 de payares.