Sociedá

El Conceyu Abiertu pola Oficialidá (CAO) considera inadmisible la esclusión del asturiano ente les llingües del estáu citaes pol director de la Real Academia Española, Víctor García de la Concha, como “patrimoniu común de tolos españoles”. La plataforma cívica calificó estes palabres del caderalgu asturianu de la Universidá de Salamanca de “ignorancia premeditada”.

El CAO asitió les declaraciones de García de la Concha ente los diversos posicionamientos respective a la llingua asturiana fechos públicos nos últimos tiempos y por fala del so portavoz, Fernando Ornosa, afirmó que’l cabezaleru de l’Academia Española de la Lengua “tien la obligación de respetar y nun facer de menos a la llingua asturiana, cuando se refier a que’l patrimoniu cultural común de los pueblos del estáu lu formen namás cuatro llingües”.

Víctor García de la Concha pronunciò va unos díes un discursu en Salamanca, nel cursu d’un homenaxe que-y dedicaba la universidá helmántica, nel que defendía “les cuatro llingües d’España como patrimoniu cultural común de tolos españoles” y apostaba pol “billingüismu real énte la diglosia”. El portavoz del COnceyu Abiertu considera que “precisamente esa ye la situación del asturiano, que ta n’inferioridá de condiciones respective al castellano y ensin reconocencia oficial”. Ornosa quiso contestualizar la posición de García de la Concha ente les posiciones públiques “tanto nel planu políticu como nel institucional o académicu” que se vienen conociendo nes últimes selmanes respective a la llingua asturiana y consideró especialmente “grave que sea un asturianu el que fai de menos al idioma propiu d’Asturies”. El representante del CAO invító a De la Concha a afueyar l’Atlas Llingüísticu d’Asturies que vien editando’l Muséu Etnográficu de Xixón “pa que pueda opinar con conocimientu de causa y non dende la ignorancia premeditada tocante a la realidá llingüística asturiana”.

El presidente del Principáu, Vicente Álvarez Areces ye’l nuevu vicepresidente del grupu socialista nel Comité de les Rexones européu dende’l pasáu 3 de febreru cuando fue escoyíu polos representantes de poderes públicos territoriales de los países que componen la UE. El cabezaleru del gobiernu asturianu ocupa’l segundu puestu del grupu de los socialistes europeos nel Comité tres la piamontesa Mercedes Bresso que fue escoyida presidenta xunto a Areces.

La noticia difundiéronla esti llunes 13 fontes de la presidencia del Principáu, coincidiendo cola visita del mandatariu autonómicu asturianu al presidente español José Luis Rodríguez Zapatero na Moncloa.

El Comité de les Rexones integra a diversos organismos de representación pública de la Unión Europea con calter local o territorial. Nél tán reflexaos los distintos grupos del espectru políticu de la Unión, del que’l socialista ye agora mayoritariu.

El director de la Real Academia Española de la Lengua, el villaviciosín Víctor García de la Concha, defendió’l billingüismu “frente a la diglosia” y la convivencia de “les cuatro llingües d’España” esti llunes 13 en Salamanca, nel cursu del homenaxe que-y brindaba la Universidá helmántica. L’académicu, descendiente de Xosé Caveda y Nava, escluyó al asturiano na so apoloxía de la diversidá llingüística.

De la Concha abogó pol billingüismu escontra la diglosia, de la que dixo “establez la superioridá d’una llingua enriba d’otra” y apostó pol marcu constitucional pa caltener la convivencia llingüística: “ye’l meyor calce, el más intelixente y el más eficaz pa conservar la convivencia”. El director de l’Academia Española defendió “les cuatro llingües” como “patrimoniu común” de tolos ciudadanos del estáu, ensin mencionar a l’asturiana.

La Organización pol Multillingüismu, enraigonada en Cataluña, desenvuelve dende va unes selmanes una campaña pola reconocencia de la oficialidá del guaraní na secretaría de Mercosur. La entidá económica supranacional del Conu Sur americanu namás reconoz oficialmente al español y al portugués, al pesar de que’l guaraní ye l’idioma mayoritariu en Paraguay, estáu miembru d’esta organización.

La llingua indíxena de la república sudamericana ye una de les poques que pervivieron con plena vixencia social gracies al llabor de los misioneros xesuites. Anguaño el guaraní tien la reconocencia de llingua oficial xunta l’español en Paraguay, pero la Secretaría de Mercosur namás considera idiomes oficiales d’esta organización al español y al portugués.

La Organización pol Multillingüismu pide la reconocencia dafechu del idioma propiu de Paraguay nel senu de Mercosur non namás porque seya’l mayoritariu nel país sudamericanu, sinón porque diba valir p’afalar la reconocencia d’otres llingües indíxenes del continente, anguaño en seriu riesgu de supervivencia.

El presidente del gobiernu del Principáu Vicente Álvarez Areces reúnese esti llunes 13 col presidente del gobiernu español José Luis Rodríguez Zapatero nel Palaciu de la Moncloa. Ente los temes que tienen previsto tratar los dos mandatarios tán dellos de los principales proyectos financiaos pol estáu n’Asturies.

L’aportación de l’administración central na construción del Hospital Central (HUCA), al nuevu puertu del Musel y a la celebración de los actos del venticinco aniversariu de la Fundación Príncipe d’Asturies son dellos de los asuntos a tratar, amás de temes xenerales sobre financiación autonómica y de xuro sobre la futura reforma estatutaria nel Principáu. Ésti ye’l segundu alcuentru institucional que caltienen los dos mandatarios; el primeru caltuviéronlu’l 3 de xuno de 2004 pa tratar temes asemeyaos a los d’esti segundu aconceyamientu.

El portavoz del grupu parlamentariu socialista na Xunta Xeneral Fernando Lastra afirma que nun ye contradictoria la posición del so partíu contraria a la cooficialidá n’Asturies y partidaria d’ella como elementu de convivencia llingüística a nivel del estáu. El diputáu autonómicu considera que ye coherente reconocer a los idiomes oficiales y nun reconocer a los que nun lo son.

Lastra declara nuna entrevista concedida al diariu El Comercio que “nun firmamos proposiciones de ERC nin de naide que puedan ser contradictorios coles nuestres tesis; una cosa ye’l reconocimientu que tenemos de les llingües cooficiales nel Estáu y otru el d’aquelles que nun lo son, y que yo sepa, l’asturiano nun ye oficial nel Principáu”, diz el parlamentariu socialista.

El portavoz del PSOE na Xunta afirma que los llendes del so partíu en materia llingüística tán na oficialidá:”tamos faciendo un trabayu honestu na promoción, pero’l nuestru límite respective a la oficialidá ye conocíu”.

.

La Oficina Muncipal de la Llingua de Xixón entama hasta’l prósimu 15 de marzu la esposición ‘Trabayando con trabeyos’, una amuesa didáctica alrodiu de l’Asturies tradicional y los sos diversos oficios. Ente los conteníos que se pueden contemplar ta una colección de muñecos y muñeques ‘Barbies’ y ‘Kents’ detalladamente vistíos col traxe asturianu.

L’oxetivu fundamental de l’amuesa ye averar a los escolinos del conceyu a la conocencia de dellos aspeutos de la cultura y les tradiciones d’Asturies. Los conteníos que se-yos espliquen a los neños faen referencia a estremaes actividaes de la sociedá del país, perimportantes n’otres dómines, y qu’anguaño alcuéntrense dafechamente escaecíes o arrequexaes. Poro, la Oficina de la Llingua organiza esta esposición col enfotu d’esparder ente les nueves xeneraciones el conocimientu de la nuesa historia y, asina, rescatar del pozu del olvidu les actividaes y tradiciones, daquella fundamentales na vida de los asturianos y asturianes, y que güei hemos de conocer si queremos saber quién somos y lo que queremos ser.

Per mediu d’una visita guiada va falándose a los rapacinos d’actividaes humanes esenciales a lo llargo de los sieglos pa los nuesos güelos; tales que, La Llana y El Llinu, La Ferrería, El Mólín, La elaboración del pan y La Romería.

L’amuesa puede visitase nel Antigu Institutu hasta’l prósimu 15 de febreru.

Una esposición de catorce cartelos sobre los derechos de la infancia va percorrer los distintos centros sociales del conceyu d’ Uviéu dende el prósimu 13 de febreru hasta el 25 de setiembre. L’amuesa ta organizada por Amnistía Internacional dientro’l Conveniu de colaboración sobre educación en derechos humanos firmáu pola organización col Ayuntamientu carbayón pa esti añu.

Los cartelos recueyen fotografíes de neños y neñes de diferentes partes del mundu que ilustren caún de los principios de la “Declaración de los Derechos de la Infancia” y tamién despliquen cómo trabaya Amnistía Internacional pa promover y protexer los derechos de los menores. El públicu va disponer al empar de folletos y materiales pa conocer meyor esti llabor y poder colaborar cola organización humanitaria si-y peta.

La organización nacionalista moza Darréu súmase nun comunicáu a les crítiques feches a la conseyera de Cultura, Ana Rosa Migoya, poles sos declaraciones en díes pasaos alrodiu de la oficialidá de la llingua asturiana. El colectivu xuvenil pide la dimisión de la conseyera y acúsala de “ineficacia” y “desconocimientu” tocante al patrimoniu cultural asturianu.

Dende Darréu nun s’entiende el que la responsable de Cultura refugue el reconocimientu del asturiano “a pesar de querer la oficialidá del asturianu más del 60% de l@s asturian@s como diz la cabera encuesta sociollinguistica de Llera Ramos” , y poro pa esti colectivu Ana Rosa Migoya “nun cumple les funciones mínimes como pa tener un cargu d’esta relevancia nin defender los intereses de los asturianos en materia cultural”.

Pa la organización xuvenil el fechu de “que tovía nun sea oficial la llingua asturiana tien nomes propios , la FSA , Areces, Migoya , IU-BpA ( pactando col PSOE, a pesar de nun ser oficial la llingua asturiana ), son les persones y organizaciones que se auto-xustifiquen como progresistes y solidaries n’otros llugares , mientres nel nuestru país reprimen sistemáticamente y de diferentes maneres la llingua asturiana”, diz el colectivu Darréu nel so comunicáu.

El Partido Popular, per voz del so secretariu xeneral n’Asturies, Rainero Álvarez Saavedra, coincidió cola conseyera de Cultura, Ana Rosa Migoya, en relacionar la posibilidá de oficializar la llingua asturiana cola obligatoriedá. El dirixente popular defendió el “principiu de non obligatoriedá” pal asturiano y dixo que nun yera comparable al catalán porque “nun hai un usu habitual” del idioma na nuestra comunidá.

Álvarez Saavedra emitió estes opiniones nel mesmu mediu que la conseyera Migoya, el Canal 10 de televisión y nel cursu de la entrevista na que fue sondeáu alrodiu de la estratexa política del so partíu d’equí a les prósimes elecciones autonómiques reconoció que “esiste un universu asturianu, xente que llee n’asturianu” y que “esta ye una realidá que habrán tener en cuenta los lexisladores, pero na so xusta dimensión”. El secretariu xeneral del PP d’Asturies descartó nesi sen la oficialidá: “somos partidarios del principiu de non obligatoriedá”, declaró.

Preguntáu sobre les asemeyances del tratamientu dau al catalán nel nuevu Estatut y a la nuestra llingua na futura reforma del testu autonómicu Saavedra afirmó que nun yeren comparables los casos nin los idiomes porque n’Asturies “nun hai un usu habitual” de la llingua.

El líder popular reivindicó el papel xugáu pol so partíu tocante al asturiano y dixo que fuera “xunto al PAS la única formación que desarrolló una Llei del Asturiano tando nel gobiernu”.